HER2-Müsbət İrəliləmiş Öd Yolları Xərçəngində Zanidatamab

İnkişaf edən texnologiya və tibbi biliklər sayəsində xərçəng müalicəsində hədəfli yanaşmalar daha çox əhəmiyyət qazanıb. Hədəfli müalicələr xəstəliklərin spesifik bioloji xüsusiyyətlərini hədəfləyərək xəstələrin həyat keyfiyyətini və sağqalım göstəricilərini artıra bilər. Bu məqalədə HER2-müsbət irəliləmiş öd kanalı xərçəngi olan xəstələrdə yeni müalicə variantı zanidatamabın effektivliyini və təhlükəsizliyini araşdıran tədqiqatdan danışılır. Öd kanalı/yolları xərçəngi, xüsusilə irəliləmiş mərhələlərdə müalicəsi çətin xəstəlikdir və buna görə yeni, daha təsirli müalicə üsullarına ehtiyac var.

Öd Kanalı Xərçəngində HER2-Hədəfli Vasitənin Ən Böyük Faza-2 Tədqiqatı

Lancet Oncology-də dərc edilən HERIZON-BTC-01 adlı faza IIb tədqiqatı öd kanalı xərçəngli xəstələrdə HER2-hədəfli vasitənin ən böyük faza 2 sınağıdır. Dr. James J. Harding və həmkarları zanidatamab adlı dərmanın əvvəllər müalicə almış HER2-müsbət irəliləmiş öd kanalı xərçəngli xəstələrdə təsirli olduğunu tapdılar.

Klinik Tədqiqatın Təfərrüatları

Tədqiqata Kanada, Çili, Çin, Fransa, İtaliya, Cənubi Koreya, İspaniya, Birləşmiş Krallıq və ABŞ-dan gemsitabin əsaslı kimyaterapiya zamanı irəliləmə göstərmiş yerli irəliləmiş və ya metastatik öd yolu xərçəngi olan 87 xəstə daxil edildi.

Xəstələr HER2 immunohistokimya (IHC) ballarına görə iki qrupa ayrıldı:

• qrup 1 (80 xəstə; IHK 2+ və ya 3+ = HER2-müsbət) və
• qrup 2 (n = 7 xəstə; IHK 0 və ya 1+).

Qrup 1-dəki xəstələrin 65%-i asiyalı idi və 89%-ində xərçəng 4-cü mərhələdə idi. HER2 IHK 0 və ya 1+ şişi olan xəstə sayı gözləniləndən az olduğu üçün qrup 1 tam toplandıqda qrup 2-yə qəbul dayandırıldı. Xəstələr hər 2 həftədən bir 20 mg/kg zanidatamab aldılar.

Qrup 1-dəki xəstələrin

• 51%-i öd kisəsi xərçəngi,
• 29%-i qaraciyərdaxili öd yolları xərçəngi (intrahepatik xolangiokarsinoma) və
• 20%-i qaraciyərxarici öd yolları xərçəngi (ekstrahepatik xolangiokarsinoma) xəstəsi idi.

Tədqiqatın birincili sonlanma nöqtəsi müstəqil mərkəzi qiymətləndirmə ilə dəyərləndirilən qrup 1-də təsdiqlənmiş obyektiv cavab göstəricisi idi.

