Cinsi sağlamlıq üçün iki mühüm mövzu: xlamidiya və HIV infeksiyaları, onlara qarşı PEYVƏND tədqiqatları

Cinsi davranış insan həyatının bütün tərəflərinə təsir edən mürəkkəb fəaliyyətdir. Riskli cinsi davranışların sağlamlığa təsiri ilə yanaşı, ailə və sosial münasibətlərə də mənfi təsirləri olur. Təhlükəsiz olmayan cinsi əlaqə dünyada zəiflik (diqqətsizlik, gücsüzlük) səbəbindən itirilən həyat illərinin ikinci əsas səbəbidir. Riskli cinsi davranışların əvəzinə düzgün davranışların öyrədilməsi və etibarlı vasitələrlə profilaktik tədbirlərin tətbiqi sağlam həyat üçün çox vacibdir.
Riskli cinsi davranış cinsi yolla ötürülən infeksiyalara səbəb olan mikroorqanizmlərin aktiv təmasla ötürülməsidir.
Riskli cinsi davranış nəticəsində sadə infeksiyalardan ölümcül xəstəliklərədək bir çox xəstəlik başqa şəxsə keçə bilər. Eyni şəkildə riskli cinsi davranışlar nəticəsində xüsusilə HPV (İnsan Papilloma Virusu) ilə baş-boyun xərçəngləri, serviks (uşaqlıq boynu), vagina, anal, penis xərçəngləri, HPV virusunun cinsi yolla ötürülməsindən sonra yaranan xroniki infeksiya nəticəsində əmələ gələ bilər. Tamamilə təhlükəsiz olmayan cinsi əlaqə qlobal xəstəlik yükünün (siqaret, alkoqol və yüksək təzyiqdən də öndə olan) dünyada ikinci əsas səbəbidir (% 6,3).
Cinsi yolla ötürülən xəstəliklərdən xüsusilə AIDS və Xlamidiya xəstəliyi vacibdir. AIDS HIV virusu ilə yayılan və cinsi yolla ötürülən ən təhlükəli xəstəliklərdən biridir. Xlamidiya isə Chlamydia trachomatis bakteriyası ilə yayılan digər mühüm cinsi yolla ötürülən xəstəlikdir.
Xlamidiya infeksiyası
Xlamidiya Amerika Birləşmiş Ştatlarında ən çox bildirilən xəstəlikdir və bütün cinsi yolla ötürülən xəstəliklər arasında ən geniş yayılanlardandır.
Xlamidiya infeksiyası qadınlarda adətən əlamət vermir. Uzun müddət davam edən və müalicə edilməyən infeksiya sonsuzluğun, uşaqlıqdankənar hamiləliyin və qarnın aşağı hissəsində uzunmüddətli ağrının əsas səbəbi olan çanağın iltihabi xəstəliyinə (PID) səbəb ola bilər. Digər cinsi yolla ötürülən infeksiyalar kimi, xlamidiya infeksiyası HIV virusunun ötürülməsini asanlaşdırır. Həmçinin xlamidiyaya yoluxmuş hamilə qadınlar doğuş zamanı infeksiyanı körpələrinə ötürə bilər və bu, nadir hallarda körpədə korluğa və pnevmoniyaya səbəb ola bilər. Kişilər arasında bildirilən xlamidiya infeksiyası hallarının sayı qadınların yarısı qədər görünsə də, 2000-2017-ci illərin məlumatlarına görə kişilər arasında davamlı artmaqdadır.
2017-ci ildə bildirilmiş qadın və kişi xlamidiya hallarının əksəriyyəti 15-44 yaş arasındadır (qadınların %97.4-ü, kişilərin %94.2-si). Bu yaş qrupunda xlamidiya hər iki cinsdə xüsusilə 20-24 yaşda ən çox görülür.
Yüksək xəstəlik yükü və infeksiya ilə bağlı risklərə görə, 25 yaşdan kiçik cinsi aktiv bütün qadınlara və 25 yaşdan böyük, infeksiya riski artmış qadınlara (məsələn, yeni və ya çoxsaylı cinsi partnyoru olanlara) illik xlamidiya skrininqi tövsiyə olunur.
Yeni hazırlanmış xlamidiya peyvəndi
Milli skrininq proqramlarına və antibiotik müalicələrinə baxmayaraq, xlamidiya hələ də dünyada ən geniş yayılmış cinsi yolla ötürülən bakterial infeksiya olaraq qalır. Xlamidiya ilə mübarizədə indiyədək klinik tədqiqatlarda genital xlamidiyaya qarşı peyvənd sınaqdan keçirilməmişdi. Lakin bu mövzuda yaxın günlərdə ümidverici hadisə baş verib.
Bunun üçün aparılmış faza-1 klinik tədqiqatda rekombinant zülal alt vahidinə (CTH522) əsaslanan yeni xlamidiya peyvəndinin (peyvənd namizədi) təhlükəsizliyi və immunogenliyi qiymətləndirilib. Xlamidiya peyvəndi bu tədqiqatda ilk fazanı uğurla tamamlayıb (mənbə 1).
