Rəhbəriniz Sizi Necə Qiymətləndirir? Məhsuldarlıq və Daha Artığı

Dr. Susan Rogers (əsl adı deyil) həkim işlədiyi Şərq Sahilindəki böyük uşaq xəstəxanasında ildə bir dəfə rəsmi qiymətləndirmədən keçir. Hər iyunda nəzarətçisi və pediatriya şöbəsinin rəhbəri ilə oturub birlikdə ötənilki, fəaliyyəti qiymətləndirilir. Bir çox meyarda uğurlu olarsa, qazancının %5-i qədər, əlavə ödəniş alır.

Qiymətləndirmək, ya Qiymətləndirməmək... Bütün Məsələ Budurmu?

Həkimlərin fəaliyyət qiymətləndirməsi adətən illik prosesdir və məhsuldarlıq ölçüləri yalnız bir hissəsidir (Rogers proses məxfi sayıldığı üçün öz və xəstəxanasının adının istifadə olunmamasını rica edib). Bir neçə həftə əvvəl prosesi tamamlayan Rogers qiymətləndirməni ümumən müsbət qarşılayır. "Bu qiymətləndirmə olmasaydı, işləmək üçün başqa yer axtarardım” deyir. "Lakin prosesdə yalnız keyfiyyətə görə qiymətləndirilirsiniz, nisbi dəyər vahidlərinə (relative value units = RVUs) və ya hesab-fakturalara görə deyil". Qeyd: Nisbi dəyər vahidləri ABŞ-ın "Medicare" (dövlətə bağlı tibbi sığorta) kompensasiya düsturunda həkim xidmətləri üçün istifadə edilən dəyər ölçüsüdür. RVU-lar resurs əsaslı nisbi dəyər şkalasının hissəsidir. Rogers rəhbərləri ilə şəxsi məqsədlərini müəyyən edib onlara çatmaq irəliləyişini sonrakı illik baxışda qiymətləndirməyi sevir. Məqsədlərinin çoxu işinin %75-ni təşkil edən tədqiqat müqavilələridir. Digər tərəfdən xəstəxananın RVU-ları ilə ölçülən öz fəaliyyətinin qiymətləndirilməsi onu az maraqlandırır. Daha çox araşdırma ilə məşğul olduğundan RVU-lar iş vaxtının yalnız kiçik hissəsini əhatə edir. Mükafatlar "pilləkən pillələri" və ya uğur səviyyələri üzrə ödənildiyindən asan əldə edilən şəkildə qurulub; məqsədə qismən çatan həkimlər də müəyyən ödəniş ala bilir.

Mükafat Yetərli Təşviqdirmi?

Yenə də Rogers mükafatın yaxşı təşviq olmadığını deyir. %5 məbləğin onu həvəsləndirməyə yetmədiyini, təsirin fəaliyyət, şəxsi məqsədlərə çatma və keyfiyyət göstəriciləri kimi fərqli ölçülərə bağlı olduğundan daha da azaldığını bildirir.

Komanda Əvəzinə Şəxsi Qiymətləndirmək

Keyfiyyət göstəriciləri yalnız Rogersi deyil, komandasını qiymətləndirir, çünki hər xəstənin müalicəsində hamısı birlikdə işləyir. Tipik göstəricilər "mərkəzi kateterlə əlaqəli infeksiyalar" və "kateterlə əlaqəli sidik yolu infeksiyaları"dır; bəziləri hər il dəyişir. Rogers komanda qaydasından razıdır. Hər üzv digərlərinin komanda məqsədi üçün çox işləməsini təmin etmək üçün ölçünün "çempionu" olur. Xəstəxananın bütün sahələrindəki RVU-larla birlikdə Rogersin qiymətləndirmə ölçülərini öz şöbə rəhbəri müəyyən edir. Fərqli şöbələrdəki həkimlərin fərqli rəhbərləri olduğundan ölçülər dəyişə bilər. Başqa şöbə "xəstə məmnuniyyəti", "başqaları ilə ünsiyyət" və ya "işçilərlə uyğunluq" kimi insan bacarıqlarına yönələ bilər. Digər təşkilatlar isə "xəstə dosyesində qeydləri tamamlamaq" kimi inzibati məqsədlərə üstünlük verə bilər. Rogers xəstəxanasının bunu rəsmi qiymətləndirmədən kənarda nəzərdən keçirdiyini bildirir. "Qeydlərini tamamlamayan həkimlər işdən müvəqqəti kənarlaşdırıla bilər" deyir. "Son tarix yaxınlaşanda xəstəxana xəbərdarlıq etməyə başlayır".

