შორსწასული კიბოების დროს ნემვალეუკინ ალფა პემბროლიზუმაბთან კომბინაციაში ან ცალკე

ASCO 2022 შეხვედრაზე Vaishampayan-ისა და მისი გუნდის მიერ წარმოდგენილი ARTISTRY-1 კვლევიდან მიღებული პირველი შედეგებით, ექსპერიმენტულმა პრეპარატმა, სახელწოდებით ნემვალეუკინ ალფა, ცალკე ან პემბროლიზუმაბთან კომბინაციაში გამოყენებისას რამდენიმე ტიპის შორსწასული კიბოს მკურნალობაში ზოგიერთ პაციენტთან მნიშვნელოვანი ეფექტიანობა აჩვენა.

ნემვალეუკინ ალფა არის იმუნური სისტემის გამააქტიურებელი ცილის, სახელწოდებით ინტერლეიკინ-2, სინთეზური და ახალი ვერსია. ნემვალეუკინ ალფა იმუნური სისტემის უჯრედებზე ინტერლეიკინ-2-ის რეცეპტორს უკავშირდება, რაც CD8+ T უჯრედებისა და ბუნებრივი მკვლელი (NK) უჯრედების მუშაობას ააქტიურებს.

ინტერლეიკინ-2 არასპეციფიკურ იმუნოთერაპიად კლასიფიცირდება. მაღალი დოზის ინტერლეიკინ-2 FDA-მ (აშშ-ის სურსათისა და მედიკამენტების ადმინისტრაციამ) იმუნური საკონტროლო წერტილების ინჰიბიტორებამდე დიდი ხნით ადრე დაამტკიცა: 1992 წელს — მეტასტაზური თირკმელუჯრედოვანი კარცინომის, 1998 წელს კი — მეტასტაზური მელანომის სამკურნალოდ.

ამჟამად არსებული მკურნალობა ყველა პაციენტში არ მოქმედებს და იმუნოთერაპიის ახალი თაობები და კომბინაციები განსაკუთრებით საჭიროა იმ პაციენტებისთვის, რომელთა კიბოც სტანდარტული მკურნალობის შემდეგ განმეორდა და/ან მეტასტაზები წარმოქმნა.

კვლევის დეტალები

I/II ფაზის ARTISTRY კვლევის შედეგებმა აჩვენა, რომ ინექციების სახით გამოყენებულმა ნემვალეუკინ ალფამ სულ მცირე 6 თვის განმავლობაში შეაჩერა სიმსივნის ზრდა ან გარკვეული შემცირება გამოიწვია შორსწასული თირკმელუჯრედოვანი კარცინომის (თირკმლის კიბოს) მქონე 22 მამაკაცისა და ქალიდან 4-ში (18%), რომელთა კიბოც ადრე მიღებული იმუნოთერაპიის შემდეგ პროგრესირებდა. აგრეთვე, აგრესიული კანის კიბოს — მელანომის — სხვადასხვა ფორმის მქონე 46 პაციენტიდან 4-ში (8%) სიმსივნის გარკვეული შემცირება აღინიშნა. გვერდითი მოვლენები მინიმალური იყო, მიუხედავად იმისა, რომ ზოგიერთ პაციენტს შემცივნება-კანკალი და ანემია (სისხლნაკლებობა) განუვითარდა.

კვლევის მონაცემებმა ასევე აჩვენა, რომ ნემვალეუკინ ალფამ კიბოს საწინააღმდეგო აქტივობა პემბროლიზუმაბთან კომბინაციაშიც დაადასტურა. მკვლევრებმა აღმოაჩინეს, რომ პრეპარატების კომბინაციამ CD8+ T უჯრედებისა და ბუნებრივი მკვლელი უჯრედების წარმოქმნის 10-ჯერ ზრდა და მისი შენარჩუნება გამოიწვია. ეს შედეგი კიბოს სხვადასხვა ტიპის მქონე 137 პაციენტიდან 22-ში (16%) გამოვლინდა, ხოლო მათგან ნახევარზე მეტში (59%) კიბოს პროგრესირების სრული შეჩერებაც აღინიშნა. კიბოს საწინააღმდეგო იმუნური უჯრედების მსგავსი აქტივობა დაფიქსირდა აგრეთვე საკვერცხის კიბოს მქონე 14 ქალიდან 4-ში (28%), რომლებმაც პირველ ქიმიოთერაპიულ მკურნალობას არ უპასუხეს.

Perlmutter-ის კიბოს ცენტრის წევრმა და NYU Grossman-ის სამედიცინო სკოლის მკვლევარმა ასოცირებულმა პროფესორმა, დოქტორმა Vamsidhar Velcheti-მ კვლევის შესახებ თქვა: „ჩვენი პირველი შედეგები ადასტურებს, რომ ნემვალეუკინ ალფა რამდენიმე სხვადასხვა ტიპის კიბოს დროს ზოგადად უსაფრთხო, ასატანი და პოტენციურად ეფექტიანი მკურნალობაა. თუ მომავალი კვლევების შედეგები მის წარმატებას დაადასტურებს, ნემვალეუკინ ალფა, ცალკე ან სხვა კიბოს საწინააღმდეგო პრეპარატებთან კომბინაციაში, შეიძლება ღირებული ვარიანტი გახდეს შორსწასული კიბოს მქონე იმ ადამიანებისთვის, რომლებთანაც სხვა მკურნალობა არ მოქმედებს ან მკურნალობის არჩევანი შეზღუდულია.“

დოქტორმა Velcheti-მ, რომელიც ასევე Perlmutter-ის თორაკალური სამედიცინო ონკოლოგიის პროგრამას ხელმძღვანელობს, ხაზი გაუსვა, რომ მიმდინარე კვლევის მომავალმა შედეგებმაც მსგავსი სარგებელი უნდა დაადასტუროს, სანამ ნემვალეუკინ ალფა შორსწასული კიბოს მქონე პაციენტებისთვის სტანდარტულ მკურნალობად იქცევა.

ARTISTRY-1-ის ადრინდელი შედეგების ნაწილის საფუძველზე, ნემვალეუკინ ალფას FDA (აშშ-ის სურსათისა და მედიკამენტების ადმინისტრაცია) შორსწასული საკვერცხის კიბოს სამკურნალოდ დაჩქარებული დამტკიცების სტატუსით უკვე განიხილავს.