ქოლანგიოკარცინომაში (სანაღვლე გზების კიბო) FGFR2-ზე მიმართული 2. პრეპარატი FDA-მ დაამტკიცა: infigratinib
ამ სტატიაში
ადრე ნამკურნალები, სიმსივნის რეგიონული გავრცელების გამო უოპერაციო ან მეტასტაზური ქოლანგიოკარცინომის (სანაღვლე გზების კიბოს) და ფიბრობლასტური ზრდის ფაქტორის რეცეპტორ 2-ის (FGFR2) გენეტიკური ცვლილების მქონე ზრდასრულებისთვის კინაზის ინჰიბიტორ infigratinib-ს (Truseltiq, QED Therapeutics, Inc.) 2021 წლის 28 მაისს FDA-მ (აშშ-ის სურსათისა და წამლის ადმინისტრაციამ) დაჩქარებული დამტკიცება მიანიჭა.
Infigratinib გახდა FGFR2-მუტაციადადებითი ქოლანგიოკარცინომისთვის FDA-ს მიერ დამტკიცებული 2. პრეპარატი. მანამდე pemigatinib-მა, FDA-ს დამტკიცება 2020 წლის 17 აპრილს მიიღო.
FDA-მ ასევე FGFR2 გენური შერწყმის ან სხვა გადაჯგუფების მქონე პაციენტების შესარჩევად FoundationOne® CDx (Foundation Medicine, Inc.) infigratinib-ით მკურნალობის თანმხლებ გენეტიკურ ტესტად დაამტკიცა.
განახლება: FDA-მ დამტკიცება გაიწვია (21.05.2024)
FDA-მ განაცხადა, რომ გაიწვია infigratinib-ის (Truseltiq) დაჩქარებული დამტკიცება, რომელიც 2021 წელს ადრე ნამკურნალები ქოლანგიოკარცინომის გარკვეული ტიპის პაციენტებისთვის გაიცა.
Infigratinib თავდაპირველად 2021 წლის მაისში დაჩქარებულად დამტკიცდა უოპერაციო ადგილობრივად შორსწასული ან მეტასტაზური ქოლანგიოკარცინომისა და ფიბრობლასტური ზრდის ფაქტორის რეცეპტორ 2-ის (FGFR2) შერწყმის ან სხვა გადაჯგუფების მქონე ზრდასრულებისთვის. დამტკიცების პირობა იყო, მწარმოებელ QED Therapeutics, Inc.-ს დამადასტურებელი კვლევებით კლინიკური სარგებელი დაემტკიცებინა.
დამტკიცება სპონსორის მოთხოვნით ნებაყოფლობით გაიწვია. FDA-ს განახლებით, ამის მიზეზი იყო „აუცილებელი დამადასტურებელი კლინიკური კვლევისთვის მონაწილეთა მოზიდვისა და ჩარიცხვის სირთულეები“. დამადასტურებელი კვლევა ახალი ჩვენებით პრეპარატის პირველი ხაზის ეფექტიანობას სწავლობდა. მოზიდვისა და ჩარიცხვის სირთულეების გამო QED-მ დაასკვნა, რომ ქოლანგიოკარცინომის მეორე ხაზში (დაჩქარებული დამტკიცების ჩვენება) პრეპარატის განაწილება „კომერციულად გონივრული არ იყო“. თუმცა QED-ის თქმით, პრეპარატის სხვა FGFR-ზე ორიენტირებულ მდგომარეობებში შესწავლა გრძელდება.
ქვემოთ ჩანს სანაღვლე გზების კიბოების კლასიფიკაცია ანატომიური მდებარეობის მიხედვით.