Niyə Bəzi Həkimlər Müntəzəm Qiymətləndirilmir (və ya Heç Qiymətləndirilmir)

İşçi həkimlərin illik qiymətləndirilməsi böyük səhiyyə sistemlərində, xəstəxana və klinikalarda demək olar məcburidir, lakin kiçik kabinetlərdə və bəzi kiçik xəstəxanalarda nadir ola bilər. Virginia ştatının Charlottesville şəhərində pediatr işləyən Dr. Rebecca Fox: "Bir çox klinikada illik qiymətləndirmə yoxdur; olduqda isə çox qeyri-rəsmi və müəyyən meyarsız keçirilə bilir" şərhini verir. Fox, qiymətləndirən şəxs olmağın necə olduğunu son işində, baş həkim olduğu 12 həkim və 6 tibb bacısından ibarət pediatriya qrupunda öyrənir. Hələ quruma ortaq olmamış həkimlərə müxtəlif qiymətləndirmə prosesləri təqdim etdiyini, lakin yaxşı nəticələnmədiyini bildirir. Hər prosesin zəif nöqtələri vardı. Çoxlu meyarla başladığını və bunun həkimləri çaşdırdığını deyir. Hərf qiymətləndirməsi istifadə edib, lakin bəzi həkimlər A-dan aşağı aldıqda, narahat, hətta təşvişli olduqlarını söyləyir. Həkimlərdən özünüqiymətləndirmə istəyir, lakin tamamlamaq həftələr çəkir. Nəhayət görüş məcburiyyətini ləğv etdi. Yazılı qiymətləndirmə göndərilir, sonra həkimlər cavab və ya düzəlişlərini yazılı göndərirlər; lakin bu da həftələr çəkir. Problem əməkdaşlıq üçün yetərli maliyyə təşviqinin olmaması idi. Müsbət qiymətləndirmə çox vaxt yalnız kiçik gündəlik xərcləri ödəyəcək dəyişikliklər verirdi.

"Ortaq Olduqda Artıq Qiymətləndirilmirsiniz. Evlənmək Kimidir. Artıq Ayrıla Bilmirsiniz."

O yalnız yeni işçi həkimləri qiymətləndirir. "Ortaq olduqda artıq qiymətləndirilmirsiniz" deyir. "Evlənmək kimidir. Artıq ayrıla bilmirsiniz". Yenə də rəsmi qiymətləndirmə işçi həkimlərə kömək edə bilir. "Qiymətləndirmə ilə yeni ortaqda görmək istədiyiniz vərdişləri qazanmalarına kömək edə bilərsiniz." Bir çox klinika sadəcə fəaliyyətə görə mükafatlandırır, lakin Fox digər davranışları da təşviq etmək istəyirdi. "Çox məhsuldar həkiminiz ola bilər, lakin xəstələr və əməkdaşlar onu sevməyə bilər" deyir. "Yaxud çox səmərəsiz, amma hamı ilə münasibəti yaxşı həkiminiz ola bilər" deyə əlavə edir. "Çox yavaş, amma hamı ilə yaxşı münasibətli həkimimiz vardı. Onu saxladıq, lakin ortaq etmək daha uzun çəkdi." Foxa görə illik qiymətləndirmənin dəyərli cəhəti işçi həkimin ortaq olma vaxtının çatıb-çatmadığını toplanmış materiallarla daha məlumatlı qərarlaşdırmaqdır. "Qiymətləndirmə olmadan bütün təfərrüatları xatırlaya bilməzsiniz". Həkim ortaq olmayıb məhkəməyə müraciət edərsə, qiymətləndirmə materialları klinikanın müdafiəsinə də kömək edə bilər. - Marağınızı çəkə bilər: RƏQƏMSAL SƏHİYYƏ niyə MƏYUSLUQ yaratdı və bunu necə düzəltməli?

