უწყვეტი რადიოთერაპია სამმაგად უარყოფითი ძუძუს კიბოს მქონე პაციენტების სიცოცხლეს ახანგრძლივებს
ამ სტატიაში
ძუძუს კიბოს ოპერაციის შემდეგ ადიუვანტური (დამცავი) რადიოთერაპიის დროს მკურნალობის შეწყვეტები სამმაგად უარყოფითი ძუძუს კიბოს (TNBC= triple negative breast cancer) მქონე პაციენტებში უარეს საერთო გადარჩენას უკავშირდება — ეს ახალმა კვლევამ აჩვენა. კვლევა The Journal of the National Cancer Institute ჟურნალში 3 ივლისს, 2023 წელს გამოქვეყნდა.
სამმაგად უარყოფითი ძუძუს კიბო და რადიოთერაპია
სამმაგად უარყოფითი ძუძუს კიბო (TNBC) ძუძუს კიბოს ტიპებს შორის აგრესიული ბიოლოგიით გამოირჩევა და ჩვეულებრივ ახალგაზრდა ქალებში უფრო გავრცელებულია. TNBC-ის მქონე პაციენტებისთვის რადიოთერაპია ხშირად გამოყენებული მეთოდია ოპერაციის შემდეგ შესაძლო დარჩენილი კიბოს უჯრედების გასანადგურებლად და რეციდივის რისკის შესამცირებლად. თუმცა კვლევის მთავარი საკითხია, როგორ მოქმედებს მკურნალობისას შეწყვეტები პაციენტების საერთო გადარჩენაზე.
მკურნალობის შეწყვეტები და საერთო გადარჩენა
მკვლევრებმა აღმოაჩინეს, რომ მკურნალობის შეწყვეტებს, თუნდაც 2-დღიანს, საერთო გადარჩენაზე მნიშვნელოვანი გავლენა ჰქონდა. კვლევისთვის გააანალიზეს აშშ-ის კიბოს ეროვნული მონაცემთა ბაზის 35845 პაციენტის მონაცემები, რომლებიც TNBC-ისთვის 2010-2014 წლებში მკურნალობდნენ.
მკურნალობის ხანგრძლივობისა და შეწყვეტების გავლენა
მკურნალობის ხანგრძლივობის გამზრდელი უფრო მეტი შეწყვეტა უარეს საერთო გადარჩენას უკავშირდებოდა.
კვლევის შედეგების მიხედვით;
- 0-1 დღით შეწყვეტის მქონე პაციენტებთან შედარებით, 2-5 დღით შეწყვეტის მქონე პაციენტების სიკვდილის რისკი 6,9%-ით გაიზარდა (საფრთხის თანაფარდობა [HR], 1,069; 95% CI, 1,002-1,140).
- რისკი ასევე გაიზარდა 6-10 და 11-15 დღით შეწყვეტის მქონე პაციენტებში.
მნიშვნელოვანი შენიშვნა: ამ კვლევაში „შეწყვეტა“ ნიშნავს მკურნალობის მოულოდნელ ან დაუგეგმავ პაუზებს და არა ჩვეულებრივი რადიოთერაპიის გრაფიკის ნაწილს — შაბათ-კვირის შესვენებებს. ანუ შაბათ-კვირას რადიოთერაპიის არჩატარება მკურნალობის გეგმის ჩვეულებრივი ნაწილია და პაციენტების აღდგენისა და მკურნალობის გაგრძელებისთვის, როგორც წესი, საჭიროა.
კომენტარი
მკვლევრებმა აღნიშნეს, რომ ეს პირველი კვლევაა, რომელიც არამეტასტაზური, ანუ არა 4. სტადიის, სამმაგად უარყოფითი ძუძუს კიბოს მქონე პაციენტებში რადიოთერაპიის დროს მკურნალობის შეწყვეტებსა და საერთო გადარჩენას შორის კავშირს აღწერს. მათ ასევე აღნიშნეს, რომ კანის შეხორცებისთვის მკურნალობის შეწყვეტა არ უნდა წახალისდეს.
მკურნალობის შეწყვეტების მინიმუმამდე შემცირება შედეგების გაუმჯობესების ერთ-ერთი უმნიშვნელოვანესი ნაბიჯია. დასხივებით გამოწვეული კანის ანთების (რადიაციული დერმატიტის) თავიდან ასაცილებლად კანის დამცავი ზომები მუდმივად უნდა გამოიყენებოდეს. ასევე მნიშვნელოვანია ალტერნატიული მკურნალობის მეთოდების კვლევა რადიოთერაპიის შესაძლო გვერდითი მოვლენების შესამცირებლად.
ბოლო წლებში გაიზარდა ინტერესი დასხივების უფრო მოკლე სესიებისადმი (ჰიპოფრაქციონირება). ზოგ შემთხვევაში ძალიან მოკლე (უკიდურესი ჰიპოფრაქციონირების) სესიებიც კი გამოიყენება. ასეთმა მოკლე სესიებმა შეიძლება პაციენტებს მკურნალობისას ნაკლები შეწყვეტა მოუტანოს და ამით პროცესი უფრო ეფექტიანი გახადოს.
წყაროები
ეს სტატია სასარგებლო იყო თქვენთვის?
თქვენი გამოხმაურება გვეხმარება შინაარსის გაუმჯობესებაში.
მკითხველთა კომენტარები
გაგვიზიარეთ თქვენი კომენტარი
თქვენი სახელი და კომენტარი მხოლოდ ადმინისტრატორის დამტკიცების შემდეგ გამოქვეყნდება. ელფოსტის მისამართი ვიზიტორებს არასოდეს ეჩვენებათ.
პირველმა დაწერეთ კომენტარი.