მამოძრავებელი მუტაციები ქოლანგიოკარცინომაში
ქოლანგიოკარცინომისმართვა სწრაფად იცვლება ზუსტი მედიკამენტური მკურნალობის ახალი სტრატეგიებით. ამ კიბოში კვლევების უმეტესობა ინტრაჰეპატური ქოლანგიოკარცინომის (ღვიძლშიდა სანაღვლე გზების კიბოს) პაციენტთა დაახლოებით 40%-შიაღმოჩენილ ფიბრობლასტური ზრდის ფაქტორის რეცეპტორ-2-ის (FGFR2) შერწყმებისა და იზოციტრატდეჰიდროგენაზა-1-ის (IDH1) მუტაციების მქონეებზეა ფოკუსირებული.
ქვემოთ მოკლედ არის წარმოდგენილი ქოლანგიოკარცინომების კლინიკური და გენეტიკური მახასიათებლები.
FDA-ს დამტკიცება CBGJ398X2204 კვლევით
Infigratinib-ის ეფექტიანობა ნაჩვენებია CBGJ398X2204-ში (NCT02150967), მულტიცენტრულ ღია ერთჯგუფიან კვლევაში, რომელიც FGFR2-ის შერწყმის ან გადაჯგუფების მქონე, ადრე ნამკურნალებ, არარეზექტაბელურ ადგილობრივად შორსწასულ ან მეტასტაზურ ქოლანგიოკარცინომის 108 პაციენტს მოიცავდა.
პაციენტები ზედიზედ 21 დღე დღეში ერთხელ 125 mg infigratinib-ს იღებდნენ, შემდეგ კი მკურნალობას 7 დღით წყვეტდნენ. ამგვარად თითოეული 28-დღიანი ციკლი 1 კურსად ითვლებოდა და მკურნალობა დაავადების პროგრესირებამდე ან მიუღებელ ტოქსიკურობამდე გრძელდებოდა.
შედეგები
ეფექტიანობის ძირითადი მაჩვენებლები იყო საერთო პასუხის სიხშირე და პასუხის ხანგრძლივობა, განსაზღვრული ბრმა დამოუკიდებელი ცენტრალური შეფასებით RECIST 1.1-ის მიხედვით.
- Infigratinib-ის საერთო პასუხის სიხშირე 23% იყო, 1 სრული და 24 ნაწილობრივი პასუხით (95% GA: 16, 32).
- პასუხის მედიანური ხანგრძლივობა 5 თვე იყო (95% GA: 3,7, 9,3).
- პასუხის მქონე 23 პაციენტიდან 8-მ პასუხი 6 თვე ან მეტხანს შეინარჩუნა.
ყველაზე ხშირი (სიხშირე ≥ 20%) გვერდითი მოვლენებია ჰიპერფოსფატემია, კრეატინინის მატება, ფრჩხილების ტოქსიკურობა, სტომატიტი, თვალის სიმშრალე, დაღლილობა, ალოპეცია, ხელისგულ-ტერფის ერითროდიზესთეზიის სინდრომი, ართრალგია, დისგევზია, ყაბზობა, მუცლის ტკივილი, პირის სიმშრალე, წამწამების ცვლილება, დიარეა, კანის სიმშრალე, მადის დაქვეითება, მხედველობის დაბინდვა და ღებინება. სერიოზული რისკებია ჰიპერფოსფატემია და ბადურის პიგმენტური ეპითელიუმის ჩამოშლა; მკურნალობისას ამ არასასურველი რეაქციების მონიტორინგია რეკომენდებული.
Infigratinib-ის რეკომენდებული დოზაა125 mg დღეში ერთხელ, უზმოზე, ზედიზედ 21 დღის განმავლობაში.
*
წყაროები
ეს სტატია სასარგებლო იყო თქვენთვის?
თქვენი გამოხმაურება გვეხმარება შინაარსის გაუმჯობესებაში.
მკითხველთა კომენტარები
გაგვიზიარეთ თქვენი კომენტარი
თქვენი სახელი და კომენტარი მხოლოდ ადმინისტრატორის დამტკიცების შემდეგ გამოქვეყნდება. ელფოსტის მისამართი ვიზიტორებს არასოდეს ეჩვენებათ.
პირველმა დაწერეთ კომენტარი.