Karbohidratlı qidaların faydalı bağırsaq bakteriyalarına təsirləri hansılardır?

Karbohidratların mikrobiotaya təsiri

Sadə karbohidratlar nazik bağırsaqda tam sorulduğu halda insan həzm fermentlərinin fəaliyyətinə davamlı olduqları üçün, mürəkkəb karbohidratlar, yuxarı mədə-bağırsaq sistemində tam həzm olunmur.

Lif adlanan mürəkkəb quruluşlu karbohidratların qəbulu həm gəmiricilərdə, həm insanlarda piylənmə, iltihabi bağırsaq xəstəliyi və astma daxil olmaqla, mikrobiota vasitəsilə müxtəlif faydalı təsirlərlə əlaqəlidir.

Şəkər / karbohidrat nədir?

Karbohidratlar (şəkər birləşmələri) yağlar və zülallar kimi insan və heyvanların ən mühüm orqanik qidalarındandır. Şəkərlərin əsas məqsədi enerji verməkdir. Qidalarımızda ən çox olan, karbon, oksigen və hidrogendən ibarət orqanik birləşmələrdir. Bu üç elementin sayına, birləşmə qaydasına və insanın yararlanmasına görə müxtəlif quruluşlu və adlı şəkərlər var.

Yuxarıdakı şəkildə karbohidratların quruluş vahidləri görünür. Ən kiçik vahidlər monosaxaridlərdir (qlükoza, fruktoza və qalaktoza). Onların birləşməsindən disaxaridlər (saxaroza, maltoza, laktoza) və polisaxaridlər (nişasta, qlikogen, sellüloza, xitin) yaranır.

Şəkərlər:

1. Monosaxaridlər (qlükoza, fruktoza, qalaktoza)
2. Disaxaridlər (saxaroza, maltoza, laktoza)
3. Polisaxaridlər (nişasta, nişasta olmayan polisaxaridlər)
4. Şəkər spirtləri (sorbitol, maltilol, laktitol) və digərləri kimi müxtəlif qruplara ayrılır

Nişasta, ən çox paxlalılarda, çörəkdə, kartofda və makaronda olur, qida ilə aldığımız enerjinin əsas mənbəyidir.

Mürəkkəb karbohidratlar – məsələn, həzm olunan nişasta, həzmə davamlı nişasta və sellüloza – nazik bağırsaqdan keçir və kolon mikrobiotası (bağırsaqdakı faydalı bakteriyalar) üçün substrat (bioloji xammal) rolunu oynayır. Bu birləşmələr bağırsaq mühitini formalaşdıran qısa zəncirli yağ turşuları (KZYA), CO2 və H2 kimi metabolitlərin yaranmasına səbəb olan bir neçə bakteriya növü tərəfindən fermentasiya edilir.

Davamlı nişasta nədir?

Nişasta həzm olunan polisaxariddir, lakin həzmə davamlı nişastalar da var. Davamlı nişasta sağlam insanın nazik bağırsağında sorulmayan nişastadır. Qidalarda təbii ola bilər (məsələn, paxlalılar), sonradan tərkib hissəsi kimi əlavə oluna və ya emal zamanı uyğun üsullarla miqdarı artırıla bilər. Gündəlik istehlak etdiyimiz bəzi emal olunmuş qidalarda (çörək, makaron, səhər yeməyi lopaları) davamlı nişasta çox azdır. Qida mühəndisləri və məhsul hazırlayanlar onun miqdarını artırmağa çalışırlar.

Həzmə davamlı nişastalar mikrobiotanın onları fermentasiya edəcəyi kolona çatacaq və müxtəlif fizioloji faydalar verə bilən, qısa zəncirli yağ turşuları (KZYA) daxil müxtəlif məhsullar yaradacaq. Karbohidratın davamlı nişasta tərkibinə təsir edən amillərə nişasta qranulunun morfologiyası, amiloza-amilopektin nisbəti və digər qida komponentləri ilə əlaqəsi daxildir. Hazırkı maraq sahələrindən biri kolondakı bir və ya məhdud sayda faydalı bakteriyanın böyümə və ya fəallığını təşviq etməklə sahibə fayda verən həzmolunmaz qida komponenti olan, prebiotik kimi istifadə potensialıdır. Davamlı nişasta prebiotik sayılmaq üçün üç meyarı ödəməlidir: yuxarı mədə-bağırsaq mühitinə davamlılıq, mikrobiota ilə fermentasiya və faydalı bakteriyaların böyümə və / və ya fəallığının seçici təşviqi.

Xarici məzmunu görmək üçün seçimləri tənzimləyin

Xarici məzmunu görmək üçün seçimləri tənzimləyin

- Əlaqəli mövzu: Qidaları və heyvanları niyə və necə dəyişdirirlər?

Liflə zəngin bitki əsaslı pəhriz Roseburia, Lachnospira və Prevotella bakteriya cinslərinin və KZYA istehsalının artması ilə əlaqəlidir.

