İrəliləmiş mərhələli xərçənglərdə pembrolizumabla birlikdə və ya təkbaşına nemvaleukin alfa

ASCO 2022 toplantısında Vaishampayan və komandası tərəfindən təqdim edilmiş ARTISTRY-1 tədqiqatının ilk nəticələri nemvaleukin alfa adlı eksperimental dərmanın təkbaşına və ya pembrolizumab ilə birlikdə istifadə edildikdə bir neçə irəliləmiş mərhələli xərçəng növünün müalicəsində bəzi xəstələrdə əhəmiyyətli effektivlik göstərdiyini ortaya qoydu.

Nemvaleukin alfa interleykin-2 adlı immun sistemini tətikləyən zülalın sintetik və yeni versiyasıdır. Nemvaleukin alfa immun sistem hüceyrələrində interleykin-2 reseptoruna bağlanır; bu da CD8+ T hüceyrələrinin və təbii öldürücü (NK) hüceyrələrin fəaliyyətini tətikləyir.

İnterleykin-2 qeyri-spesifik immunoterapiya kimi təsnif edilir. Yüksək dozalı interleykin-2 immun nəzarət nöqtəsi inhibitorlarından xeyli əvvəl, metastatik böyrək hüceyrəli karsinomanın müalicəsi üçün 1992-ci ildə, metastatik melanoma üçün isə 1998-ci ildə FDA (ABŞ Qida və Dərman İdarəsi) təsdiqi almışdı.

Hazırda mövcud müalicələr hər xəstədə təsirli olmur və xüsusilə standart müalicədən sonra xərçəngi təkrarlayan və/və ya metastaz verən xəstələr üçün immunoterapiyaların yeni nəsillərinə və kombinasiyalarına ehtiyac var.

Tədqiqatın təfərrüatları

Faza I/II ARTISTRY tədqiqatının nəticələri inyeksiya ilə verilən nemvaleukin alfa müalicəsinin əvvəllər immunoterapiya almış və xərçəngi irəliləmiş, irəliləmiş mərhələli böyrək hüceyrəli karsinoması (böyrək xərçəngi) olan 22 kişi və qadın xəstənin 4-də (18%) ən azı 6 ay şişin böyüməsini dayandırdığını və ya müəyyən kiçilmələr yaratdığını göstərdi. Həmçinin aqressiv dəri xərçəngi melanomanın müxtəlif formaları olan 46 xəstənin 4-də (8%) müəyyən şiş kiçilmələri müşahidə edildi. Bəzi xəstələrdə üşütmə-titrəmə və anemiya (qanazlığı) kimi problemlər olsa da, yan təsirlər minimal idi.

Tədqiqat nəticələri nemvaleukin alfanın pembrolizumabla birlikdə istifadə edildikdə də xərçəngə qarşı fəaliyyətini sübut etdiyini göstərdi. Tədqiqatçılar dərman kombinasiyasının CD8+ T hüceyrələrinin və təbii öldürücü hüceyrələrin istehsalını 10 dəfə artırdığını və bunun davamlı olduğunu aşkar etdilər. Bu nəticə müxtəlif xərçəng növləri olan 137 xəstənin 22-də (16%) meydana gəldiyi halda, onların yarısından çoxunda (59%) xərçəngin irəliləməsinin tam dayanması da müşahidə edildi. Xərçəngə qarşı oxşar immun hüceyrə fəaliyyəti ilk kimyaterapiyaya cavab verməmiş yumurtalıq xərçəngi olan 14 qadının 4-də (28%) də görüldü.

Perlmutter Xərçəng Mərkəzinin üzvü və NYU Grossman Tibb Məktəbindən tədqiqatçı dosent Dr. Vamsidhar Velcheti tədqiqat barədə bunları dedi: “İlk nəticələrimiz nemvaleukin alfanın bir neçə fərqli xərçəng növündə ümumilikdə təhlükəsiz, tolere edilən və potensial effektiv müalicə olduğunu sübut edir. Gələcək tədqiqatların nəticələri uğurunu sübut edərsə, nemvaleukin alfa təkbaşına və ya digər xərçəng əleyhinə dərmanlarla birlikdə başqa müalicələrin təsirli olmadığı və ya müalicə seçimləri məhdud olan irəliləmiş mərhələli xərçəngi olan insanlar üçün dəyərli seçim ola bilər.”

Həmçinin Perlmutterin Torakal Tibbi Onkologiya Proqramının rəhbəri olan Dr. Velcheti nemvaleukin alfa irəliləmiş mərhələli xərçəng xəstələrində standart müalicəyə çevrilməzdən əvvəl davam edən bu tədqiqatın gələcək nəticələrinin də oxşar faydaları sübut etməli olduğunu vurğuladı.

Nemvaleukin alfa əvvəlki ARTISTRY-1 nəticələrinin bir hissəsinə əsasən irəliləmiş mərhələli yumurtalıq xərçənginin müalicəsi üçün artıq FDA (ABŞ Qida və Dərman İdarəsi) tərəfindən sürətləndirilmiş təsdiq statusunda qiymətləndirilir.