თავისა და კისრის კიბოს პირველ ხაზში ორმაგი იმუნოთერაპია და მიღწეული შედეგები

III ფაზის „CheckMate 651“ კვლევის შედეგებმა შორსწასული თავისა და კისრის კიბოს მკურნალობაში მნიშვნელოვან კითხვას უპასუხა. კვლევაში მორეციდივე ან მეტასტაზური თავისა და კისრის ბრტყელუჯრედოვანი კიბოს პირველ ხაზში ნივოლუმაბისა და იპილიმუმაბის ორმაგი იმუნოთერაპიის კომბინაცია შეამოწმეს.

ამ მდგომარეობის მქონე პაციენტების ძველი სტანდარტული მკურნალობა EXTREME კვლევით განისაზღვრა: ცეტუქსიმაბი ცისპლატინთან ან კარბოპლატინთან და ფლუოროურაცილთან ერთად, შემდეგ კი შემანარჩუნებელი ცეტუქსიმაბი.

იმუნოთერაპიის კომბინაციის შემმოწმებელ CheckMate 651-სა და ისტორიული საკონტროლო EXTREME კვლევის შედეგებს შორის საერთო გადარჩენის მნიშვნელოვანი განსხვავება არ გამოვლინდა. ეს მიგნებები 2022 წლის 6 დეკემბერს Journal of Clinical Oncology ჟურნალში Robert I. Haddad-მა და კოლეგებმა გამოაქვეყნეს.

კვლევის მიგნებები ცალ-ცალკე იყო წარმოდგენილი ყველა პაციენტისა და PD-L1 CPS ქულით დადებითი პაციენტებისთვის. შეფასების შემდეგ მკვლევრებმა განაცხადეს: „CheckMate 651-მა ვერ მიაღწია საერთო გადარჩენის დასახულ შედეგებს არც ყველა რანდომიზებულ პაციენტში და არც CPS ≥ 20 ჯგუფში. ნივოლუმაბსა და იპილიმუმაბს EXTREME-სთან შედარებით უფრო ხელსაყრელი გვერდითი მოვლენების პროფილი ჰქონდა. თავისა და კისრის მორეციდივე ან მეტასტაზური ბრტყელუჯრედოვანი კიბოს მქონე პაციენტებისთვის ახალი მკურნალობის საჭიროება კვლავ არსებობს“.

კვლევის დეტალები

ამ ღია კვლევაში 947 პაციენტი ჩაერთო: 472 შემთხვევითი პრინციპით ნივოლუმაბის/იპილიმუმაბის, ხოლო 475 EXTREME ჯგუფში განაწილდა.

• PD-L1 CPS <1 პაციენტების რაოდენობა 92 იყო 86-ის წინააღმდეგ,
• PD-L1 CPS ≥ 1 პაციენტების რაოდენობა 355 იყო 372-ის წინააღმდეგ,
• PD-L1 CPS ≥ 20 პაციენტების რაოდენობა 185 იყო 178-ის წინააღმდეგ.

კვლევის მთავარი საბოლოო მაჩვენებლები ყველა პაციენტსა და CPS ≥ 20 ჯგუფში საერთო გადარჩენის მედიანური ხანგრძლივობა იყო.

მნიშვნელოვანი მიგნებები

ანალიზის მომენტისთვის, 2021 წლის ივნისში, დაკვირვების მინიმალური და მედიანური ხანგრძლივობები შესაბამისად 27,3 და 39,1 თვე იყო.

მთავარი საბოლოო მაჩვენებლები:

• შემთხვევითი პრინციპით განაწილებულ ყველა პაციენტს შორის საერთო გადარჩენის მედიანაში სტატისტიკური განსხვავება არ იყო: ნივოლუმაბის/იპილიმუმაბის ჯგუფში 13,9 თვე (95% სანდოობის ინტერვალი [CI] = 12,1–15,8 თვე), ხოლო EXTREME ჯგუფში 13,5 თვე იყო (95% GA = 12,6–15,2 თვე) (რისკების თანაფარდობა [HR] = 0,95, 97,9% GA = 0,80–1,13, P = ,4951).
• CPS ≥ 20 პაციენტებს შორისაც საერთო გადარჩენის მედიანაში სტატისტიკური განსხვავება არ იყო: ნივოლუმაბის/იპილიმუმაბის ჯგუფში 17,6 თვე (95% GA = 13,8–22,0 თვე), ხოლო EXTREME ჯგუფში 14,6 თვე იყო (95% GA = 12,3–16,0 თვე) (HR = 0,78, 97,5% GA = 0,59–1,03, P = ,0469).