Lif qəbuluna bağlı mikrobiota və metabolit bolluğu xəstəlik nəticəsinə müstəqil təsir edə bilər. Bununla belə, lifin nəcisə həcm vermək kimi bağırsaq hərəkətlərindən asılı olmayan təsirləri var.

- Əlaqəli mövzu: Nə qədər lif qəbul etməliyik?

Mikrobiotaya təsir baxımından bütün liflər eyni deyil

Müəyyən lif növləri müəyyən bağırsaq bakteriyalarına substrat / xammal verir və yaranan biotransformasiya məhsullarının bəzisi icmadakı başqa bakteriyalar üçün substrat ola bilər.

Mikrobiota üzvlərinin çoxu mono və oliqosaxaridləri (sadə şəkərləri) metabolizə etməyə meyilli və bakteriyaların karbohidrat emal qabiliyyəti fərqli olduğundan mürəkkəb polisaxaridlərin yaxşı həzmi üçün bakteriyalararası çarpaz qidalanma vacibdir.

Bakteriyalararası çarpaz qidalanma istehlak edilən lif növündən asılı olaraq fərqli bakterial icma quruluşları yaradır. Buna görə lif növlərinin qəbulundakı dəyişiklik ümumi quruluş və funksiyada mürəkkəb dəyişikliklər doğura bilər.

Bağırsaq bakteriyalarının polisaxarid parçalayan fermentlərinin sayında böyük fərqlər var. Bəzi bakteriyalar, ümumi yönümlü sayılır və müxtəlif karbohidratları metabolizə edə bilir, bəziləri isə çox ixtisaslaşıb. Bacteroides thetaiotaomicron və Bacteroides intestinalis də daxil olmaqla, Bacteroidetes tipinin bir çox üzvü ehtimal olunan ümumi yönümlülərdir.

Mikrobiotanın digər üzvləri, məsələn, Prevotella copri və Rosaburia intestinalis ehtimal olunan mütəxəssislərdir.

Lif qəbulu və bakterial müxtəliflik tədqiqatında insan nəcisi 15 həzmolunmaz karbohidratla inkubasiya edilib. Nəticədə təkcə substrat növünün deyil, bakteriyalararası qarşılıqlı təsirin də KZYA növlərinin yaranmasında vacib olduğu göstərilib. Əsas KZYA-lərin - asetat, propionat və butiratın mikrobiotaya və sağlamlığa mühüm təsirlərini bilirik (baxın: Bağırsaq mikrobiotasının qidalanma və sağlamlıqda mühüm rolu).

Bəzi əsas bakteriyalar olmadıqda həzm prosesində çatışmazlıq yaranır

Tədqiqatçılar bəzi əsas bakteriyaların yoxluğunun həzmolunmaz karbohidrat fermentasiyasını azalda biləcəyini irəli sürdülər. Həmçinin butirat yaranmasında çalışan transferazların fəallığına təsir etməklə mühitin başlanğıc pH səviyyəsinin butirat istehsalını idarə edə biləcəyini bildirdilər.

Bunlar mikrobiota tərkibinin və KZYA istehsalının formalaşmasında lif növlərinin rolunu anlamağın mürəkkəbliyini göstərir.

Bir tədqiqatda 19 sağlam, piylənməsi olan kişi könüllüyə az karbohidratlı / lifli pəhriz verildi. Mikrobiota olan nəcisləri araşdırıldıqda Roseburia spp, Eubacterium rectale və Bifidobacteria sayında, eyni zamanda KZYA və butirat səviyyələrində azalma görüldü.

Lif qəbulundakı dəyişikliklərin mikrobiota tərkibinə nəsillərarası təsirləri ola bilər. Məsələn, artıq çəkili hamilələrdə lif qəbulu ilə mikrobiota müxtəlifliyi və zənginliyi arasında müsbət əlaqə görülüb. Siçanlarda az həzmolunmaz karbohidrat qəbulunun mikrobiota müxtəlifliyini azaltdığı müşahidə edilib. Vəziyyətin 4 nəsil davam etdiyi və hətta həzmolunmaz karbohidrat qəbulu artdıqdan sonra da geri dönmədiyi görülüb.

Nəticə

Ətraf mühit amillərinin balalara təsirini nəzərə alanda az lifli tipik Qərb pəhrizinin niyə uzunmüddətli yoluxucu olmayan xəstəliklərin tezliyini artırdığını daha yaxşı anlayırıq.

Yazının nəticəsi lif qəbulunun mikrobiotanın inkişafı və davamlılığı üçün lazımlı olmasıdır. Lif bakteriyaların davamlılığı və çoxalması üçün substratdır. Faydalı bakteriyalar bununla sayını artırır və müxtəlifləşir.

Həmçinin nişasta kimi həzm olunan və lif kimi həzm olunmayan, mürəkkəb karbohidratları istehlak etməyin əhəmiyyətini anladıq. Lif istehlakı müxtəlifləşdirilməli, tək qidadan deyil, müxtəlif mənbələrdən təmin edilməlidir. Beləliklə, fərqli bakteriyalar mövcudluğunu qoruyacaq və qarşılıqlı təsirləri nəticəsində sağlamlığa faydalı maddələr yaranacaq.