Kəskin mieloid leykozun müalicəsində Gemtuzumab Ozoqamisin FDA təsdiqi aldı

1 sentyabr 2017-də ABŞ Qida və Dərman İdarəsi FDA, yeni diaqnoz almış CD33 pozitiv kəskin mieloid leykozlu (AML) yetkin xəstələrin və təkrarlayan və ya müalicəyə davamlı CD33 pozitiv AML-li 2 yaş və yuxarı pediatrik və yetkin xəstələrin müalicəsində gemtuzumab ozoqamisini (ticarət adı Mylotarg) təsdiqlədi.

Gemtuzumab ozoqamisin 2000-ci ildə FDA tərəfindən fərqli xəstə qrupu üçün daha yüksək dozada və fərqli tətbiq sxemində təsdiqlənmişdi. Lakin 2010-cu ildə gemtuzumab ozoqamisin klinik tədqiqatlarda faydalarının təsdiqlənməməsi və təhlükəsizlik narahatlıqları (erkən ölümlər, venooklüziv xəstəliyin yaranması kimi) səbəbindən könüllü geri çəkilmişdi.

Gemtuzumab ozoqamisinin 1 sentyabr FDA təsdiqinə görə yeni diaqnozlu AML-li yetkinlərdə daunorubisin və sitarabin kimyaterapiyaları ilə kombinasiyada və ya müəyyən meyarlı yetkin və pediatrik xəstələrdə təkbaşına istifadə edilə bilər.

Gemtuzumab ozoqamisinin yetkinlərdə kimyaterapiya ilə kombinə istifadəsinin təsdiqi 50-70 yaş arasında yeni diaqnozlu 271 xəstəli çoxmərkəzli, randomizə edilmiş (1:1), açıq etiketli faza 3 tədqiqatına əsaslanır. Xəstələr daunorubisin 60 mg/m2 1-3 gün və sitarabin 200 mg/m2 1-7 gün kimyaterapiyası (n=135) və ya bu kimyaterapiya ilə gemtuzumab ozogamicin (n=136) 3 mg/m2 (maksimum 5 mg-a qədər) 1. 4. və 7. günlərdə almaq üçün təsadüfi qruplara ayrılmışlar.

Gemtuzumab ozoqamisin alanlarda təxmini orta hadisəsiz sağqalma müddəti (xəstəliyin irəliləməsi, ciddi yan təsir kimi müalicəyə təsir edən hadisələrə qədər müddət) 17.3 ay, yalnız kimyaterapiya alanlarda isə 9.5 ay bildirilmişdir. Gemtuzumab ozoqamisinin tək preparat kimi istifadəsi iki klinik tədqiqata əsaslanır. İlki gemtuzumab ozoqamisin monoterapiyasını ən yaxşı dəstəkləyici qulluqla müqayisə edən 237 xəstəli çoxmərkəzli, randomizə edilmiş (1:1), açıq etiketli faza 3 tədqiqatıdır. Yeni diaqnozlu AML-li, 75 yaşından böyük və ya 61-75 yaş arasında, Ümumdünya Səhiyyə Təşkilatı meyarlarına görə fəaliyyət vəziyyəti müəyyən səviyyədən yuxarı olan və ya intensiv kimyaterapiya istəməyən xəstələr daxil edilmişdir. İnduksiya müalicəsi zamanı gemtuzumab ozoqamisin 1. gün 6 mg/m2 və 8. gün 3 mg/m2 tətbiq edilmişdir. İnduksiyadan sonra xəstəliyi irəliləməyən və ya aydın toksiklik əlaməti olmayanlara gemtuzumab ozoqamisin 2 mg/m2 hər 4 həftədə 1, 8 kursa qədər davam müalicəsi kimi verilmişdir. İDB isə palliativ məqsədli standart dəstəkləyici qulluq tədbirlərini və hidroksiurea və ya digər antimetabolitləri əhatə edir. Təxmini orta ümumi sağqalma gemtuzumab ozoqamisin alanlarda 4.9 ay, İDB alanlarda 3.6 ay bildirilmişdir.

İkinci tədqiqat təkqollu, açıq etiketli, CD33 pozitiv AML-si olan və xəstəliyi ilk dəfə təkrarlamış 57 xəstəli faza 2 klinik tədqiqatdır. Xəstələrə gemtuzumab ozoqamisin 3 mg/m2 dozada 1, 4 və 7. günlərdə tək kurs verilmişdir. Konsolidasiya müalicəsi 3 gün ərzində 12 saatda bir venadaxili sitarabindən ibarətdir. On beş xəstədə gemtuzumab ozoqamisin müalicəsindən sonra tam cavab alınmışdır. Tam cavabın ilk sənədləşdirilməsindən təkrarlanma və ya ölüm tarixinə qədər orta sağqalma 11.6 ay olmuşdur.

Ən çox görülən yan təsirlər qanaxma, infeksiya, qızdırma, ürəkbulanma, qusma, qəbizlik, baş ağrısı, qaraciyər göstəricilərinin (ALT, AST) artması, səpgi və ağızdaxili infeksiyalardır. Gemtuzumab ozoqamisinlə əlaqəli ciddi yan təsirlər (arzuolunmaz reaksiyalar) qaraciyər toksikliyi (venooklüziv xəstəlik daxil), infuziya reaksiyaları (şiddətli allergik reaksiya daxil) və qanaxmadır.