პემბროლიზუმაბმა ენდომეტრიუმის (საშვილოსნოს) შორსწასული კიბოს სამკურნალოდ FDA-ს დამტკიცება მიიღო

მიკროსატელიტური არასტაბილურობის მაღალი დონე (MSI-H) ან დნმ-ის შეუსაბამობის აღდგენის დეფიციტი (dMMR) მქონე შორსწასული ენდომეტრიუმის კარცინომით (საშვილოსნოს კიბოთი) დაავადებული პაციენტების სამკურნალოდ, რომელთა კიბო ნებისმიერ პირობებში მანამდე ჩატარებული სისტემური მკურნალობის შემდეგ პროგრესირებდა და რომლებიც განკურნების მომცემი ოპერაციის ან რადიოთერაპიის კანდიდატები არ არიან, პემბროლიზუმაბმა (Keytruda, Merck) ერთეული აგენტის სახით FDA-ს (აშშ-ის სურსათისა და წამლის ადმინისტრაციის) დამტკიცება 2022 წლის 21 მარტს მიიღო.

FDA-მ ამავდროულად დაამტკიცა VENTANA MMR RxDx Panel (Ventana Medical Systems / Roche Tissue Diagnostics), როგორც თანმხლები დიაგნოსტიკური მოწყობილობა პემბროლიზუმაბით მკურნალობისთვის შესაფერისი, dMMR-ის მქონე სოლიდური (ორგანოს) სიმსივნეების პაციენტების შესარჩევად. FDA-ს მანამდე უკვე დამტკიცებული ჰქონდა FoundationOne CDx (F1CDx, Foundation Medicine, Inc.), როგორც თანმხლები დიაგნოსტიკური მოწყობილობა პემბროლიზუმაბით მკურნალობისთვის შესაფერისი, MSI-H-ის მქონე სოლიდური სიმსივნეების პაციენტების შესარჩევად.

KEYNOTE-158 კვლევით მიღებული FDA-ს დამტკიცება

KEYNOTE-158-ის D და K კოჰორტების შედეგებმა პემბროლიზუმაბს ამ ჩვენებისთვის FDA-ს დამტკიცება მოუტანა. ამ კოჰორტებში ჩაერთო 90 პაციენტი არარეზექტაბელური ან მეტასტაზური MSI-H ან dMMR ენდომეტრიუმის კარცინომით. სიმსივნეებში MSI-H-ისა და dMMR-ის სტატუსი დადგინდა, შესაბამისად, პოლიმერაზული ჯაჭვური რეაქციით (PZR) ან იმუნოჰისტოქიმიით. პაციენტები ყოველ 3 კვირაში 200 mg პემბროლიზუმაბს იღებდნენ მიუღებელ ტოქსიკურობამდე ან დაავადების დოკუმენტირებულ პროგრესირებამდე (წინსვლამდე). პემბროლიზუმაბით ნამკურნალები პაციენტები, რომელთაც დაავადების პროგრესირება არ ჰქონდათ, მკურნალობას 24 თვემდე იღებდნენ.

ეფექტიანობის ძირითადი შედეგების საზომები, RECIST v1.1-ის მიხედვით ჩატარებული ბრმა დამოუკიდებელი ცენტრალური შეფასებით, იყო ობიექტური პასუხის მაჩვენებელი (ORR) და პასუხის ხანგრძლივობა (DoR).

შედეგები

• ობიექტური პასუხის მაჩვენებელი 46% იყო (95% სანდოობის ინტერვალი: 35, 56).
• მოპასუხე პაციენტებში პასუხის ხანგრძლივობის მედიანა მიღწეული არ იყო (2,9-დან 55,7+-მდე).
• მოპასუხეთა 68%-ში პასუხის ხანგრძლივობა ≥12 თვე, ხოლო 44%-ში — ≥24 თვე იყო.

პაციენტებში ყველაზე გავრცელებული არასასურველი რეაქციებია (≥20%) დაღლილობა, კუნთ-სახსროვანი ტკივილი, გამონაყარი, დიარეა, ცხელება, ხველა, მადის დაქვეითება, ქავილი, ქოშინი, შეკრულობა, ტკივილი, მუცლის ტკივილი, გულისრევა და ჰიპოთირეოზი. პემბროლიზუმაბს იმუნური მექანიზმით განპირობებული გვერდითი მოვლენებიც უკავშირდება; მათ შორისაა პნევმონიტი, კოლიტი, ჰეპატიტი, ენდოკრინოპათიები, ნეფრიტი და კანის არასასურველი რეაქციები.

პემბროლიზუმაბის რეკომენდებული დოზაა ყოველ 3 კვირაში 200 mg ან ყოველ 6 კვირაში 400 mg, დაავადების პროგრესირებამდე, მიუღებელ ტოქსიკურობამდე ან 24 თვემდე.