შორსწასული ეპითელიოიდური სარკომისთვის ტაზემოსტატმა FDA-ს დამტკიცება მიიღო

23 იანვარს, 2020 წელს აშშ-ის სურსათისა და წამლის სააგენტომ (FDA), 16 წელზე უფროსი, სრული ქირურგიული რეზექციისთვის შეუფერებელი, მეტასტაზური ან ადგილობრივად გავრცელებული ეპითელიოიდური სარკომის მქონეთა მკურნალობისთვის ტაზემეტოსტატს (Tazverik) დაჩქარებული დამტკიცება მისცა.

ტაზემეტოსტატის ეფექტიანობა ჰისტოლოგიურად დადასტურებული მეტასტაზური ან ადგილობრივად გავრცელებული ეპითელიოიდური სარკომის მქონეებში მრავალცენტრული EZH-202 კვლევის ერთჯგუფიან კოჰორტაში (კოჰორტა 5) შეისწავლეს. სიმსივნეში საჭირო იყო გენეტიკური მუტაციის, INI1-ის დაკარგვის (INI1-უარყოფითობის) დადასტურება და ზოგადი ფუნქციური მდგომარეობის ქულა 0-2 უნდა ყოფილიყო.

პაციენტები პროგრესირებამდე ან მიუღებელ გვერდით მოვლენამდე დღეში ორჯერ 800 mg ტაზემეტოსტატს იღებდნენ. ეფექტიანობის მთავარი საზომები იყო პასუხის ხანგრძლივობა და შესაბამისი საერთო პასუხის მაჩვენებელი .

• კოჰორტა 5-ის 62 პაციენტში საერთო პასუხი % 15 იყო: % 1.6 სრული და % 13 ნაწილობრივი.
• მოპასუხეთა % 67-ს 6-თვიანი ან უფრო ხანგრძლივი პასუხი ჰქონდა.

ყველაზე ხშირი (სიხშირე ≥ 20) გვერდითი მოვლენები იყო ტკივილი, სისუსტე, გულისრევა, მადის დაქვეითება, ღებინება და შეკრულობა.

ტაზემეტოსტატის რეკომენდებული დოზაა, დღეში ორჯერ საკვებთან ან მის გარეშე 800 mg.

*

ეს „დაჩქარებული დამტკიცება“ საერთო პასუხსა და მის ხანგრძლივობას ეფუძნება. მუდმივი დამტკიცება შესაძლოა დამადასტურებელ კვლევაში კლინიკური სარგებლის დადასტურებასა და განსაზღვრაზე იყოს დამოკიდებული. FDA-მ ტაზემეტოსტატს „ობოლი წამლის“ სტატუსი მისცა.

*

რა არის ეპითელიოიდური სარკომა?

რბილი ქსოვილების ყველაზე ხშირი სამი სარკომაა ავთვისებიანი ფიბროზული ჰისტიოციტომა (პლეომორფული სარკომა), რაბდომიოსარკომა და ლიპოსარკომა. მათ შემდეგ უფრო იშვიათი ტიპებიცაა: ეპითელიოიდური სარკომა, სინოვიური სარკომა, მყესის ნათელუჯრედოვანი სარკომა და ალვეოლური რბილი ნაწილის სარკომა.

ჩვეულებრივ ნელა მიმდინარე ამ იშვიათ სარკომებს ხშირად გვიან ადგენენ. საერთო ნიშანია შორეულ ორგანოებში მეტასტაზირების მაღალი ალბათობაც. მაგნიტურ-რეზონანსული გამოსახულება (MRG), დიაგნოსტიკის, სტადირების, ქირურგიული დაგეგმვისა და შემდგომი დაკვირვების მთავარი გამოსახულებითი მეთოდია. საბოლოო დიაგნოზი ჰისტოპათოლოგიას ეფუძნება, თუმცა იმუნორეაქტიული ნიშნები და INI1-ის დაკარგვის მსგავსი გენეტიკური დარღვევებიც გზამკვლევია.

ეპითელიოიდური სარკომის შემთხვევების უმეტესობა კიდურების (მკლავებისა და ფეხების) კანისქვეშა რბილ ქსოვილში იწყება; თუმცა სხვაგანაც შეიძლება წარმოიშვას.

სხვა რბილქსოვილოვანი სარკომების მსგავსად ფართო ან რადიკალური ოპერაცია მკურნალობის საფუძველია. ხშირად ემატება ოპერაციამდელი ან შემდგომი დასხივება, ზოგჯერ — სისტემური ქიმიოთერაპია. კონკრეტული ანატომიური მდებარეობა, ოპერაციის შემდგომი რეციდივი და შორეული მეტასტაზები ცუდ პროგნოზზე მიუთითებს.

როგორია ტაზემეტოსტატის მოქმედების მექანიზმი?

ტაზემეტოსტატი გენების ექსპრესიას ეპიგენეტიკური მექანიზმებით მარეგულირებელი კიბოს პრეპარატია. EZH2 გენის გამააქტიურებელი მუტაციები სხვადასხვა კიბოს გამომწვევად გამოვლინდა. იგი ძლიერი შერჩევითი EZH2 ინჰიბიტორია და მცირე მოლეკულების კლასის პერორალური პრეპარატია. ბლოკავს კიბოს უჯრედის ზრდის შესაძლო ხელშემწყობ EZH2 მეთილტრანსფერაზას.