Əvvəl müalicə almamış follikulyar limfoma üçün Obiutuzumab FDA təsdiqi aldı

16 noyabr 2017-ci ildə Amerika Qida və Dərman İdarəsi FDA, II mərhələ bulky, III və IV mərhələ follikulyar limfoması olan, əvvəllər tək obinutuzumab istifadəsi ilə ən azı qismən yaxşılaşma (remissiya) göstərmiş xəstələrin müalicəsində kimyaterapiya ilə birlikdə obinutuzumaba (ticarət adı Gazyva) təsdiq verdi.

Təsdiq əvvəl müalicə edilməmiş follikulyar limfomalı 1202 xəstənin daxil edildiyi çoxmərkəzli, açıq etiketli, randomizə faza 3 tədqiqatına (GALLIUM) əsaslanmışdır. Xəstələr 1:1 nisbətində obinutuzumab + kimyaterapiya və ya rituksimab + kimyaterapiya üçün randomizə edilmiş, ardınca cavab verənlərə 2 il obinutuzumab və ya rituksimab ilə saxlayıcı müalicə tətbiq olunmuşdur.

Follikulyar limfoma xəstələrinin %91-ində III-IV mərhələ limfoma, % 44-ündə bulky və %79-unda ən azı orta riskli limfoma vardı. Xəstələrin %57-sinə bendamustin, %33-nə CHOP və %10-na CVP kimyaterapiyası tətbiq edilmişdi.

Median 38 aylıq izləmə ilə müstəqil komitənin qiymətləndirdiyi proqressiyasız sağqalımda obinutuzumab qolunda rituksimab qoluna nisbətən statistik əhəmiyyətli yaxşılaşma müşahidə edilmişdir [hazard nisbəti 0.72 (95% CI: 0.56, 0.93; p=0.0118)].

Hər iki qolda median proqressiyasız sağqalım əldə edilməmişdir. Görüntüləmə ilə qiymətləndirildikdə obinutuzumab və rituksimab qollarında oxşar ümumi cavab (obinutuzumab ilə %91, rituksimab ilə %88) və tam remissiya göstəriciləri tapılmışdır (obinutuzumab ilə % 28, rituksimab ilə % 27).

Əlaqəli mövzu:

• Limfoma, limfa xərçəngi nədir? Əlamətləri və müalicəsi necədir?

Təhlükəsizlik və yan təsirlər baxımından 1385 xəstə qiymətləndirildikdə obinutuzumab qolunda ciddi yan təsir göstəricisi rituksimabdan yüksək tapılmışdır (obinutuzumab qolunda %50, rituksimab qolunda %43). Ən çox görülən yan təsirlər infuziya reaksiyaları, ağ qan hüceyrələrinin azalması, yuxarı tənəffüs yolu infeksiyası, öskürək, qəbizlik və ishaldır. Neytropeniya, febril neytropeniya, trombositopeniya və infuziya reaksiyaları obinutuzumab ilə ən çox görülən ciddi yan təsirlərdir.

Əvvəl müalicə edilməmiş follikulyar limfoma xəstələrində obinutuzumabın tövsiyə edilən dozası, 1-ci kursun 1-ci, 8-ci və 15-ci günlərində venadaxili 1000 mg; 2-6 və ya 2-8 kurslarının yalnız 1-ci günündə 1000 mg; sonra hər 2 aydan bir 1000 mg olmaqla 2 ilə qədərdir.

Obinutuzumab necə təsir edir?

Obinutuzumab immun sisteminin xərçəngləşmiş B-hüceyrələrinə onların üzərindəki CD20 adlı strukturlara bağlanaraq təsir edir. Monoklonal anticisim quruluşlu dərmandır. Rituksimabdan fərqi klassik tip-1 CD20-yə deyil, tip-2 CD20-yə bağlanmasıdır. Bu xüsusiyyət ona anticisimdən asılı sitotoksikliyi daha güclü induksiya etməyi və klassik CD20 anticisimlərindən daha çox birbaşa sitotoksik təsiri təmin edir.

Aşağıdakı şəkildə obinutuzumabın təsir mexanizmlərini görə bilərsiniz:

Obinutuzumab (Gazyva) daha əvvəl 26 fevral 2016-cı ildə rituksimab istifadə etmiş, təkrarlanan və ya müalicəyə davamlı follikulyar limfoma xəstələrində istifadə təsdiqi almışdı. Ondan əvvəl də 2013-cü ildə xroniki limfositar leykozda xlorambusil ilə birlikdə istifadə təsdiqi almışdı.