Xəstəxana Rəhbərinin Baxışı

Columbusda Ohio State University Wexner Medical Center East Hospitalın tibbi direktoru, pulmonoloq Dr. James Allen böyük təşkilatda həkimlər qiymətləndiriləndə rəhbərliyin məqsədlərini ödəməli olduqlarını deyir. Tibbi direktor kimi Allen xəstəxanadakı qiymətləndirmələri idarə edib. "Həkimlər özəl qrupda olanda ölçüləri öz aralarında müəyyən edə bilirdilər" deyir. "Lakin indi ölçülər barədə öz fikri olan rəhbərliklə məşğul olmalıdırlar. Xəstəxana özü üçün həqiqətən dəyərli ölçünün qiymətləndirilməsini istəyir. Bu, xəstə məmnuniyyəti və ya təkrar qəbul nisbəti ola bilər." Qiymətləndirmə meyarları dəstinin hazırlanması hər iki tərəfin birgə işini tələb edir. "Xəstəxana rəhbərliyi həkimlərlə mükafatların təyinində qarşılıqlı qəbul edilən ölçüləri müəyyən etməlidir" deyir. "Xəstəxana qısa yatış, yüksək xəstə məmnuniyyəti, aşağı ölüm və xəstəbaşına xərc istəyir. Həkimlər isə yaxşı xəstə nəticələri və böyük xəstə sayı istəyir. Hər iki tərəf ortaq nöqtələri tapmalıdır." Sonra bütün potensial meyarlar əlavə ödəniş mükafatı verən kiçik siyahıya endirilməlidir. "Mükafat sadə olmalıdır" deyir. "4-dən çox ölçü varsa, nəyi təşviq etməyə çalışdığınız bilinməyəcək." Rogers kimi bir çox həkim mükafatdan təşviq kimi istifadəni nəzərə almasa da, Allen bunlara güclü inanır. "Həkimləri zəhmətin mükafatlandırılmadığı mühitə qoysanız, çox işləməyi dayandıracaqlar" deyir. "Bir çox fərqli klinikada bunu görmüşəm." Lakin mükafatın arzuolunmaz nəticələr verə biləcəyini də qəbul edir. "Məsələn, yalnız RVU-lara əsasən mükafat versəniz, hesablandırılan görüşlər az olduqda heç kimin gecə növbəsində qaldığını görməzsiniz" deyir. Buna görə qarışıq metriklərin tərəfdarıdır. "Fəaliyyət ölçüsü və keyfiyyət ölçüsü olduqda biri digərini nəzarətdə saxlayır" deyir. "Həkim məhsuldardır və fəaliyyət məqsədinə çatır".

