3 və 4A mərhələli uşaqlıq boynu xərçəngi üçün kimyaradioterapiya ilə pembrolizumab FDA təsdiqi aldı

Nəticələr

KEYNOTE-A18 sınağında bütün xəstələr nəzərə alındıqda pembrolizumab və eyni vaxtda kimyaradioterapiya (KRT) kombinasiyası alan xəstələrdə xərçəngin proqressiyası (irəliləməsi) riski, plasebo və KRT alan xəstələrlə müqayisədə 30% daha aşağı idi (HR 0,70; 95% CI 0,55–0,89; p=0,0020).

KRT-yə pembrolizumab əlavə edilməsindən III-IVA mərhələli xəstələr fayda gördü

KEYNOTE-A18 araşdırması pembrolizumab verilmiş ümumi xəstə qrupunda xəstəliyin irəliləməməsi baxımından yaxşılaşma olduğunu göstərmişdir. Daha ətraflı baxıldıqda III-IVA mərhələli xəstəliyi olan 596 xəstədə aparılan təhlil pembrolizumab alanlarda xəstəliyin irəliləməsi hadisələrinin daha az yaşandığını ortaya qoymuşdur. Bu xəstələrdə xəstəliyin irəliləmə riski pembrolizumab almayanlarla müqayisədə 41% daha aşağıdır (risk nisbəti 0,59). Yəni pembrolizumab alanların yalnız 21%-ində xəstəlik irəliləmiş, plasebo alanların isə 31%-ində irəliləmə görülmüşdür.

Lakin IB2-IIB mərhələli xəstəliyi olanlarda bu fərq müşahidə edilməmişdir; yəni pembrolizumabın həmin mərhələdəki xəstələrdə aydın faydasının olub-olmadığı dəqiq deyil (risk nisbəti 0,91).

Ümumi sağqalım (xəstələrin nə qədər yaşadığı) məlumatları hələ tam yetişmədiyi üçün bu məlumatlara əsasən qəti nəticə çıxarmaq mümkün olmamışdır.

Pembrolizumab və kimyaradioterapiya alan xəstələrdə ən çox rast gəlinən (10% və ya daha çox) arzuolunmaz reaksiyalar ürəkbulanma, ishal, qusma, sidik yolu infeksiyası, yorğunluq, hipotireoz, qəbizlik, iştah azalması, çəki itkisi, qarın ağrısı, qızdırma, hipertireoz, dizuriya, səpgi və çanaq ağrısı idi.

Pembrolizumab üçün tövsiyə olunan doza rejimi xəstəlik irəliləyənə, qəbuledilməz toksiklik yaranana qədər və ya ən çox 24 ay müddətində hər 3 həftədən bir 200 mg IV və ya hər 6 həftədən bir 400 mg IV-dir. Pembrolizumab eyni gündə kimyaradioterapiya ilə veriləcəksə, ondan əvvəl tətbiq edilməlidir.