HIV
HIV epidemiyanın başladığı gündən dünyada 75 milyon insana təsir edib və HIV infeksiyası nəticəsində yaranan AIDS (immun çatışmazlığı sindromu) səbəbindən təxminən 32 milyon insan həyatını itirib. Dünyada HIV virusuna yoluxmuş təxminən 40 milyona yaxın insan var. Dünya üzrə 15-49 yaşda HIV-ə yoluxmuş şəxslərin nisbəti %1-ə yaxındır. Afrikada isə təxminən hər 25 nəfərdən biri HIV-lidir (%3.9).
Avropa və Amerikada HIV-dən ən çox təsirlənənlər kişilərlə və ya transgender insanlarla cinsi əlaqədə olan kişilərdir. Amerika Birləşmiş Ştatlarında homoseksual və biseksual kişilər əhalinin təxminən % 4-ünü təşkil etsələr də, yeni HIV diaqnozlarının üçdə ikisi onların payına düşür. Transgender qadınların isə % 14-ü HIV ilə yaşayır. Şərqi və Cənubi Afrikada HIV-li insanların təxminən %60-ını qadınlar və qızlar təşkil edir.
Əlaqəli mövzu: HIV infeksiyası ilə əlaqəli xərçənglər və digər xəstəliklər (ətraflı)
HIV peyvəndi
Yaxın günlərdə ABŞ Milli Səhiyyə İnstitutları (NIH) və tərəfdaşları faza-3 tədqiqatında HIV peyvəndinin effektivliyini sınamağı planlaşdırdıqlarını açıqlayıblar (mənbə 2). Tədqiqat HIV virusunun və dolayısilə AIDS xəstəliyinin ən çox görüldüyü, kişilərlə və transgender insanlarla cinsi əlaqədə olan kişilərdə aparılır; qadınlarda tamamlayıcı tədqiqat isə davam edir.
Şimali Amerika, Cənubi Amerika və Avropanın bir çox ölkəsində aparılan klinik tədqiqat sayəsində müxtəlif bölgələrin insanlarında HIV peyvəndinin effektivliyinin qiymətləndirilməsi və bununla təhlükəsiz və qoruyucu HIV peyvəndinin hazırlanması planlaşdırılır.
Dünyanın müxtəlif coğrafi bölgələrində fərqli HIV alt növləri üstünlük təşkil edə bilər. Alt növlərdən Clade C HIV tamamlayıcı faza 2 tədqiqatı olan "Imbokodo"nun aparıldığı Cənubi Afrikada yayılıb; Clade B isə Avropada və faza-3 tədqiqatı olan "Mosaico"nun aparılacağı Amerikada üstünlük təşkil edir. Bunlar müxtəlif yayılmış HIV ştamlarına qarşı immun cavabları stimullaşdırmağı hədəfləyən, çoxsaylı mozaik alt növlərdən "mozaik" immunogenlərə əsaslanan tədqiqat peyvəndləridir.
Mosaico tədqiqatı profilaktik HIV peyvəndindən böyük fayda görə biləcək yüksək riskli qruplar və dünya üzrə insanlar üçün təhlükəsiz və effektiv HIV peyvəndinin hazırlanması istiqamətində mühüm addım sayılır.
Xlamidiya və HIV peyvəndi ilə bağlı yeniliklər niyə vacibdir?
Dünyada görülmə sayı hər il artan və qarşısının alınmasında uğur əldə edilməyən xlamidiya infeksiyasının həm profilaktikası, həm də uzunmüddətli, təkrarlanan infeksiyalarına qarşı effektiv olacaq güclü peyvəndə ehtiyac var. AIDS isə yoluxma baxımından yüksək riskli insan qruplarında daha çox görülsə də, milyonlarla insana təsir edən və tam müalicəsində hələ uğur əldə edilməmiş ciddi xəstəlikdir. Bu xəstəliklərə qarşı hazırlanacaq peyvəndlər sayəsində xlamidiya və AIDS törədicilərinə qarşı qoruyucu, gücləndirilə bilən immunitet mümkün ola biləcək.
Mənbələr
Safety and immunogenicity of the chlamydia vaccine candidate CTH522 adjuvanted with CAF01 liposomes or aluminium hydroxide: a first-in-human, randomised, double-blind, placebo-controlled, phase 1 trial.
The Lancet Infectious Diseases, 12 August 2019.
2. NIH and partners to launch HIV vaccine efficacy trial in the Americas and Europe, The National Institutes of Health, July 15, 2019.
3. Centers for Disease Control and Prevention. Sexually Transmitted Disease Surveillance 2017; Chlamydia
Bu məqalə sizə faydalı oldu?
Rəyiniz məzmunumuzu yaxşılaşdırmağa kömək edir.





Oxucu şərhləri
Şərhinizi paylaşın
Adınız və şərhiniz yalnız administrator təsdiqindən sonra dərc olunur. E-poçt ünvanınız ziyarətçilərə heç vaxt göstərilmir.
İlk şərhi siz yazın.