ოლაპარიბმა პლუს ბევაციზუმაბმა საკვერცხის, ფალოპის მილისა და პირველადი პერიტონეული კიბოს შემანარჩუნებელი მკურნალობისთვის FDA-ს დამტკიცება მიიღო

8 მაისს 2020 წელს აშშ-ის სურსათისა და წამლის ადმინისტრაციამ (FDA) ოლაპარიბი (Lynparza), ტაბლეტის სახით პერორალურად მისაღები გენეტიკურად მიზნობრივი პრეპარატი, ბევაციზუმაბთან კომბინაციაში დაამტკიცა მოწინავე საკვერცხის, ფალოპის მილის ან პირველადი პერიტონეული კიბოს პირველი ხაზის შემანარჩუნებელი მკურნალობისთვის.

ორი პრეპარატის ეს კომბინაცია დამტკიცდა პაციენტებისთვის,

• რომელთაც პლატინაზე დაფუძნებულ ქიმიოთერაპიაზე სრული ან ნაწილობრივი პასუხი აქვთ და
• საზიანო ან სავარაუდოდ საზიანო BRCA მუტაციით და / ან გენომური არასტაბილურობით განსაზღვრულ ჰომოლოგიური რეკომბინაციის დეფიციტის (HDR) დადებით სტატუსთან დაკავშირებული კიბო აქვთ,

პირველი ხაზის მკურნალობის შემდეგ შემანარჩუნებელ თერაპიად. FDA-მ ასევე Myriad myChoice® CDx (Myriad Genetic Laboratories, Inc.) ტესტი დაამტკიცა ოლაპარიბის გამოსაყენებლად HDR სტატუსის დიაგნოსტიკისთვის.

PAOLA-1 კვლევა

ახალი კომბინაციის ეფექტიანობა შეისწავლეს მოწინავე, მაღალი ხარისხის ეპითელური საკვერცხის, ფალოპის მილისა და პერიტონეული კიბოს დროს პირველი ხაზის პლატინაზე დაფუძნებული ქიმიოთერაპიისა და ბევაციზუმაბის შემდეგ, ოლაპარიბი პლუს ბევაციზუმაბის და პლაცებო პლუს ბევაციზუმაბისშედარებით, რანდომიზებულ, ორმაგად ბრმა, პლაცებოთი კონტროლირებულ მრავალცენტრულ PAOLA-1 კვლევაში.

რანდომიზაცია პირველი ხაზის მკურნალობის შედეგისა და ტესტით დადგენილი სიმსივნის BRCA მუტაციის (tBRCAm) სტატუსით სტრატიფიცირდა. ყველა ხელმისაწვდომი კლინიკური ნიმუში რეტროსპექტიულად Myriad myChoice® CDX ტესტით შეამოწმეს. პაციენტები 2:1 თანაფარდობით გაიყვნენ:

• 537 პაციენტი — ოლაპარიბის ტაბლეტი დღეში 2-ჯერ 300 mg პლუს ბევაციზუმაბი 15 mg/kg ყოველ სამ კვირაში,
• 269 პაციენტი — პლაცებო პლუს ბევაციზუმაბი.

პაციენტები ოლაპარიბს ბოლო ქიმიოთერაპიიდან სულ მცირე 3 და არაუმეტეს 9 კვირის შემდეგ იწყებდნენ. ოლაპარიბი გრძელდებოდა 2 წლამდე, ან დაავადების პროგრესირებამდე, ან მიუღებელ გვერდით ეფექტამდე.

შედეგები

ეფექტიანობის მთავარი საბოლოო წერტილი მკვლევრის მიერ შეფასებული პროგრესირების გარეშე გადარჩენა (PFS)იყო. დამატებითი საბოლოო წერტილი საერთო გადარჩენა იყო.

HRD-დადებითი სიმსივნის მქონე 387 პაციენტის ქვეჯგუფში მედიანური PFS ბევაციზუმაბი პლუს ოლაპარიბის ჯგუფში 37.2 თვე, პლაცებო პლუს ბევაციზუმაბისას კი 17.7 თვე იყო (HR 0.33; 95% სარწმუნოობის ინტერვალი: 0.25-0.45).

ოლაპარიბისა და ბევაციზუმაბის ყველაზე ხშირი (პაციენტების ≥10%) გვერდითი ეფექტები არის გულისრევა, დაღლილობა (ასთენიის ჩათვლით), ანემია, ლიმფოპენია, ღებინება, დიარეა, ნეიტროპენია, ლეიკოპენია, საშარდე გზების ინფექცია და თავის ტკივილი.

ოლაპარიბის რეკომენდებული დოზაარის დღეში ორჯერ 300 mg, საკვებთან ან მის გარეშე. მასთან ერთად ბევაციზუმაბის რეკომენდებული დოზაა ყოველ სამ კვირაში ინტრავენურად 15 mg/kg. * - საკვერცხის კიბოს მკურნალობის თანამედროვე მდგომარეობა *