Müayinə gözləmə zalında xərçəng xəstələrinə və yaxınlarına tövsiyələr

Əgər təzəcə yeni süd vəzi xərçəngi diaqnozu almısınızsa, həkiminizi görməzdən əvvəl müalicə üçün onkologiya şöbəsinin zalında keçirdiyiniz müddətdə çox güclü narahatlıq hiss edə bilərsiniz. Prosesin necə keçəcəyi barədə təsəvvürünüzün olmaması və yeni aldığınız bu diaqnoz sizdə stress yarada bilər. Bu prosesdə sizə kömək edə biləcək bəzi tövsiyələr vermək istəyirik.

Xəstələrə tövsiyələr

• İxtiyarsız ağlamağa başlaya bilərsiniz. Utanmayın, oradakı hər kəs oxşar duyğular yaşayır və bilin ki, sizi anlayırlar.
• Onkologiya şöbəsində gözləmə zalları kiçik uşaqlar üçün uyğun məkan olmaya bilər. Müalicəyə və həkim görüşlərinə uşaqlarınızla birlikdə getsəniz, onsuz da asan olmayan vəziyyətdə stressiniz bir qədər də arta bilər. Xəstəxanaya gələcəyiniz vaxtlarda mümkünsə onları qayğı göstərə biləcək birinə həvalə edin.
• Özünüzü yaxşı hiss etmirsinizsə, həddindən artıq narahat və stressli hiss edirsinizsə, onkologiya tibb bacısı ilə danışaraq ayrı bir yerdə oturmaq istədiyinizi bildirə bilərsiniz.
• Yemək yeməlisinizsə və yanınızda gətirirsinizsə, qoxusuz qidalara üstünlük verməlisiniz. Kimyaterapiya alan digər xəstələr yemək qoxularına dözə bilməyib çətin vəziyyətdə qala bilərlər.
• Yanınızda oturan biri sizinlə süd vəzi xərçəngi və ya sizi narahat edən hər hansı mövzuda danışmağa çalışırsa və siz danışmaq istəmirsinizsə, özünüzü yaxşı hiss etmədiyinizi və sakit qalıb dincəlməli olduğunuzu söyləyin.
• Bu mühitdə digər xəstələrin də müalicə prosesində emosional çətinliklər və müxtəlif mərhələlər yaşaya biləcəyini unutmayın. Qəzəblərini və ya duyğularını ucadan ifadə edə bilərlər. Qulaqcıq taxıb musiqi dinləyə bilərsiniz, bu, sakit qalmağınıza kömək edər.

Müşayiətçilərə tövsiyələr

• Onkologiya şöbəsinin gözləmə zalında və ya kimyaterapiya sahəsində digər xəstələrlə söhbət edərək onları tanıya bilərsiniz. Tanış olmaq yaxşı təsir etsə də, müqayisə etməməyə diqqət edin. Unutmayın ki, süd vəzi xərçəngi diaqnozu almış heç bir insan digəri ilə tam eyni deyil.
• Öz vaxtınızı necə keçirəcəyinizdən çox xəstənizin rahatlığı üçün kömək etməyə diqqət yetirməyə çalışın.
• Gözləmə sahələrində və müalicə prosesində kimyaterapiya alan xəstələrdə ən çox görülən yan təsirlərdən biri olan ürəkbulanmanı tətikləyəcək ətir, kəskin sabun qoxusu, saç spreyi və bədən losyonundan istifadə etməyin.
• Siqaret çəkdikdən sonra paltarlara hopmuş siqaret tüstüsü ilə dərhal xəstələrin yanına gəlmək və ya elektron siqaret çəkmək də xəstələri çox narahat edə bilər. Yan təsirləri tətikləyəcək hallardan çəkinmək lazımdır.
• Xəstələri məcbur etmədən mümkün qədər sosiallaşmağa və söhbətə, gözləmə müddətlərində uzun və boş keçən vaxtları dəyərləndirməyə, bədii fəaliyyətlər etməyə təşviq edə, birlikdə oyunlar oynaya bilərsiniz.

Duyğuları üzə çıxarmağın və müsbət psixologiyaya malik olmağın əhəmiyyətinin tez-tez vurğulandığı xərçəng xəstəliyinin müalicə prosesində bu tövsiyələrin xəstələrə və yaxınlarına kömək edə biləcəyini düşünürük.