ვისთვის არის სასარგებლო საკვერცხეების დათრგუნვა ძუძუს კიბოს დროს? 12-წლიანი დაკვირვების შედეგი
ამ სტატიაში
ძუძუს კიბოების უმეტესობის უჯრედებში ესტროგენისა და/ან პროგესტერონის რეცეპტორები დიდი რაოდენობითაა და მათ ჰორმონდადებითი ძუძუს კიბო ეწოდება. ჰორმონდადებითი ძუძუს კიბოსას ჰორმონდამთრგუნველმა მკურნალობამ ესტროგენისა და პროგესტერონის გამომუშავების შემცირებით ან შეჩერებით კიბოს უჯრედების ზრდა შეიძლება შეანელოს ან შეაჩეროს. ამ მიზნით ყველაზე ხშირად გამოიყენება პერორალური ტაბლეტები, როგორიცაა tamoksifen, arimidex და aromasin. ამ პრეპარატების გარდა, ქალის ჰორმონების მოქმედების შეფერხების გზაა საკვერცხეების ფუნქციის დათრგუნვა. ამიტომ საკვერცხეების დათრგუნვა ძუძუს კიბოს ერთ-ერთი სტანდარტული მკურნალობაა.
დაკავშირებული თემა: ჰორმონდადებითი ძუძუს კიბოს მკურნალობის ახალი ვარიანტები
საკვერცხეების ფუნქციის დათრგუნვის გზებია: მათი ქირურგიული ამოკვეთა (ორმხრივი ოოფორექტომია), საკვერცხეებზე სხივური თერაპიის ჩატარება ან თვეში ერთხელ/ყოველ 3 თვეში კუნთში საკვერცხეების დამთრგუნველი ინექციების გაკეთება.
ძუძუს კიბოსას საკვერცხეების დამთრგუნველი მკურნალობა სტანდარტულ ჰორმონულ თერაპიას დამატებით ეძლევა და განსაკუთრებით პრემენოპაუზურ პერიოდში მყოფ ქალებში გამოიყენება. მას განსაკუთრებით კიბოს განმეორების მაღალი რისკის კლინიკურ-პათოლოგიური მახასიათებლების მქონე პაციენტებში ანიჭებენ უპირატესობას.
ჰორმონული მკურნალობის ხანგრძლივობა ჰორმონდადებით ძუძუს კიბოში
ადიუვანტური (ოპერაციის შემდგომი დამცავი) ჰორმონული მკურნალობა სულ მცირე 5 წელს გრძელდება და უმეტესად ამ ხანგრძლივობას ანიჭებენ უპირატესობას. თუმცა მაღალი რისკის ნიშნების მქონე ზოგი პაციენტისთვის იგი 1o წლამდე შეიძლება გაგრძელდეს. გახანგრძლივებული მკურნალობა ზოგისთვის სასარგებლოა, რადგან ნაჩვენებია, რომ ძუძუს კიბოს მქონე ქალებში 5 წლის შემდეგ შორეული განმეორების რისკი კიდევ 20 წელზე მეტხანს გრძელდება. თუმცა ზოგიერთისთვის გახანგრძლივებული ჰორმონული მკურნალობის სარგებელი შეიძლება მცირე იყოს, ზოგისთვის კი რისკები სარგებელს აღემატებოდეს. ამიტომ ჩვენ, ონკოლოგები, მკურნალობის გახანგრძლივების სარგებელსა და რისკებს ვაფასებთ და გადაწყვეტილებას ინდივიდუალურად ვიღებთ. ლიმფური კვანძების დადებითი სტატუსის მქონე ძუძუს კიბოს ქალ პაციენტებს სულ 10 წლამდე ადიუვანტური ჰორმონული მკურნალობა რეკომენდებულია.
სტანდარტულ მკურნალობაზე საკვერცხეების დამთრგუნველი თერაპიის დამატება დამოკიდებულია პაციენტის ასაკზე, მენოპაუზის სტატუსზე, ძუძუს კიბოს რისკსა და ჯანმრთელობის სხვა მდგომარეობებზე. თუმცა პრემენოპაუზურ პერიოდში ადრეული სტადიის ძუძუს კიბოს მქონე ყველა ქალისთვის ოპერაციის შემდეგ საკვერცხეების დათრგუნვის დამატება რეკომენდებული არ არის; მნიშვნელოვანია სარგებლის მიმღები პაციენტების შერჩევა. ვის მოუტანს სარგებელს საკვერცხეების დათრგუნვა, ონკოლოგიის ერთ-ერთ მნიშვნელოვან კითხვად რჩება.
