İlk dəfə CDK 4/6 inhibitorunun 4-cü mərhələ döş xərçəngində ümumi sağqalım faydası göstərildi

Hormon müsbət, metastatik (4-cü mərhələ) döş xərçəngində CDK 4/6 inhibitorlarının əhəmiyyəti əvvəlki araşdırmalarda göstərilmişdi. Hüceyrənin mitoz bölünmə dövrünə təsir edən bu CDK 4/6 inhibitorları, hormonal müalicələrə qarşı müqavimət yaranmasının qarşısını alan dərmanlardır. Əvvəlki tədqiqatlarda xüsusilə menopauzadan əvvəlki döş xərçəngində bir neçə müalicə xəttindən sonra istifadənin xəstəliksiz yaşam müddətinə faydası göstərilsə də, «ümumi yaşam müddətinə fayda» sübut edilməmişdi.

İlk dəfə birinci xətt müalicəsində CDK4/6 inhibitorlarından birinin – ribosiklibin (Kisqali) – menopauzaya girməmiş döş xərçəngi xəstələrində ümumi yaşam müddətinə faydası göstərildi. MONALEESA-7-nin bu mühüm nəticələri, Amerika Klinik Onkologiya Cəmiyyətinin (ASCO) 2019 Konqresindətəqdim edildi.

Tədqiqatın xülasəsi

• Tədqiqata menopauzadan əvvəl, metastatik, hormon müsbət, əvvəllər müalicə almamış 672 xəstə daxil edildi.
• Yumurtalıq funksiyasını basdırıb menopauza yaratmaq üçün bütün xəstələrə GnRH qrupu dərmanlar verildi.
• Endokrin müalicə olaraq tamoksifen, letrozol və ya anastrozol istifadə edildi.
• Təcrübə qrupu əlavə ribosiklib, nəzarət qrupu plasebo aldı.
• Orta 35 aylıq izləmədən sonra ribosiklibin əlavə 11 aylıq proqressiyasız sağqalım (pisləşməyə qədər müddət) verdiyi göstərildi.
• 42-ci ayda ribosiklib alanların %70-i sağ idi; ümumi yaşam müddətinə %24 fayda göstərildi.
• İzləmə dövründə idarə edilə bilməyən yeni yan təsir görülmədi.

Hazırda xəstələrin qan nümunələrinin DNA genetik təhlili davam edir. Məqsəd ribosiklibdən ən çox fayda görəcək şəxsləri müəyyənləşdirməkdir. Beləcə başlanğıcdan hansı xəstələrdə daha təsirli olacağını proqnozlaşdıra biləcəyik.

Şərh

Bu tədqiqat menopauzadan əvvəl döş xərçəngi xəstələrində CDK4/6 inhibitorlarının təhlükəsiz istifadəsinin göstəricisi oldu. Onkologiya liderləri nəticələri inqilabi qiymətləndirdilər. Digər CDK4/6 inhibitorları palbosiklib (Ibrance) və abemesiklibin (Verzenio) də menopauzadan əvvəlki araşdırmalarının tezliklə nəticələnəcəyini düşünürük. Yeni tədqiqatları sizin üçün izləyəcəyik.