Kimyaterapiya zamanı xərçəng xəstələrini rahatladacaq 10 fəaliyyət

Kimyaterapiya mərkəzində müalicənizi alarkən vaxtınızı ən yaxşı necə dəyərləndirə bilərsiniz?

Hər kimyaterapiya tətbiqi zamanı etməli olduğunuz başqa iş olmadığı üçün vaxt daha yavaş keçə bilər. Xüsusilə xəstəliyə qədər aktiv həyatınız olubsa, bir neçə saat hərəkətsiz oturmaq çox çətin gələ bilər. Bu prosesin öhdəsindən daha asan gəlmək üçün ediləcək 10 fəaliyyətə birlikdə baxaq.

1- Oxumaq

Kitab, qəzet, jurnal və ya komiks fərq etməz, sevdiyiniz hər şeyi oxuya bilərsiniz. Hətta bu günlərdə genişlənən səsli kitab tətbiqləri xoşunuza gələ bilər. Dostunuzun hədiyyə etdiyi kitabı oxumaq və ya qəzetlərdən gündəmi izləmək sizə zövq vermirsə, oxumağa məcbur deyilsiniz. Maraqlandığınız, sizi cəlb edən mənbədən faydalanın. Beləliklə vaxt daha sürətli keçərkən zövqlə yeni məlumat da əldə edə bilərsiniz.

2- Yazmaq

Yazmağın və gündəlik tutmağın terapevtik təsiri vardır. Hisslərinizi, yaşadıqlarınızı, duyğularınızı ifadə etmək və çatdırmaq üçün ən yaxşı yollardan biridir. Yazının sonunda rahatlıq hiss edərkən vaxtınız həm səmərəli, həm də daha sürətli keçəcək. Yazdıqlarınızı bloqda paylaşa, sevdiklərinizə məktub və ya kart yazıb paylaşa bilərsiniz. Paylaşmağı seçməsəniz belə, kimyaterapiya zamanı sizin üçün faydalı fəaliyyət kimi tövsiyə edirik.

3- Rəsm çəkmək / boyamaq

İncəsənətin duyğulara və müntəzəm edildikdə fiziki sağalmaya da töhfəsi vardır. Kimyaterapiya zamanı yanınıza kiçik eskiz-rəsm dəftəri və bir neçə rəngli qələm alıb edəcəyiniz qaralamalar, çoxdan çəkmək istədiyiniz rəsm və ya fiziki xəstəliyinizin yaratdığı duyğuları seçdiyiniz rənglərlə ifadə etmək sizi rahatladaraq yaxşı vaxt keçirməyinizə və stressdən qurtulmağınıza imkan verir. Mənim heç istedadım yoxdur deməyin, burada əsas gözəl rəsm çəkmək deyil; ürəyinizdən keçənləri qaralamaq və ya hazır mandalanın içini boyamaq belə yaxşı gələcək.

Marağınızı çəkə bilər:

• Bədii xərçəng terapiyaları

4- Əl işləri

Toxuculuq, tikiş, papaq hazırlamaq, fotoalbom yaratmaq kimi işlərlə yeni şeylər yarada bilərsiniz. Beləliklə vaxtınız dəyərlənib daha xoş keçə bilər. Hazırladıqlarınızı sevdiklərinizə hədiyyə edərək müsbət münasibətlərinizi gücləndirə bilərsiniz.

5- Musiqi dinləmək

Düzgün növ musiqinin sağaldıcı gücü vardır. Kimyaterapiya zamanı sizi xoşbəxt edən, rahatladan mahnıları dinləmək üçün siyahı hazırlaya bilərsiniz. Düzgün musiqi sizi emosional və zehni baxımdan rahatladır. Melanxolik, kədərli və bədbəxt xatirələri xatırladan musiqiləri dinləməyi tövsiyə etmirik.

6- Serial / film izləmək

Müalicə aldığınız məkanın imkanlarından istifadə edə və ya öz kompüterinizi, planşetinizi gətirərək serial və ya film zövqü yaşaya bilərsiniz. Mükafatlı, ilhamverici və ya komediya janrında serial və filmlərlə vaxt daha xoş və sürətli keçəcək.

7- Dua etmək, meditasiya və vizual təsəvvür

Narahat və stressli hiss etdiyiniz bu müddətdə düşdüyünüz mənfi vəziyyəti düşünməkdən uzaqlaşmaq üçün inancınıza uyğun dua edə, meditasiya və ya vizual təsəvvür məşqləri edə bilərsiniz. Mənfi duyğulardan qurtulmağa kömək edə bilən bu üsullar stress səviyyənizi də azaldaraq emosional vəziyyətinizi toparlamağa kömək edir. Məsələn, gözlərinizi yumub dünyada ən xoşbəxt olduğunuz yeri düşünərək zehində orada olduğunuzu, küləyi, quş səslərini, ətrafı, insanları və rəngləri oradaymış kimi təsəvvür edə və ya yenidən yarada bilərsiniz. Yuxu maskası və diz ədyalı duyğularınıza diqqət yetirmək və rahatlamaq üçün kömək edə bilər.

8- Oyun oynayın

Tək qalmaq istəsəniz pazl, sudoku kimi oyunlar, istəməsəniz digər xəstələr və ya yaxınlarınızla sevdiyiniz nərd, kart kimi oyunları oynaya bilərsiniz. Bu çətin prosesdə sevdiyiniz və diqqət yetirdiyiniz bu oyunlar cəmləndiyiniz və əyləndiyiniz fəaliyyətə çevrilə bilər.

9- İnternet və ünsiyyət

İnternetdə gəzə, xəbərlərə, fotolara, yeniliklərə, maraqlandığınız yemək reseptinə və ya virtual incəsənət sərgilərinə baxa, sosial mediada dostlarınızla əlaqə saxlaya bilərsiniz. Başqa insanlarla ünsiyyət özünüzü yaxşı hiss etməyə kömək edən digər üsul ola bilər. Digər tərəfdən, kompüterinizdə çoxdan nizamlamaq istədiyiniz fayllar, fotoalbomlar, lazımsız qeydlərin silinməsi və e-poçt təmizliyi kimi oturaq halda edilməli işləri görə bilərsiniz.

10- Yatın, dincəlin

Müalicələrin yan təsirləri həddindən artıq yorğunluq, ürəkbulanma və halsızlıq yarada bilər. Bunun üçün özünüzü ən rahat hiss etdiyiniz geyimləri geyinib səslərdən narahat olmamaq üçün qulaq tıxacınızı taxaraq yatmağa cəhd edə bilərsiniz.

Yalnız xəstələr deyil, xəstə yaxınları da bu fəaliyyətlərdən çox faydalanacaq. Kimyaterapiyadan əvvəl hələ evdə ikən nə edəcəyinizi planlaşdırıb gedə və həmin müddəti daha yaxşı dəyərləndirə bilərsiniz.