Üçlü neqativ süd vəzi xərçəngində əməliyyatdan sonra ən yaxşı müalicə seçimi

Üçlü (triple) neqativ süd vəzi xərçəngi hüceyrələrinin səthində estrogen reseptoru (ER), progesteron reseptoru (PR) olmayan, HER2 reseptorunun həddindən artıq çoxalmaması ilə fərqlənən süd vəzi xərçəngi alt növüdür. Bütün süd vəzi xərçənglərinin təxminən %15-ni təşkil edir. Daha tez bölünmə, çoxalma və metastaz verməyə meyillidir; buna görə kimyaterapiyaya daha həssasdır. Təxminən %11-i irsi xərçəng genləri (BRCA 1-2) ilə bağlıdır və daha erkən yaşlarda görülməyə meyillidir.
Erkən aşkarlananda standart müalicə əməliyyat və sonra adjuvant (qoruyucu) kimyaterapiyadır. 13 avqust 2020-ci ildə JAMA Oncology jurnalında dərc olunan PATTERN adlı geniş tədqiqata görə bu xərçəngin ən yaxşı adjuvant müalicə forması karboplatin və paklitaksel ikili kimyaterapiya rejimi kimi görünür.
Bu randomizə edilmiş (xəstələrin təsadüfi seçildiyi) III faza klinik tədqiqat Çində bir çox mərkəzdə aparılıb.
Tədqiqatın əhəmiyyəti
Əvvəllər GeparSixto və CALGB 40603 tədqiqatları ilə üçlü neqativ süd vəzi xərçəngində platin qrupu kimyaterapiyanın neoadjuvant (əməliyyatdan əvvəl) və palliativ (irəliləmiş mərhələdə) təsiri göstərilib, beynəlxalq təlimatların tövsiyəsi ilə rutin istifadəyə daxil olub. PATTERN isə bu dərmanların adjuvant effektivliyini aydın göstərən, təlimatlardakı klinik praktikanı dəyişdirmək potensialı yüksək nəticələr verən ilk tədqiqatdır.
Tədqiqatın təfərrüatları
- Xəstələr 2011-ci ilin iyulundan 2016-cı ilin aprelinədək daxil edildi.
- Median izləmə 62 ay idi.
- Daxilolma meyarları:
- 18-70 yaşlı qadın olmaq,
- Əməliyyat oluna bilən üçlü neqativ süd vəzi xərçənginə malik olmaq, əvvəllər neoadjuvant kimyaterapiya almamaq,
- Əməliyyatda qoltuqaltı limfa düyünü metastazı və ya şiş diametrinin 1 cm-dən böyük olması,
- ümumi funksional vəziyyət balının 0-1 olması,
- Qan, böyrək və qaraciyər göstəricilərinin yetərli olması kimi müəyyən edildi.
Nəticələr
- Meyarlara uyğun 647 xəstə daxil edildi: 325 xəstə 6 kurs “karboplatin-paklitaksel”, 322 xəstə “3 kurs FEC 3 kurs dosetaksel” qrupuna.
- Heç bir qrupda kimyaterapiyanın yan təsirindən ölüm olmadı. Müalicənin tamamlanması və doza azaldılması ehtiyacı baxımından fərq yox idi.
- Regional və uzaq metastaz və ya residiv (xərçəngin təkrarı) baxımından karboplatin-paklitaksel qrupu standart FEC-dosetakseldən əhəmiyyətli üstün oldu.
- 5 illik xəstəliksiz sağqalım karboplatin-paklitakseldə %86.5, FEC-dosetakseldə %80.5 idi. Karboplatin-paklitakselin standart müalicəyə nisbətən təkrarlanma/metastaz riskini %35 azaltdığı görüldü.
- 5 illik ümumi sağqalım karboplatin-paklitakseldə %93.4, FEC-dosetakseldə %89.8 idi.
Nəticə olaraq bu məlumatlar platin qrupu kimyaterapiyanın üçlü neqativ süd vəzi xərçənginin adjuvant müalicəsində də standart olmasını güclü dəstəkləyir və klinik praktikanı dəyişdirən xarakter daşıyır.
Mənbələr
Effect of Adjuvant Paclitaxel and Carboplatin on Survival in Women With Triple-Negative Breast Cancer
A Phase 3 Randomized Clinical Trial.
JAMA Oncol. Published online August 13, 2020.
Bu məqalə sizə faydalı oldu?
Rəyiniz məzmunumuzu yaxşılaşdırmağa kömək edir.





Oxucu şərhləri
Şərhinizi paylaşın
Adınız və şərhiniz yalnız administrator təsdiqindən sonra dərc olunur. E-poçt ünvanınız ziyarətçilərə heç vaxt göstərilmir.
İlk şərhi siz yazın.