12-წლიანი კვლევა
ამ კითხვაზე საპასუხოდ დაგეგმილი SOFT კვლევის 12-წლიანი შედეგები 2022 წლის 9 დეკემბერს Journal of Clinical Oncology ჟურნალში გამოქვეყნდა.
SOFT კვლევა ჰორმონდადებითი ძუძუს კიბოს მქონე პრემენოპაუზურ ქალებში ჰორმონულ თერაპიაზე საკვერცხეების ფუნქციის დამაქვეითებელი პრეპარატების დამატებას ეხება. კვლევაში 3047 პაციენტი შემთხვევითად განაწილდა tamoksifen + საკვერცხეების ფუნქციის დამაქვეითებელი პრეპარატის (1015), eksemestan + საკვერცხეების ფუნქციის დამაქვეითებელი პრეპარატის (1014) ან მხოლოდ tamoksifen-ის (1018) ჯგუფებში.
საკვერცხეების ფუნქციის დაქვეითება კუნთში triptorelin-ის ინექციით, საკვერცხეების ქირურგიული ამოკვეთით ან სხივური თერაპიით განადგურებით ხდებოდა.
საერთო ჯამში, პაციენტების 85%-ს ჰორმონდადებითი, HER2 უარყოფითი ძუძუს კიბო ჰქონდა.
პირველი ანალიზი tamoksifen/საკვერცხეების ფუნქციის დამაქვეითებელი პრეპარატის კომბინაციას მხოლოდ tamoksifen-ს ადარებდა, ხოლო eksemestan/საკვერცხეების ფუნქციის დამაქვეითებელი პრეპარატის tamoksifen-თან შედარება მეორე მიზნად განისაზღვრა.
5-წლიან შედეგებში tamoksifen-ზე საკვერცხეების ფუნქციის დამაქვეითებელი პრეპარატის დამატებას დადებითი ეფექტი არ ჰქონია. მე-8 წელს tamoksifen/საკვერცხეების ფუნქციის დამაქვეითებელი პრეპარატის ჯგუფში დაავადების გარეშე გადარჩენასა და სიცოცხლის საერთო ხანგრძლივობას შორის მნიშვნელოვანი სხვაობა გამოვლინდა. მიმდინარე ანალიზი საშუალოდ 12-წლიანი დაკვირვების შედეგებს წარმოადგენს.
შედეგები
12 წლის შემდეგ დაავადების გარეშე გადარჩენა:
- tamoksifen/საკვერცხეების ფუნქციის დათრგუნვით — 76,1%
- eksemestan/საკვერცხეების ფუნქციის დათრგუნვით — 79,0% და
- მხოლოდ tamoksifen-ით — 71,9%.
12-წლიანი საერთო გადარჩენა:
- tamoksifen/საკვერცხეების ფუნქციის დათრგუნვით — 89,0%
- eksemestan/საკვერცხეების ფუნქციის დათრგუნვით — 89,4% და
- tamoksifen-ით — 86,8%.
12-წლიან საერთო გადარჩენაში ჰორმონულ თერაპიაზე საკვერცხეების დათრგუნვის დამატებამ მაღალი რისკის კლინიკურ-პათოლოგიური ნიშნების მქონე პაციენტთა ჯგუფებს აბსოლუტური სარგებელი მოუტანა.
მაღალ რისკთან დაკავშირებული ნიშნები იყო:
- მანამდე მიღებული ნეოადიუვანტური ქიმიოთერაპია,
- 35 წლის ან უფრო ახალგაზრდა ასაკი და
- მაღალი რისკის კლინიკურ-პათოლოგიურ მახასიათებლებთან, მაგალითად Grade (ხარისხი) 3-თან დაკავშირებული ქვეჯგუფები
შედეგად, ოპერაციის შემდგომ დამცავ ჰორმონულ თერაპიაში საკვერცხეების ფუნქციის დათრგუნვის ჩართვა მნიშვნელოვან წვლილს იძლევა, განსაკუთრებით ახალგაზრდა პაციენტებში, რომლებსაც დიაგნოზისას კიბოს რეგიონული გავრცელების გამო ნეოადიუვანტური მკურნალობა ჩაუტარდათ და მაღალი რისკის კლინიკურ-პათოლოგიური ნიშნები აქვთ.
წყაროები
ეს სტატია სასარგებლო იყო თქვენთვის?
თქვენი გამოხმაურება გვეხმარება შინაარსის გაუმჯობესებაში.
მკითხველთა კომენტარები
გაგვიზიარეთ თქვენი კომენტარი
თქვენი სახელი და კომენტარი მხოლოდ ადმინისტრატორის დამტკიცების შემდეგ გამოქვეყნდება. ელფოსტის მისამართი ვიზიტორებს არასოდეს ეჩვენებათ.
პირველმა დაწერეთ კომენტარი.