მეორეული საბოლოო მაჩვენებლები:

• CPS ≥ 1 პაციენტებში საერთო გადარჩენის მედიანა ნივოლუმაბის/იპილიმუმაბის შემთხვევაში 15,7 თვე (95% GA = 13,7–18,8 თვე), ხოლო EXTREME-ს შემთხვევაში 13,2 თვე იყო (95% GA = 11,1–14,6 თვე) (HR = 0,82, 95% GA = 0,69–0,97).
• CPS ≥ 20 პაციენტებს შორის პროგრესირების გარეშე გადარჩენის მედიანა 5,4 თვე იყო 7 თვის წინააღმდეგ (HR = 1,02, 95% GA = 0,78–1,33).
• ობიექტური პასუხის სიხშირეები 34,1% და 36,0%, ხოლო პასუხის ხანგრძლივობის მედიანები 32,6 და 7 თვე იყო.

ნივოლუმაბის/იპილიმუმაბის ჯგუფში პაციენტების 9%-მა, EXTREME ჯგუფში კი 46%-მა შემდგომი იმუნოთერაპია მიიღო.

ნივოლუმაბის/იპილიმუმაბის ჯგუფის პაციენტების 28,2%-ში, ხოლო EXTREME ჯგუფის 70,7%-ში მკურნალობასთან დაკავშირებული მე-3 ან მე-4 ხარისხის გვერდითი მოვლენები განვითარდა.

დასკვნა და კომენტარი

შორსწასული თავისა და კისრის კიბოსთვის იმუნოთერაპიებმა FDA-ის დამტკიცება 2016 წლის აგვისტოში, პემბროლიზუმაბმა, და ნოემბერში, ნივოლუმაბმა, მიიღო. ამ დამტკიცებების მიხედვით, მეტასტაზური ან მორეციდივე თავისა და კისრის ბრტყელუჯრედოვანი კიბოს მქონე პაციენტებში, რომლებსაც მანამდე პლატინაზე დაფუძნებული ქიმიოთერაპია ჰქონდათ მიღებული და დაავადება პროგრესირებდა, მეორე ხაზის მკურნალობად იმუნოთერაპია აქტივობას ავლენს და პაციენტებს მნიშვნელოვან სარგებელს აძლევს.

შემდეგ გაჩნდა კითხვა, იქნებოდა თუ არა იმუნოთერაპია ამ პაციენტების პირველ ხაზშიც ეფექტური, და ჩატარდა KEYNOTE-048 კლინიკური კვლევა.

ამ კვლევამდე მეტასტაზური ან მორეციდივე თავისა და კისრის კიბოს სტანდარტული საწყისი მკურნალობა იყო პლატინაზე დაფუძნებული ქიმიოთერაპია, ცისპლატინი ან კარბოპლატინი 5-ფლუოროურაცილთან (5-FU) ერთად, და EGFR ინჰიბიტორი ცეტუქსიმაბი. შედეგების მიხედვით, PD-L1-დადებით პაციენტებში, კომბინირებული დადებითი ქულით [CPS]≥ 20, საერთო გადარჩენა პემბროლიზუმაბით 14,9 თვე, ხოლო სტანდარტული მკურნალობით 10,7 თვე იყო. PD-L1-ის დონის მიუხედავად საერთო გადარჩენა იმუნოთერაპიისა და ქიმიოთერაპიის კომბინაციით 13 თვე, სტანდარტული მკურნალობით კი 10,7 თვე იყო. KEYNOTE-048-ის მიხედვით იმუნოთერაპიის შემცველმა სქემამ გარდაცვალების რისკი 23%-ით შეამცირა.

ამის შემდეგ 2019 წლის ივნისში FDA-მ, აშშ-ის სურსათისა და წამლის ადმინისტრაციამ, მეტასტაზური ან ოპერაციით ამოუკვეთავი მორეციდივე თავისა და კისრის ბრტყელუჯრედოვანი კიბოს პირველ ხაზში პემბროლიზუმაბის იმუნოთერაპია დაამტკიცა. ამ დამტკიცების მიხედვით პემბროლიზუმაბი ყველა PD-L1 CPS ≥1 პაციენტისთვის პლატინთან და ფლუოროურაცილთან (FU) კომბინაციაში და ცალკე პრეპარატად გამოყენებისთვის დამტკიცდა.

დასკვნის სახით ჩვენი სტატიის თემის, CheckMate 651 კვლევის შედეგები ყოველდღიურ პრაქტიკას არ ცვლის.

დღეს შორსწასული თავისა და კისრის ბრტყელუჯრედოვანი კიბოს პირველ ხაზში

• PD-L1-დადებითი პაციენტებისთვის პემბროლიზუმაბი და ქიმიოთერაპია,
• PD-L1-უარყოფითი პაციენტებისთვის კი ქიმიოთერაპია და ცეტუქსიმაბი

კვლავ ყველაზე შესაფერის საწყის მკურნალობებად რჩება.