Cavablar

• 2022-ci ilin oktyabrındakı məlumat kəsimində median izləmə müddəti 12,4 ay idi (kvartillərarası diapazon = 9,4–17,2 ay).
• Qrup 1-dəki
  • 80 xəstənin 33-ündə (41,3%, 95% etibar intervalı [CI] = 30,4%–52,8%) obyektiv cavab müşahidə edildi; bunlardan 1-də (1,3%) tam cavab görüldü.
  • Bundan əlavə, 22 xəstədə (27,5%) xəstəlik sabitləşdi,
  • Nəticədə bu məlumatlar 68,8%-lik xəstəliyə nəzarət göstəricisi deməkdir.
• Müalicəyə cavab verən xəstələrdə median cavab müddəti 12,9 ay idi (95% CI = 6,0 aydan qiymətləndirilə bilməyən həddə qədər); məlumat kəsimi zamanı 16 cavab (49%) davam edirdi.
• Median proqressiyasız sağqalım 5,5 ay idi (95% CI = 3,7–7,2 ay).
• Ümumi sağqalım məlumatları yetkinləşməmişdi, lakin 9 aylıq ümumi sağqalım göstəricisi 69,9% (95% CI = 57,8%–79,1%) idi.

Qrup 2-dəki yeddi xəstədə obyektiv cavab müşahidə edilmədi. Median proqressiyasız sağqalım 1,9 ay (95% CI = 1,2 aydan qiymətləndirilə bilməyən həddə qədər), median ümumi sağqalım isə 5,5 ay idi (95% CI = 1,2–10,1 ay).

Aşağıda tədqiqatın alt qrup analizi görünür:

Şəkil 1. Qrup 1-dəki (HER2-müsbət) alt qruplara görə müstəqil mərkəzi qiymətləndirmə ilə müəyyən edilən obyektiv cavab göstəricisi (OYO). İstinad xətləri bütün qrupun 95% CI sərhədlərini göstərir. ECOG PS=Eastern Cooperative Oncology Group performans statusu. IHK=immunohistokimya. OYO=obyektiv cavab göstəricisi.

Əlavə Təsirlər

87 xəstənin hamısında istənilən dərəcədə ən çox görülən müalicə ilə əlaqəli əlavə təsirlər ishal (37%), infuziya reaksiyaları (33%), atım fraksiyasının azalması (9%, ürəyin yığılma gücünün azalması) və ürəkbulanma (9%) idi. Müalicə ilə əlaqəli 3-cü dərəcəli əlavə təsirlər (4 və ya 5-ci dərəcəli hadisə müşahidə edilmədi) 16 xəstədə (18%) baş verdi; ən çox görülənlər ishal (5%) və atım fraksiyasının azalması (3%) idi. İstənilən dərəcədə ciddi, müalicə ilə əlaqəli əlavə təsirlər xəstələrin 8%-ində yarandı. Müalicə ilə əlaqəli əlavə təsirlər iki xəstədə müalicənin dayandırılmasına səbəb oldu: bunlar atım fraksiyasının azalması və pnevmonit idi.

Şərh

Bu faza 2 təkqollu tədqiqat HER2-müsbət öd kanalı xərçəngli xəstələrin müalicəsində zanidatamabın şişəleyhinə aktivliyini və təhlükəsizliyini qiymətləndirdi. İrəliləmiş öd kanalı xərçəngi xəstəliyin gedişinin pis olduğu bilinən xəstə qrupunu təmsil edir. Bu molekulyar alt qrup üçün təsdiqlənmiş HER2-hədəfli müalicələr yoxdur və buna görə mühüm tibbi ehtiyac var. Tədqiqatın nəticələri zanidatamabın yaxşı tolere edildiyini, cavab göstəricisi və cavab müddəti baxımından ümidverici tək-agent aktivliyi olduğunu göstərdi. Bu, öd kanalı xərçəngli xəstələrdə HER2-hədəfli vasitənin ən böyük faza 2 sınağıdır.

Tədqiqatın nəticələri zanidatamabın HER2 baxımından 2+ və ya 3+ müəyyən edilmiş irəliləmiş öd kanalı xərçəngli xəstələr üçün potensial müalicə ola biləcəyini dəstəkləyir. Bu nəticələrə əsasən zanidatamabın birinci xətt kimyaterapiya ilə kombinasiyada və irəliləmiş öd kanalı xərçəngi üçün monoterapiya variantı kimi klinik tədqiqatlarda istifadəsinə yönələn səylər davam edir.