Neoadyuvant-adyuvant durvalumab əməliyyat edilə bilən ağciyər xərçəngində FDA təsdiqi aldı

15 avqust 2024-cü ildə FDA (ABŞ Qida və Dərman İdarəsi) durvalumab (Imfinzi, AstraZeneca) və platin əsaslı kimyaterapiyanı əməliyyatdan əvvəl (neoadyuvant müalicə) və sonra (adyuvant müalicə) tətbiq üçün təsdiqlədi. Bu təsdiqə görə durvalumab əməliyyatdan əvvəl kimyaterapiya ilə birlikdə, əməliyyatdan sonra isə tək müalicə kimi istifadə olunacaq. Təsdiq şişlərində epidermal böyümə faktoru reseptoru (EGFR) mutasiyaları və ya anaplastik limfoma kinaz (ALK) yenidən düzülmələri olmayan, cərrahi çıxarıla bilən (şiş ≥ 4 cm və/və ya limfa düyünü müsbət) qeyri-kiçik hüceyrəli ağciyər xərçəngi (KHDAK) olan yetkin pasiyentləri əhatə edir.

AEGEAN tədqiqatı ilə gələn FDA təsdiqi

Bu müalicənin effektivliyi əvvəllər müalicə almamış, cərrahi çıxarıla bilən yastı hüceyrəli və ya qeyri-yastı hüceyrəli KHDAK (mərhələ IIA-dan seçilmiş mərhələ IIIB-yə qədər) olan 802 pasiyentin daxil olduğu AEGEAN adlı randomizə edilmiş, ikiqat kor, plasebo-nəzarətli, çoxmərkəzli tədqiqatda qiymətləndirilib. Pasiyentlər platin əsaslı kimyaterapiya ilə birlikdə durvalumab və ya plasebo almaq üçün 1:1 nisbətində randomizə edilib. Bu müalicə hər 3 həftədə bir, ən çox 4 dövr ərzində (neoadyuvant müalicə) tətbiq edilib, sonra hər 4 həftədə bir, ən çox 12 dövr ərzində durvalumab və ya plasebo ilə davam etdirilib (adyuvant müalicə).

Tədqiqatın əsas effektivlik nəticə meyarları kor müstəqil mərkəzi qiymətləndirmə ilə hadisəsiz sağqalım (EFS= event free survival) və kor mərkəzi patoloji qiymətləndirmə ilə patoloji tam cavab (pCR= Pathologic Complete Response) faizləri olub.

• Durvalumab qrupunda median EFS-ə çatılmayıb (95% CI: 31,9, hesablanmayan [NE]), plasebo qrupunda isə 25,9 ay olub (95% CI: 18,9, NE) (risk nisbəti 0,68 [95% CI: 0,53, 0,88]; p-dəyəri=0,0039).
• Durvalumab və plasebo qruplarında pCR faizləri müvafiq olaraq 17% (95% CI: 13, 21) və 4,3% (95% CI: 2,5, 7) bildirilib.

Əvvəlcədən müəyyən edilmiş aralıq analizlər zamanı ümumi sağqalım statistik əhəmiyyətlilik üçün rəsmi yoxlanılmayıb.

Yan təsirlər

Müalicə ilə əlaqəli ən geniş yayılmış (20% və ya daha çox) yan təsirlər anemiya, ürəkbulanma, qəbizlik, yorğunluq, əzələ-skelet ağrısı və səpgi olub. Neoadyuvant durvalumab alan pasiyentlərin 1,7%-i yan təsirlər səbəbindən cərrahi müdaxilə ala bilməyib, plasebo qrupunda bu göstərici 1% olub.

Doza və tətbiq

Bədən çəkisi ≥ 30 kg olan pasiyentlər üçün tövsiyə olunan durvalumab dozası hər 3 həftədə bir (neoadyuvant müalicə) və hər 4 həftədə bir (adyuvant müalicə) 1500 mg-dır. Bədən çəkisi < 30 kg olan pasiyentlər üçün tövsiyə olunan doza 20 mg/kg-dır. Durvalumab kimyaterapiya ilə eyni gündə verildikdə kimyaterapiyadan əvvəl tətbiq edilməlidir.

*

Əməliyyat edilə bilən ağciyər xərçəngində FDA təsdiqləri

Durvalumabın təsdiqi ilə əməliyyat edilə bilən qeyri-kiçik hüceyrəli ağciyər xərçəngi üçün FDA-dan ümumilikdə 5 fərqli müalicə təsdiqi alınmış oldu. Bunlardan atezolizumab və pembrolizumab adyuvant, nivolumab neoadyuvant, pembrolizumab və durvalumab isə perioperativ (həm neoadyuvant, həm də adyuvant) müalicə kimi təsdiqlənib.

Bu FDA təsdiqlərindən başqa, CheckMate 77T tədqiqatı ilə nivolumabın perioperativ müalicə kimi FDA təsdiqi alması gözlənilir. Bu tədqiqatın nəticələri 15 may 2024-cü ildə NEJM jurnalında dərc edilib. Tədqiqatda median 25,4 aylıq izləmənin sonunda əməliyyatdan əvvəl və sonra nivolumab alan pasiyentlərin xəstəliksiz sağqalım faizi 70,2%, yalnız kimyaterapiya verilən pasiyentlərdə isə 50% olub.