Əks Təsirli Qiymətləndirmə Metrikləri

Qismən təqaüddə olan, American College of Physicians (ACP) fəaliyyət ölçüləri komitəsinin üzvü, Alabama ştatının Birmingham şəhərində internist Dr. Robert Centor RVU-ların və digər fəaliyyət ölçülərinin bir çox qiymətləndirmə üçün mühüm olduğunu, lakin, həkimləri çox sürətli işləməyə məcbur etdiyini bildirir. Centor, "Medicare proqramı RVU-ları təqdim edəndə həkimləri hər xəstəyə daha az vaxt ayırmağa təşviq etdi" deyir. "Rəhbərliyin məqsədi gəliri maksimuma çatdırmaqdır. Buna görə həkimlərə xəstəbaşına 15-20 dəqiqə ayırmağı deyirlər. Nəticədə həkimlər vizitdə xəstədən xəstəyə qaçır və stres yaranır." "Beethovenin 5-ci Simfoniyasını daha qısa çəksin deyə sürətləndirsəniz, hər şeyi məhv edərsiniz." Dr. Robert Centor; Alabama ştatının Birmingham şəhərində internist. O, "Digər sahələrin istehsal ölçülərinin səhiyyəyə uyğun olmadığını" bildirir. "Sənaye alətləri yaratmaqda təsirlidir, lakin səhiyyə və musiqi kimi fəaliyyətlərdə mənasızdır. Beethovenin 5-ci Simfoniyasını daha qısa çəksin deyə sürətləndirsəniz, hər şeyi məhv edərsiniz”. "Məhsuldarlıq həm də qənaətcil deyil" deyir. Gəlib-gedən xəstələr sistemə daha çox xərc yaradır. Əlavə test və məsləhət istəyirsiniz. Təşkilat daha çox qazana bilər, lakin sığorta şirkətləri daha çox ödəməlidir. Buna görə bir çox təşkilat məhsuldarlıq ölçülərindən uzaqlaşıb əməkdaşın həqiqi fəaliyyət ölçülərinə yönəlir. Bunlara xəstə məmnuniyyəti sorğuları, ölüm və diabet nisbətləri kimi nəticə ölçüləri, infarkt xəstələrinə aspirin vermək kimi proses ölçüləri daxildir. "Kənardan fəaliyyət ölçüləri çox yaxşı fikir kimi görünür" deyir Centor. "Lakin bir neçə aşkar çatışmazlıq var." Centor və digərləri bu problemləri müəyyən etdilər: Məntiqli olmaya bilərlər. Bəzi ölçülər sürətlə, pilot tədqiqat aparılmadan hazırlanır və ya ölçülməsi çətin meyarlar əhatə edir. Centorun ACP komitəsi 2018-ci ildə ümumi daxili xəstəliklərə aid 86 fəaliyyət ölçüsünü təhlil edən tədqiqat dərc edib və, ölçülərin yalnız %37-nin elmi baxımdan məntiqli olduğu qənaətinə gəlib. Bəzi həkimlər üçün ədalətli olmaya bilər. Yaxşılaşma ehtimalı az və ya tibbi tövsiyəyə əməl etməyən xəstələri olan həkimlər nəticə ölçülərində pis görünəcəklər. Sistemdən sui-istifadəni təşviq edir. Bəzi həkimlər nəticə ballarını artırmaq üçün daha xəstə və ya tövsiyələrə az əməl edənlərdən qaça bilər. Məsələn, təşkilata az gəlir verən aşağıgəlirli xəstələri qəbul etməyə bilərlər. Bir sahəyə həddən artıq yönələ bilər. Eyni ölçü hər il istifadə olunduqda təsirini itirir, bu arada digər vacib ölçülər nəzərdən qaça bilər. Centora görə qiymətləndirənlər köhnə məqsədlərə çatdıqda yeni ölçüyə keçməlidir. "Fəaliyyət boşluğu aradan qalxdıqda yenidən ona yönəlməyə səbəb yoxdur" deyir. Çox fayda verməyən problemlərə yönələ bilərlər. Proses ölçülərini nəticə ölçülərindən asan təyin etmək olur; çünki dərhal qərar verilə bilir və adətən sadə məlumat ehtiva edir, lakin istənilən faydanı verməyə bilər. Məsələn, bir çox təşkilat, mammoqrafiya və ya qrip peyvəndi alan xəstələrin faizini izləyir. Bir çox həkim bunu optimal ölçü saymır. Centor həkimlə fəaliyyət barədə söhbətin ölçünün hesabatından daha dəyərli olduğunu da deyir. Məsələn, həkimin mərkəzi kateterlə bağlı infeksiyalı xəstəsi çoxdursa, bu ölçünü necə qarşılayacağı müzakirə olunmalıdır. "Şöbə rəhbəri" zəif fəaliyyətli həkimə müraciət edib, "Daha yaxşı işləməyə çalışmağınıza necə kömək edə bilərik?" sualını verə bilər. Həkimlər belə dəstəyə daha çox əməkdaşlıqla cavab verirlər.

• Hələ mentorun yoxdurmu? Mentorluq nədir?