Süd vəzi xərçəngində qoltuqaltı limfa düyünlərinin tam çıxarılmasının faydaları və riskləri

The Lancet Oncology jurnalında 6 avqust 2024-cü ildə dərc edilmiş və de Boniface ilə komandasının apardığı III faza SENOMAC tədqiqatının təhlilində, süd vəzi xərçəngi olan xəstələrdə pN2-3 vəziyyətini (ən azı dörd limfa düyünündə metastaz) müəyyənləşdirmək və bununla da adyuvant (əməliyyatdan sonra qoruyucu) CDK4/6 inhibitoru müalicəsinə uyğunluğu təmin etmək üçün tamamlayıcı aksillyar limfa düyünü disseksiyasının (tALND) aparılmasının qolun fiziki funksiyasının ciddi və ya çox ciddi pozulması riskini əhəmiyyətli dərəcədə artırdığı aşkar edilib.

Tədqiqatın əhəmiyyəti 

Tamamlayıcı aksillyar limfa düyünü disseksiyası (tALND) süd vəzi xərçəngi olan xəstələrdə xərçəngin limfa düyünlərinə yayılıb-yayılmadığını müəyyənləşdirmək və xəstəliyin mərhələsini daha dəqiq təyin etmək üçün aparılır. Bu prosedur xəstənin adyuvant müalicəyə ehtiyacı olub-olmadığının müəyyənləşdirilməsində də mühüm rol oynayır.

Adyuvant müalicə əməliyyatdan sonra xərçəngin təkrarlanma riskini azaltmaq üçün tətbiq olunan əlavə müalicələrdir. Bunlara kimyaterapiya, radioterapiya, hormonal müalicə və hədəfə yönəlmiş müalicələr daxildir. Xüsusilə abemasiklib kimi CDK4/6 inhibitorları, yüksək riskli, hormon reseptoru müsbət, HER2 mənfi süd vəzi xərçəngi olan xəstələrdə istifadə üçün təsdiqlənib. Abemasiklib hüceyrə dövrünə nəzarət edən müəyyən zülalları hədəfləyərək xərçəng hüceyrələrinin böyüməsini və bölünməsini dayandırır. Bu dərmanın təsdiqlənməsi, xüsusən xəstəliksiz sağqalımı artırmaq potensialına görə böyük əhəmiyyət daşıyır. Lakin müalicə seçimində nəzərə alınmalı məqam belə cərrahi müdaxilələrin ciddi fiziki yan təsirlərə səbəb ola bilməsidir. Buna görə hər bir xəstə üçün fayda–risk balansı diqqətlə qiymətləndirilməlidir.

Tədqiqatın təfərrüatları

Bu tədqiqat beş Avropa ölkəsindəki mərkəzlərdə təsadüfi bölgü ilə tALND və ya yalnız sentinel limfa düyünü biopsiyası aparılmış xəstələrin daxil olduğu SENOMAC sınağının bir altqrupuna aid məlumatları əhatə edir.

Sentinel limfa düyünü biopsiyası süd vəzi xərçəngi əməliyyatı zamanı xərçəngin yayıla biləcəyi ilk bir-iki limfa düyününün çıxarılaraq müayinə edilməsidir. Bu üsul aksillyar limfa düyünü disseksiyası kimi daha geniş cərrahi prosedurlara ehtiyac olmadan xərçəngin yayılıb-yayılmadığını müəyyənləşdirməyə kömək edir.

SENOMAC sınağının altqrupu şiş ölçüsü ≤ 5 cm olan, estrogen reseptoru müsbət, HER2-mənfi, T1-2, histoloji dərəcəsi 1 ilə 2 arasında olan süd vəzi xərçəngi xəstələrindən ibarət idi. Bu xəstələr dörd və ya daha çox limfa düyünündə metastaz aşkar edildikdə adyuvant abemasiklib müalicəsinə göstərişi olan monarchE tədqiqatındakı bir xəstə qrupu ilə uyğunlaşdırılıb.

Tədqiqatın əsas məqsədi monarchE kohortundan əldə edilən invaziv xəstəliksiz sağqalım hadisələri barədə məlumatlardan istifadə etməklə, 5 il ərzində bir invaziv xəstəliksiz sağqalım hadisəsinin qarşısını almaq üçün 2 illik adyuvant abemasiklib müalicəsi veriləcək xəstələr arasında əməliyyatdan 1 il sonra xəstənin öz bildirişinə əsasən qolun fiziki funksiyasının ciddi və ya çox ciddi pozulması inkişaf edənlərin sayını müəyyənləşdirmək idi.

İnvaziv xəstəliksiz sağqalım xəstənin müalicədən sonra xərçəng bədənin digər nahiyələrinə yayılmadan yaşadığı müddəti ifadə edir.

Nəticələr

SENOMAC qrupunda anketlərə cavab verən 1342 xəstə arasında, median 45,2 aylıq izləmədən sonra, tALND aparılmış 634 xəstənin 84-də (13%) qolun fiziki funksiyasının ciddi və ya çox ciddi pozulması bildirildiyi halda, yalnız sentinel limfa düyünü biopsiyası aparılmış 708 xəstənin 30-da (4%) bu vəziyyət müşahidə olunub (P < 0,0001).

monarchE tədqiqatından əldə edilən məlumatlara görə, 5 il ərzində bir invaziv xəstəliksiz sağqalım hadisəsinin qarşısını almaq üçün 104 xəstəyə tamamlayıcı aksillyar limfa düyünü disseksiyası (tALND) aparılmalıdır. Lakin bu 104 xəstədən 9-nun əməliyyatdan bir il sonra qolun fiziki funksiyasının ciddi və ya çox ciddi pozulması ilə üzləşmək riski daşıdığı proqnozlaşdırılıb.

Şərh

Abemasiklib müalicəsinə uyğunluğu müəyyənləşdirmək və 5 il ərzində invaziv xəstəliksiz sağqalım hadisələrinin qarşısını almaq üçün tALND aparılması qolla bağlı ciddi və ya çox ciddi yan təsirlər riski daşıyır. Buna görə bu məqsədlə tALND aparılması təşviq edilməməlidir.

Bu tədqiqat aşağı riskli süd vəzi xərçənginin müalicəsində tALND-nin risklərinin faydalarından üstün olduğunu vurğulayır və müalicə seçimində daha az invaziv üsullara üstünlük verilməsini tövsiyə edir.

*

• Əlaqəli mövzu: Qoltuqaltı limfa düyünlərinin hamısını çıxarmaq vacibdirmi? Süd vəzi xərçəngində yeni yanaşmalar