İrəliləmiş süd vəzi xərçənginin müalicəsi üçün capivasertib FDA təsdiqi aldı

Hormon reseptoru (HR) müsbət, insan epidermal böyümə faktoru reseptoru 2 (HER2) mənfi, yerli irəliləmiş və ya metastatik süd vəzi xərçəngi olan, metastatik şəraitdə ən azı bir endokrin əsaslı müalicə rejimindən sonra xəstəliyi irəliləyən və ya adyuvant müalicəni tamamladıqdan sonrakı 12 ay ərzində residiv (təkrar) baş verən və FDA tərəfindən təsdiqlənmiş testlə bir və ya daha çox PIK3CA/AKT1/PTEN dəyişikliyi müəyyən edilən yetkin xəstələr üçün capivasertib (Truqap, AstraZeneca Pharmaceuticals) dərmanının fulvestrant ilə birlikdə istifadəsini ABŞ Qida və Dərman İdarəsi (FDA) 16 noyabr 2023-cü ildə təsdiqlədi.

FDA həmçinin capivasertib və fulvestrant müalicəsi üçün süd vəzi xərçəngi olan xəstələri seçmək məqsədilə FoundationOne®CDx testini müşayiətedici diaqnostika vasitəsi kimi təsdiqlədi.

Capivasertib hüceyrələrin böyüməsini və bölünməsini idarə edən AKT  siqnal yolunu  inhibə edən və AstraZeneca tərəfindən hazırlanmış kiçik molekullu dərmandır. Bu yol bəzi xərçəng növlərində həddindən artıq aktivləşərək hüceyrələrin nəzarətsiz böyüməsinə və xərçəngin irəliləməsinə səbəb ola bilər. Capivasertib bu yolu inhibə edərək xərçəng hüceyrələrinin böyüməsini ləngidir və xərçəngin irəliləməsinin qarşısını almağa kömək edə bilər.

CAPItello-291 tədqiqatı ilə gələn FDA təsdiqi

Faza 3, randomizə edilmiş, ikiqat kor CAPItello-291 tədqiqatına aromataza inhibitoru müalicəsi zamanı və ya sonra, əvvəllər siklindən asılı kinaza 4 və 6 (CDK4/6) inhibitoru müalicəsi alıb-almamasından asılı olmayaraq xəstəliyi təkrarlanan və ya irəliləyən, HR müsbət, HER2 mənfi irəliləmiş süd vəzi xərçəngi olan premenopozal, perimenopozal və postmenopozal qadınlar, həmçinin kişilər daxil edildi.

Xəstələr capivasertib üstəgəl fulvestrant və ya plasebo üstəgəl fulvestrant almaq üçün 1:1 nisbətində təsadüfi bölündülər.

Tədqiqatda iki birincili sonlanım nöqtəsi müəyyən edildi: bütün xəstə qrupunda və AKT yolunda dəyişiklikləri (PIK3CA, AKT1 və ya PTEN) olan şişlərdə tədqiqatçının qiymətləndirdiyi proqressiyasız (irəliləməsiz) sağqalım.

Nəticələr

Ümumilikdə tədqiqata 708 xəstə daxil edildi; 289 xəstədə (40,8%) AKT yolunda dəyişikliklər var idi və 489 xəstə (69,1%) irəliləmiş süd vəzi xərçəngi üçün əvvəllər CDK4/6 inhibitoru almışdı.

• Bütün xəstələr üzrə median proqressiyasız sağqalım capivasertib–fulvestrant qrupunda 7,2 ay, plasebo–fulvestrant qrupunda isə 3,6 ay idi (irəliləmə və ya ölüm üçün təhlükə nisbəti 0,60; 95% etibar intervalı [CI], 0,51 ilə 0,71; P<0,001).
• AKT yolunda dəyişiklikləri olan xəstələr üzrə median proqressiyasız sağqalım capivasertib–fulvestrant qrupunda 7,3 ay, plasebo–fulvestrant qrupunda isə 3,1 ay idi (təhlükə nisbəti 0,50; 95% CI, 0,38 ilə 0,65; P<0,001).

Capivasertib–fulvestrant alan xəstələrdə 3-cü dərəcəli və ya daha ağır ən çox rast gəlinən yan təsirlər səpgi (0,3%-ə qarşı 12,1%) və ishal (0,3%-ə qarşı 9,3%) idi. Yan təsirlərə görə müalicəni dayandırma göstəricisi capivasertip qolunda 13%, plasebo qolunda isə 2,3% idi.

Tövsiyə olunan capivasertib dozası xəstəlik irəliləyənədək və ya qəbuledilməz toksiklik yarananadək yeməklə və ya yeməksiz, təxminən 12 saat fasilə ilə gündə iki dəfə 400 mg olmaqla 4 gün qəbul edilməsi, sonra isə 3 gün ara verilməsidir.

*

Vizualın izahı: Yazının vizualı Microsoft Copilot tərəfindən bu əmrlə yaradılıb: "Üfüqə baxan qadının pop-art üslubunda təsviri"