İlk dəfə HER2-müsbət kolon-rektum xərçəngi üçün bir müalicə FDA təsdiqi aldı

HER2-müsbət xərçəng hüceyrələrdə böyümə və çoxalmada rol oynayan HER2 adlı zülalın həddindən artıq olması və bu zülala görə şişin sürətlə böyüməsi deməkdir. Bu gün HER2-müsbət xərçənglərə xas çoxlu yeni hədəflənmiş dərmanlar yaradılıb. Yaxın vaxtlara qədər HER2-müsbətlik və anti-HER2 dərmanlar yalnız süd vəzi xərçəngi ilə əlaqələndirilsə də, indi başda mədə, ağciyər və kolon olmaqla digər xərçənglər üçün də əhəmiyyət qazanmağa başlayıb.

Süd vəzi xərçəngindən tanıdığımız HER2-hədəfli dərmanların kombinasiyası (trastuzumab+tucatinib) artıq kolorektal (kolon və rektum) xərçənglərdə istifadə üçün mövcuddur.

19 yanvar 2023-cü ildə FDA (ABŞ Qida və Dərman İdarəsi) əvvəllər floropirimidin, oksaliplatin və irinotekan əsaslı kimyaterapiya almış, RAS mutasiyası olmayan, HER2-müsbət irəliləmiş kolorektal xərçəng üçün "trastuzumab ilə birlikdə tucatinib (Tukysa Seagen Inc.)" müalicəsinə sürətləndirilmiş təsdiq verdi.

İnsan epidermal böyümə faktoru reseptoru 2 (HER2) müsbətliyi metastatik (4-cü mərhələ) kolorektal xərçəng hallarının təxminən 3% ilə 5%-ində mövcuddur.

HER2-müsbət metastatik kolorektal xərçəngi olan və əvvəlki müalicələr zamanı xərçəngi irəliləyən şəxslərdə xəstəliyin gedişinin əlverişsiz olduğunu bilirik. Kolorektal xərçənglər üçün HER2-ni hədəfləyən, kimyaterapiyasız kombinasiya rejiminin FDA təsdiqi bu xəstələr üçün çox yaxşı xəbərdir. Bu təsdiqlə birlikdə irəliləmiş kolorektal xərçəng xəstələrinin şişlərində HER2-nin yoxlanılması artıq adi klinik tətbiq olacaq.

Tucatinib əvvəllər 2020-ci ilin aprelində irəliləmiş HER2-müsbət süd vəzi xərçəngi xəstələrinin müalicəsində trastuzumab və kapesitabin ilə birlikdə istifadə üçün FDA təsdiqi almışdı.

MOUNTAINEER tədqiqatı ilə əldə edilən FDA təsdiqi

Bu anti-HER2 dərman kombinasiyasının təsiri açıq etiketli, çoxmərkəzli MOUNTAINEER tədqiqatında 84 xəstədə qiymətləndirildi.

Xəstələrin HER2-müsbət, RAS vəhşi tipli, əməliyyatla çıxarıla bilməyən və ya metastatik kolorektal xərçəngi olmalı və əvvəllər floropirimidin, oksaliplatin, irinotekan və anti-vaskulyar endotel böyümə faktoru (VEGF) monoklonal anticismi (mAb) ilə müalicə almış olmalı idilər.

Şişlərində uyğunsuzluq təmiri (dMMR) zülalları çatışmayan və ya mikrosatellit qeyri-sabitliyi yüksək (MSI-H) olan xəstələr immunoterapiya da almış olmalı idilər. Əvvəllər anti-HER2 hədəfli müalicə alan xəstələr tədqiqatdan kənarlaşdırıldı.

Əsas effektivlik meyarları ümumi cavab göstəricisi və cavab müddəti olaraq müəyyənləşdirildi. Trastuzumab + tucatinib kombinasiyası alan bu xəstə qrupunda:

• Ümumi cavab göstəricisi 38% (95% GA: 28, 49) və
• Median cavab müddəti 12,4 ay idi (95% GA: 8,5, 20,5).

Xarici məzmunu görmək üçün seçimləri tənzimləyin

Ən çox görülən (≥20%) yan təsirlər ishal, yorğunluq, səpgi, ürəkbulanma, qarın ağrısı, infuziya ilə əlaqəli reaksiyalar və qızdırma idi. Ən çox görülən (≥20%) laborator pozuntular kreatininin, qlükozanın və ALT-nin artması, hemoqlobinin azalması, AST-nin, bilirubinin və qələvi fosfatazanın artması, limfositlərin, albuminin, leykositlərin və natriumun azalması idi.

Tövsiyə edilən tucatinib dozası xəstəlik irəliləyənə və ya qəbuledilməz yan təsir yaranana qədər trastuzumab ilə birlikdə gündə iki dəfə ağızdan qəbul edilən 300 mg-dır.