ღვიძლის კიბოს სამკურნალოდ კაბოზანტინიბმა FDA-ს დამტკიცება მიიღო

14 იანვარს, 2019 წელს აშშ-ის სურსათისა და წამლების ადმინისტრაციამ (FDA) მანამდე სორაფენიბის (Nexavar) მიმღები ჰეპატოცელულური კიბოს (ღვიძლის კიბოს) პაციენტების სამკურნალოდ კაბოზანტინიბი (Cabometyx) დაამტკიცა.

დამტკიცება ეფუძნება CELESTIAL-ის სახელით ჩატარებულ, 2-ისა და 1-ის თანაფარდობით რანდომიზებულ, ორმაგად ბრმა, პლაცებოთი კონტროლირებად მრავალცენტრულ კლინიკურ კვლევას. ჩართულ, მანამდე სორაფენიბის მიმღებ ღვიძლის კიბოს პაციენტთაგან 470-ს დღეში 1-ჯერ 60 mg კაბოზანტინიბი პერორალური ტაბლეტით მიეცა, 237 პაციენტს კი პლაცებო. მკურნალობა დაავადების პროგრესირებამდე ან მიუღებელ ტოქსიკურობამდე (გვერდით მოვლენამდე) გაგრძელდა.

ქვემოთ მოცემულ ინფოგრაფიკაში შეგიძლიათ ნახოთ შორსწასული ღვიძლის კიბოს დამტკიცებული მკურნალობები და მათი შედარება:

CELESTIAL კვლევის შედეგების თანახმად:

• საერთო გადარჩენის მედიანა კაბოზანტინიბის მიმღებებში 10.2 თვე, პლაცებოს მიმღებებში კი 8 თვე იყო,
• პროგრესირების გარეშე გადარჩენა (მკურნალობით დაავადების კონტროლის ხანგრძლივობა) კაბოზანტინიბის ჯგუფში მედიანურად 5.2 თვე იყო, პლაცებოს ჯგუფში კი 1.9 თვე,
• კაბოზანტინიბმა პლაცებოსთან შედარებით სიკვდილის რისკი %24-ით შეამცირა,
• მკურნალობაზე ობიექტური პასუხი %4 იყო %0,4-ის წინააღმდეგ,
• მძიმე (3. და 4. ხარისხის) გვერდითი მოვლენები კაბოზანტინიბის მიმღებთა %68-ში და პლაცებოს მიმღებთა %36-ში გამოვლინდა.
• კაბოზანტინიბთან ყველაზე ხშირად დაფიქსირებული გვერდითი მოვლენები იყო პალმარულ-პლანტარული ერითროდიზესთეზია (ხელებსა და ფეხებზე გამონაყარი), ჰიპერტენზია, სისხლში AST-ის მატება, დაღლილობა და დიარეა. რეკომენდებულია დღეში ერთხელ, საკვებამდე სულ მცირე 1 საათით ადრე ან 2 საათის შემდეგ 60 mg კაბოზანტინიბი.

შენიშვნა: კაბოზანტინიბის მოქმედი ნივთიერების შემცველი Cabometyx 2016 და 2017 წლებში თირკმლის კიბოსთვის დამტკიცდა; იმავე ნივთიერების შემცველმა Cometriq-მა კი 2012 წელს მედულარული ფარისებრი ჯირკვლის კიბოსთვის FDA-ს დამტკიცება მიიღო.

როგორია კაბოზანტინიბის მოქმედების მექანიზმი?

კაბოზანტინიბი უჯრედის ზრდასა და გამრავლებას შემდეგი ტიროზინკინაზების დათრგუნვით აფერხებს: სიმსივნის კვებისთვის ახალი სისხლძარღვების წარმოქმნაში მონაწილე VEGFR 1, 2, და 3; MET და AXL. ცნობილია, რომ უჯრედის ზრდის ამ გზებს როლი აქვს ღვიძლის კიბოს პროგრესირებასა და შორსწასული ღვიძლის კიბოს პირველი ხაზის სტანდარტული მკურნალობის, სორაფენიბის (Nexavar), მიმართ რეზისტენტობის განვითარებაში.