BCG-yə cavab verməyən sidik kisəsi xərçəngində Nogapendekin Alfa Inbakicept-pmln FDA təsdiqi aldı

22 aprel 2024-cü ildə ABŞ Qida və Dərman İdarəsi (FDA) Bacillus Calmette-Guérin (BCG) ilə birlikdə, BCG-yə cavab verməyən, əzələyə yayılmamış sidik kisəsi xərçəngi olan yetkin xəstələr üçün nogapendekin alfa inbakicept-pmln (Anktiva, Altor BioScience, LLC) adlı dərmanı təsdiqlədi. Bu xərçəng yerində karsinoma (CIS, carcinoma in situ) ilə və ya papilyar şişlərlə birlikdə ola bilər.

Nogapendekin Alfa Inbakicept-pmln-in təsir mexanizmi necədir?

Nogapendekin alfa inbakicept-pmln (ticarət adı Anktiva) bioloji müalicədir. Bu dərman interleykin-2 (IL-2) adlı sitokinin törəməsi olan alfa inbakicept ilə genetik olaraq dəyişdirilmiş formadır. Bu baxımdan bir növ immunoterapiyadır. IL-2 immun sisteminin təbii hissəsidir və T hüceyrələrinin aktivləşməsini və çoxalmasını stimullaşdırır; beləliklə, orqanizmin öz müdafiə mexanizmlərindən istifadə edərək xərçəng hüceyrələrinə qarşı mübarizə aparmasına kömək edir.

Nogapendekin alfa inbakicept-pmln IL-2-nin immun sistemini hərəkətə gətirən xüsusiyyətlərindən istifadə edir, lakin bu dərman daha spesifik şəkildə hazırlanıb; beləliklə, birbaşa şişin mikromühitinə yönəlir və oradakı immun hüceyrələrini aktivləşdirir. Bu aktivləşmiş immun hüceyrələri xüsusilə şiş hüceyrələrini hədəf alır və məhv edir. Dərmanın yerli tətbiqi (məsələn, sidik kisəsi xərçənginin müalicəsində birbaşa sidik kisəsinə intravezikal / sidik kisəsi daxili yolla verilməsi) birbaşa təsir göstərməsinə və sistemik əlavə təsirləri azaltmasına imkan verir.

Nogapendekin alfa inbakicept-pmln-in bu spesifik və yerli tətbiq üsulu xüsusilə BCG-yə (Bacillus Calmette-Guérin) cavab verməyən, əzələyə yayılmamış sidik kisəsi xərçəngi kimi hallarda effektiv alternativ müalicə üsulu təklif edir. Bu xüsusi müalicə üsulu xərçəng hüceyrələrinə qarşı immun cavabı gücləndirmək və şişin böyüməsini basqılamaq üçün immun sisteminin təbii gücündən yararlanır.

FDA təsdiqinə əsas olan tədqiqat

Effektivlik BCG-yə cavab verməyən, yüksək riskli, əzələyə yayılmamış sidik kisəsi xərçəngi olan 77 xəstənin iştirak etdiyi QUILT-3.032 (NCT0302285) adlı təkqollu, çoxmərkəzli tədqiqatda qiymətləndirilib. Xəstələr BCG-dən sonra nogapendekin alfa inbakicept-pmln ilə induksiya və maksimum 37 ay davam edən saxlayıcı müalicə alıblar.

Şişin vəziyyəti müalicəyə başlandıqdan sonrakı ilk 6 ay ərzində məcburi aparılan biopsiya və müalicədən sonra 2 il boyunca hər 3 aydan bir sistoskopiya və sidik sitologiyası ilə qiymətləndirilib.

Nəticələr

• Müalicəyə tam cavab (CR: complete response) göstəricisi 62% (95% CI: 51, 73) olub.
• Tam cavab əldə edilən xəstələrin 58%-ində tam cavabın müddəti (DOR) ≥ 12 ay, 40%-ında isə DOR ≥ 24 ay olub.

Əlavə təsirlər

Ən çox rast gəlinən əlavə təsirlər arasında kreatininin yüksəlməsi, dizuriya, hematuriya, tez-tez sidiyə getmə, təcili sidiyə getmə ehtiyacı, sidik yolu infeksiyası, kaliumun yüksəlməsi, əzələ-sümük ağrısı, titrəmə və qızdırma var.

Doza tövsiyələri

Nogapendekin alfa inbakicept-pmln üçün tövsiyə olunan doza induksiya müalicəsi kimi BCG ilə birlikdə 6 həftə ərzində həftədə bir dəfə 400 mcg intravezikal tətbiqdir. Əgər 3-cü ayda CR əldə olunmazsa, ikinci induksiya kursu verilə bilər. Saxlayıcı müalicə üçün tövsiyə olunan doza 4, 7, 10, 13 və 19-cu aylarda BCG ilə birlikdə 3 həftə ərzində həftədə bir dəfə 400 mcg intravezikal tətbiqdir.

Yekun

BCG-yə cavab verməyən, əzələyə yayılmamış sidik kisəsi xərçəngi olan xəstələr üçün FDA-nın təsdiqlədiyi nogapendekin alfa inbakicept-pmln bu sahədə ümidverici müalicə seçimi təklif edir. Müalicə planında bu yeni üsuldan istifadə etməyi düşünən tibb mütəxəssisləri müalicəni davam etdirmək barədə qərar vermək üçün xəstələri diqqətlə izləməlidir.

*

BCG-yə cavab verməyən, əzələyə yayılmamış sidik kisəsi xərçəngində FDA tərəfindən təsdiqlənmiş müalicələr

• QUILT-3.032 tədqiqatı: Nogapendekin alfa inbakicept-pmln ilə müalicə olunan xəstələrdə 62% tam cavab müşahidə olunub və bu cavabların 58%-i ən azı 12 ay, 40%-ı isə ən azı 24 ay davam edib. Tədqiqatda median DOR göstərilməyib.
• KEYNOTE-057 tədqiqatı: 2020-ci ildə FDA təsdiqi alıb. Pembrolizumab immunoterapiyası ilə müalicə olunan xəstələrin 41%-i tam cavab verib, 46%-sında isə cavab ən azı 12 ay davam edib. Bu tədqiqatda median DOR 16,2 ay kimi qeydə alınıb.
• Adstiladrin tədqiqatı: 2022-ci ildə FDA təsdiqi alıb. Müalicə olunan xəstələrin 51%-i tam cavab əldə edib, 46%-sında bu cavab ən azı 12 ay davam edib. Bu tədqiqatda median DOR 9,7 ay olub.