Canlı dərman CAR-T hüceyrə müalicəsi Kymriah limfoma üçün FDA təsdiqi aldı

Xüsusilə hematoloji (qan və sümük iliyi mənşəli) xərçənglərdə inqilab yaradan müalicələrdən biri kimi göstərilən CAR-T hüceyrə müalicələri klinikada daha çox yer almağa başladı. ABŞ Qida və Dərman İdarəsi (FDA) Novartis tərəfindən hazırlanmış CAR-T hüceyrə müalicəsini (Kymriah) yetkinlərdə 2 və ya daha çox sistemik müalicədən sonra residiv vermiş diffuz iri B-hüceyrəli limfomanın (DBBL), irəliləmiş mərhələli B-hüceyrəli limfomanın və follikulyar limfomadan yaranan DBBL-in müalicəsi üçün təsdiqlədi.

Kymriah əvvəllər avqust 2017-ci ildə yaşı 25-ə qədər olan, iki və ya daha çox residiv vermiş B-hüceyrəli kəskin limfoblastik leykozlu xəstələrin müalicəsində istifadə üçün FDA tərəfindən təsdiqlənmişdi. Kmyriah xərçəngdə təsdiq almış ilk Car-T hüceyrə müalicəsidir. İndi isə qeyri-Hodgkin limfoması və B-hüceyrəli kəskin limfoblastik leykoz olmaqla iki fərqli xəstəliyin müalicəsində istifadə edilə biləcək.

• Limfoma, limfa xərçəngi nədir? Əlamətləri və müalicəsi necədir?

Bəs müalicənin təsdiqi bizim üçün nə deməkdir?

• Diffuz iri B-hüceyrəli limfoma qeyri-Hodgkin limfomasının ən geniş yayılmış tipidir. Residiv vermiş və ya ilkin müalicəyə cavab verməyən xəstələrdə müalicə seçimləri olduqca azdır. Kymriah kök hüceyrə transplantasiyası aparılmadan xəstələrə təsirli müalicə təqdim edə bilər.
• Kymriah xəstənin T-hüceyrələrindən istifadə edilərək hər xəstə üçün fərdi hazırlanan hüceyrə müalicəsidir. CAR-T hüceyrə müalicələri CRISPR texnologiyası ilə daha təsirli və daha təhlükəsiz olub.
• Kymriah sitokin ifrazı sindromuna və nevroloji toksikliklərə səbəb ola bilər. Buna görə bu müalicələri tətbiq etməyə səlahiyyətli və sertifikatlaşdırılmış mərkəzlər onları həyata keçirə biləcək.
• Xərçəngdə ən təsirli müalicələr genetik və immun (immun sistemi) əsaslı sistemlərdən gəlir. Xüsusilə vurğulanmalıdır ki, müasir tibb müxtəlif elm sahələrinin təsiri ilə hər keçən gün xərçəngi daha güclü şəkildə müalicə edir.