4. სტადიის თირკმლის კიბოს დროს ოპერაცია გადარჩენადობას არ ზრდის

მეტასტაზური (4. სტადიის) ნათელუჯრედოვანი თირკმლის კიბოს მქონე პაციენტებში თირკმლის ამოკვეთა საერთო გადარჩენადობას არ აუმჯობესებს. ეს აჩვენა JAMA Network Open ჟურნალში 2022 წლის 16 მაისს გამოქვეყნებულმა კვლევამ, რომელმაც დაახლოებით 13 ათასი პაციენტი მოიცვა... თირკმლის კიბოსთვის არსებობს სისტემური მკურნალობის ახალი და უფრო ეფექტიანი ვარიანტები.

ონკოლოგიის ერთ-ერთი ზოგადი წესის მიხედვით, ცნობილია, რომ როდესაც კიბო 4. სტადიას აღწევს, ანუ სხვა ორგანოებსა და ქსოვილებში ვრცელდება, ოპერაცია სარგებელს აღარ იძლევა. ზოგიერთი კიბოს შემთხვევაში არსებობს სუსტი მტკიცებულებები, რომ ძირითადი სიმსივნის ქირურგიული ამოკვეთა 4. სტადიაშიც შეიძლება სასარგებლო იყოს; ერთ-ერთი ასეთი კიბო თირკმლის კიბოც იყო. სტატიაში განხილულ კვლევაში გაუზომავი ცვლადებით გამოწვეული მიკერძოების შესასწორებლად „ინსტრუმენტული ცვლადების ანალიზი“ გამოიყენეს და წინა დაკვირვებითი მონაცემების ნაკრებებიდან მიღებულ მიგნებებს საწინააღმდეგო შედეგები მიიღეს.

კვლევის 12766 პაციენტს შორის ასაკის მედიანა 63 იყო, 68% მამაკაცი და 88% თეთრკანიანი იყო. შემდგომმა ანალიზმა თირკმლის ამოკვეთასა და საერთო გადარჩენადობას შორის კავშირი ვერ აჩვენა (HR, 0,92; 95% სანდოობის ინტერვალი, 0,78-1,09).

ძველ მონაცემებთან შედარებით ეს შეუსაბამობა, სავარაუდოდ, ასახავს იმ ფაქტს, რომ თირკმლის კიბოს შორს წასულ სტადიაში სიმსივნური ტვირთის შესამცირებელი ოპერაციის, „ციტორედუქციული ნეფრექტომიის“, ჩატარებისთვის ვარგისიანობას ძირითადად ისეთი ფაქტორები განსაზღვრავს, რომლებიც გაზომილი არ არის ან დაკვირვებითი მონაცემების ნაკრებებში არ მოიპოვება.

მეტასტაზური ნათელუჯრედოვანი თირკმლის კიბოს მქონე პაციენტებში, რომელთა დაავადებაც ცუდი რისკის კატეგორიას არ მიეკუთვნებოდა, ათწლეულების განმავლობაში საწყის სტანდარტულ მიდგომას ციტორედუქციული ნეფრექტომია წარმოადგენდა. ტიროზინკინაზის დამთრგუნველი მიზნობრივი პრეპარატების ადრეულ პერიოდში ჩატარებული რამდენიმე დიდი დაკვირვებითი კვლევა აჩვენებდა, რომ ციტორედუქციული ნეფრექტომია საერთო გადარჩენადობის მნიშვნელოვან სარგებელს კვლავ იძლეოდა. თუმცა ამ კვლევებში ოპერაციისთვის შესაფერისი პაციენტების შერჩევით გამოწვეული მიკერძოება გათვალისწინებული არ იყო.

ახალ კვლევაში მეცნიერებმა კიბოს ეროვნული მონაცემთა ბაზიდან ნათელუჯრედოვანი თირკმლის კიბოს 12766 შემთხვევა შეარჩიეს. ეს ბაზა აშშ-ში 2006 წლის 1 იანვრიდან 2016 წლის 31 დეკემბრამდე დიაგნოსტირებული კიბოს შემთხვევების 70%-ზე მეტს მოიცავდა. მათ ინსტრუმენტული ცვლადების ანალიზით შეაფასეს ციტორედუქციული ნეფრექტომიის გავლენა საერთო გადარჩენადობაზე მეტასტაზური ნათელუჯრედოვანი თირკმლის კიბოს მქონე პაციენტებში და ის შერჩევითი მიკერძოების ტრადიციული კორექტირებით მიღებულ შედეგებს შეადარეს.

ინსტრუმენტული ცვლადები დაკვირვებით კვლევებში დამაბნეველი ფაქტორებისა და გაზომვის შეცდომის გასაკონტროლებლად გამოიყენება. ამ კვლევაში მკურნალობის ცენტრამდე გაზრდილი მანძილი მნიშვნელოვანი ინსტრუმენტული ცვლადი იყო (P < 0,001). საავადმყოფომდე მანძილის ზრდასთან ერთად ციტორედუქციული ნეფრექტომიის მიმღები პაციენტების წილიც იზრდებოდა. სავარაუდოდ, პაციენტებს, საავადმყოფოში უფრო იშვიათად მისასვლელად, ხშირი ვიზიტების მომთხოვნი სისტემური მკურნალობის ნაცვლად უფრო რადიკალური არჩევანი – ოპერაცია – სურდათ.

თუმცა კვლევაში ინსტრუმენტული ცვლადების ანალიზმა უახლეს მტკიცებულებებთან თანხვედრით აჩვენა, რომ მეტასტაზური ნათელუჯრედოვანი თირკმლის კიბოს მქონე პაციენტებში ციტორედუქციული ნეფრექტომია საერთო გადარჩენადობის გაუმჯობესებასთან დაკავშირებული არ იყო.

2016 წლის შემდეგ

უნდა გვახსოვდეს ისიც, რომ ამ კვლევაში არ გაზომილა გადარჩენადობაში იმ ახალი წამლების წვლილი, რომლებიც თირკმლის კიბოსთვის 2016 წლის შემდეგ დამტკიცდა. ამ ახალმა მკურნალობებმა თირკმლის კიბოს შორს წასულ სტადიაში გადარჩენადობის მაჩვენებლები 10 წლის წინანდელთან შედარებით მნიშვნელოვნად გააუმჯობესა, რამაც სისტემური წამლების ადგილი პირველი ხაზის მკურნალობად განამტკიცა.

*

გარე შინაარსის სანახავად მართეთ პარამეტრები