Yalnız normal templi gəzinti belə ömrü nəzərəçarpacaq uzadır

İdmanın faydalarına tez-tez toxunuruq. Qaçış, velosiped və ya əzələ gücləndirici məşqləri fərqli yazılarımızda müzakirə edirik. Bunların faydaları şübhəsiz gözardı edilə bilməz; lakin yaxşı xəbər budur ki, belə məşqlər çətin gələndə yalnız normal templi gəzinti belə həm sağlamlığımıza, həm də yaşadığımız illərə töhfə verə bilər.

American Journal of Preventive Medicinedə oktyabr 2017-ci ildə dərc edilmiş tədqiqata görə normal templi gəzinti müntəzəm olduqda tövsiyə edilən məşqlərdən aşağı aktivlik olsa belə, hərəkətsizliyə bağlı erkən ölümlərin qarşısını ala bilər. Yəni intensiv və təlim tələb edən ağır idman və ya pul xərclənən zallara getmək əvəzinə yalnız gəzintiyə çıxmağın belə sağlamlığa çox mühüm faydaları var.

Müxtəlif mənbələr həftədə ən azı 150 dəqiqə orta intensivlikli fiziki aktivlik lazım olduğunu bildirir. Lakin yeni tədqiqatda həftəlik normal templi 120 dəqiqəlik gəzintinin belə ömür müddəti üçün çox mühüm olduğu deyilir. Bu araşdırmaya görə normal addımlarınızdan artığı gözlənilmir. Vacib olan müntəzəm və ən azı 20 dəqiqə kimi müddətdə gəzməkdir.

Normal templi gəzinti heç hərəkət etməməkdən daha əhəmiyyətlidir

Gəzinti ən gözəl fiziki fəaliyyətlərdəndir və ürək xəstəliyi, diabet və süd vəzi xərçənginin aşağı riski ilə əlaqəlidir.

Sorğu üsulu ilə aparılmış bu tədqiqatda 62 min kişi və 77 min qadın iştirak etdi və 1999 ilə 2013-cü illər arasında istənilən səbəbdən ölümlərə baxıldı.

Ən diqqətçəkən nəticəyə görə həftədə 2 saata yaxın gəzinti belə ölüm göstəricilərində mühüm və klinik baxımdan əhəmiyyətli fayda təmin etmişdir (təxminən %20).

Tədqiqatçılara görə hərəkətsizlik sağlamlıq üçün ən pis vərdişlərdəndir, lakin yalnız gəzmək belə sağlamlığınıza mühüm töhfə verə bilər.

Nəticə olaraq idman edə bilmədiyinizə və ya bəzi xəstəliklərə görə məşq edə bilmədiyinizə narahat olmayın; sadəcə bacardığınız qədər gəzərək sağlam illərinizi uzada bilərsiniz.

Aşağıda 2015-ci ildə JAMA-da dərc edilmiş tədqiqatın nəticələrini ümumiləşdirən infoqrafika görə bilərsiniz. Bu işdə də gəzintinin qaçış qədər effektiv şəkildə ölüm (mortalite) riskini azaltdığı aşkarlanmışdır.