Mitazalimab ilə mədəaltı vəzi xərçəngində əvvəllər görülməmiş müalicə cavabları

Mədəaltı vəzi xərçəngi erkən diaqnozun çətinliyi və müalicələrə davamlı təbiəti səbəbindən tibbi tədqiqatlarda prioritet hədəflərdən biri olub. Metastatik mərhələdə xəstəlik çox vaxt qaraciyərə yayılmış olur və mövcud müalicə variantları məhduddur, çətinliklər yaradır. Bu baxımdan mitazalimab və modifikasiya edilmiş mFOLFIRINOX (mFOLFIRINOX) kombinasiyasının metastatik mədəaltı vəzi xərçənginin müalicəsində göstərdiyi təsir bu çətin xərçəng növü ilə mübarizədə yeni ümid işığı ola bilər.

Mitazalimab CD40 molekulunu hədəfləyən və immun sisteminin xərçəng hüceyrələrinə qarşı fəaliyyətini artıran CD40 aqonistidir (reseptoru aktivləşdirən maddələrə "aqonist" deyilir). CD40 immun hüceyrələrin səthində yerləşən və antigen təqdim edən hüceyrələrlə T hüceyrələri arasındakı qarşılıqlı təsiri gücləndirən reseptordur. Bu qarşılıqlı təsir immun sisteminin xərçəng hüceyrələrini tanıyıb məhv etməsi üçün həyati əhəmiyyət daşıyır. Mitazalimab həmin mexanizmi təqlid edərək immun cavabı birbaşa gücləndirir və bu baxımdan bir immunoterapiya növüdür.

Mitazalimab və mFOLFIRINOX kombinasiyası ilə indiyədək bildirilmiş ən yaxşı cavab göstəriciləri

Təsdiqlənmiş cavab göstəricisi 42,1%, müalicəyə cavab verən xəstələrdə median cavab müddəti isə 12,6 ay olub.

Mitazalimab və modifikasiya edilmiş folin turşusu, flüorourasil, irinotekan hidroxlorid və oksaliplatin (mFOLFIRINOX) kombinasiyasının əvvəllər müalicə almamış metastatik mədəaltı vəzi xərçəngi xəstələrində təsirli olduğu müşahidə edilib. Bu nəticələr ESMO Mədə-bağırsaq Xərçəngləri Konqresi 2024-də təqdim olunub.

Tədqiqatı təqdim edən İspaniyadan Dr. Teresa Macarulla Mercade-yə görə, bu kombinasiya "misli görünməmiş cavab müddəti" təmin edib və "bu xəstələr üçün uzanmış sağqalım üstünlüyü" verib.

Dr. Macarulla Mercade və həmkarları faza 1b/2 OPTIMIZE-1 sınağında mitazalimab ilə mFOLFIRINOX kombinasiyasını yoxlayıblar.

OPTIMIZE-1 tədqiqatının təfərrüatları

Erkən mərhələ klinik tədqiqata müalicə almamış metastatik mədəaltı vəzi adenokarsinoması olan xəstələr daxil edilib. Effektivlik qrupu 57, təhlükəsizlik qrupu isə 70 xəstədən ibarət olub; əksəriyyət qadın olub (müvafiq olaraq 57,9% və 57,1%).

Effektivlik və təhlükəsizlik qrupları: Klinik tədqiqatda dərmanın effektivliyini və təhlükəsizliyini qiymətləndirmək üçün izlənən xəstə qruplarıdır. Effektivlik qrupu dərmanın təsirini, təhlükəsizlik qrupu isə təhlükəsizliyini qiymətləndirir.

Hər iki qrupda median yaş 62 olub (43-77 yaş aralığı).

Xəstələrin çoxu əvvəl əməliyyat keçirməmişdi (96,5% və 95,7%) və qaraciyər metastazı var idi (73,7% və 78,6%).

Tədqiqatın ilk hissəsində xəstələr mitazalimabı 450 mg/kg və ya 900 mg/kg dozada alıblar. İkinci hissədə tövsiyə edilən faza 2 dozasını — 900 mg/kg — alıblar. Mitazalimab 1, 10, 24, 38 və 52-ci günlərdə, mFOLFIRNOX isə 8, 22, 36 və 50-ci günlərdə verilib.

Tədqiqatın əsas sonlanım nöqtəsi obyektiv cavab göstəricisi olub. 

Nəticələr

• Median 18 aylıq izləmədə və xəstələrin 30%-nun hələ müalicə aldığı dövrdə təsdiqlənmiş obyektiv cavab göstəricisi 42,1% müəyyən edilib.
• Müalicəyə cavab verən xəstələrdə median cavab müddəti 12,6 ay olub.
• Median proqressiyasız sağqalım (PFS) 7,7 ay və
• median ümumi sağqalım 14,9 ay olub.
• 12 aylıq proqressiyasız sağqalım göstəricisi 35,1%,
• 12 aylıq ümumi sağqalım göstəricisi 57,8% və
• 18 aylıq ümumi sağqalım göstəricisi 36,2% olub.

Xarici məzmunu görmək üçün seçimləri tənzimləyin

Altqrup təhlilləri

Bu tədqiqatdakı kəşfiyyat xarakterli altqrup təhlili xəstələrin ümumi sağqalım müddətinin ilk mitazalimab dozasından sonra "CD4 effektor T hüceyrələri"ndəki dəyişikliklərlə əlaqəli olduğunu göstərib.

CD4 effektor T hüceyrələrinin sayında böyük artım olanlar daha az artım olanlardan uzun yaşayıblar; qruplarda median sağqalım müvafiq olaraq 14 ay və 8,8 ay olub (P = 0,019).

Eyni şəkildə, mitazalimabdan sonra müəyyən immun hüceyrə növlərindəki artımlar xəstələrin müalicəyə cavabının dərinliyi ilə əlaqələndirilib. Xüsusilə CD38+ təbii öldürücü (NK) T hüceyrələri, CD38+ CD8+ terminal effektor yaddaş (TEMRA) hüceyrələri və başqa bəzi T hüceyrə növlərindəki artımlar diqqət çəkib. Lakin düzəlişlərdən sonra yalnız CD38+ NK/T hüceyrə artımı müalicə cavabı ilə əhəmiyyətli əlaqə göstərib (P = 0,04295).

Təhlükəsizlik baxımından tədqiqatdakı 70 xəstənin 78,6%-sı ciddi yan təsirlərlə üzləşib. Ən çox rast gəlinən ciddi yan təsirlər neytropeniya, hipokalemiya, anemiya, trombositopeniya və yorğunluq olub. Bu məlumatlar müalicənin potensial faydaları ilə yanaşı, mümkün riskləri barədə də məlumat verir.

Nəticə etibarilə, mitazalimab və modifikasiya edilmiş FOLFIRINOX kombinasiyası metastatik mədəaltı vəzi xərçənginin müalicəsində ümidverici üsul kimi önə çıxır. Kombinasiya gələcək faza 3 sınağında birinci xətt müalicə kimi daha geniş yoxlanılaraq inkişaf etdirilməyə davam edəcək. Bu irəliləyiş həmin çətin xərçəng növünə qarşı yeni və təsirli müalicə variantları təqdim etmək potensialı daşıyır.