Əməliyyat olunmuş mədəaltı vəzi xərçəngində gemsitabin kimyaterapiyasına kapesitabin əlavə edilməsi yaşam müddətini uzadır

Yanvar 2017-ci ildə nüfuzlu tibb jurnalı Lancet-də dərc olunan tədqiqata görə, mədəaltı vəzi xərçəngində əməliyyatdan sonra xəstəliyin təkrarlanma riskini azaltmaq məqsədilə adyuvant tətbiq edilən gemsitabin adlı kimyaterapiyaya kapesitabin adlı ağızdan həb şəklində qəbul edilən kimyaterapiya dərmanının əlavə edilməsi yaşam müddətini nəzərəçarpacaq şəkildə uzadıb.

Mədəaltı vəzi xərçəngi ən çox rast gəlinən xərçənglərdən biri olmasa da, xərçəngə bağlı ölüm hallarına görə ABŞ-da həm qadınlarda, həm kişilərdə 4-cü yerdədir; dünya üzrə isə kişilərdə illik 138 min ölümlə 8-ci, qadınlarda illik 127 min ölümlə 9-cu yerdədir.

45 yaşdan əvvəl olduqca nadir görünən bu xəstəlikdə siqaret, piylənmə, fiziki fəal olmamaq, xroniki pankreatit, irsi amillər və diabet kimi risk faktorları müəyyən edilib.

Erkən mərhələlərdə çox vaxt əlamət verməyən bu xəstəlikdə xəstələrin yalnız təxminən %10-na erkən mərhələdə diaqnoz qoyula bilir (cərrahi müdaxiləyə uyğun, əməliyyat edilə bilən lokallaşmış xəstəlik). Şiş çıxarıla bilirsə, bu xəstəliyi sağaltmaq üçün yeganə şans olan əməliyyat üsulu tətbiq edilməlidir. Şişin hamısı əməliyyatla çıxarılsa belə, mədəaltı vəzi xərçənginin təkrarlanma riski yüksəkdir. Əməliyyatdan sonra tətbiq edilən adyuvant kimyaterapiyanın xəstələrin yaşam müddətini və xəstəliyin təkrarlanma riskini azaltdığı əvvəlki tədqiqatlarla göstərilib və gemsitabin adlı kimyaterapiya dərmanı adyuvant müalicə kimi erkən mərhələli mədəaltı vəzi xərçənginin standart müalicə yanaşmasına çevrilib.

Tədqiqat

Şişi əməliyyatla tam çıxarılmış 732 mədəaltı vəzi xərçəngli xəstə tədqiqata daxil edilib. Adyuvant müalicə üçün xəstələr 2 qrupa ayrılıb, bir qrupa 12 həftə ərzində həftəlik gemsitabin və kapesitabin (3 həftə tətbiq, 1 həftə fasilə şəklində) verilib; digər qrupa isə yalnız gemsitabin tətbiq edilib.

Gemsitabinlə kombinə edilmiş kapesitabin tətbiqi tək gemsitabin tətbiqi ilə müqayisədə ölüm riskini %18 azaldıb.

Median ümumi sağqalım kombinasiya qrupunda 28 ay, yalnız gemsitabin alanlarda isə 25.5 ay olub.

Nəticə olaraq, bu adyuvant kombinasiya müalicəsi əməliyyat olunmuş mədəaltı vəzi xərçəngli xəstələr üçün yeni müalicə standartı kimi nəzərdən keçirilməlidir.