დოსტარლიმაბმა dMMR-დადებითი კიბოებისთვის FDA-ს დამტკიცება მიიღო

2021 წლის 17 აგვისტოს FDA-მ (აშშ-ის სურსათისა და მედიკამენტების ადმინისტრაციამ) დაჩქარებული დამტკიცება მიანიჭა იმუნოთერაპიის პრეპარატ დოსტარლიმაბ-gxly-ს (Jemperli, GlaxoSmithKline LLC) მორეციდივე ან შორს წასული მყარი (ორგანული) კიბოს მქონე ზრდასრული პაციენტებისთვის, რომლებსაც აქვთ გენეტიკური დარღვევა — „DNA-ის შეუსაბამობის რეპარაციის დეფიციტი“ (dMMR), წინა მკურნალობის შემდეგ დაავადება პროგრესირებს და დამაკმაყოფილებელი მკურნალობის სხვა ვარიანტი არ გააჩნიათ.

ამავე დროს FDA-მ დაამტკიცა VENTANA MMR RxDx Panel, როგორც თანმხლები სადიაგნოსტიკო მოწყობილობა დოსტარლიმაბ-gxly-ით მკურნალობისთვის შესაბამისობის დასადგენად.

დოსტარლიმაბმა მანამდე, 2021 წლის 22 აპრილს, FDA-ს დამტკიცება მიიღო dMMR-დადებითი, მორეციდივე ან შორს წასული ენდომეტრიუმის (საშვილოსნოს) კიბოს მკურნალობისთვის (იხილეთ შესაბამისი დამტკიცება).

• მნიშვნელოვანი სიახლე: სწორი ნაწლავის კიბოს დროს ოპერაციამდე ჩატარებულ იმუნოთერაპიაზე 100 პროცენტიანი პასუხი

რა არის dMMR?

dMMR (mismatch repair deficient) არის დარღვევა, რომელიც უჯრედში DNA-ის სათანადო აღდგენაზე მოქმედებს და სიმსივნურ ქსოვილში ჩატარებული  გენეტიკური ტესტებით  განისაზღვრება.

რა არის დოსტარლიმაბი?

დოსტარლიმაბი (Jemperli) PD-1-ს უკავშირდება და ამ მოლეკულის PD-L1-სა და PD-L2-თან ურთიერთქმედებას ბლოკავს. ის  იმუნური საკონტროლო წერტილის ინჰიბიტორების  კლასის ახალი თაობის იმუნოთერაპიაა.

PD-1 იმუნური სისტემის უჯრედების ზედაპირზეა, ხოლო PD-L1 და PD-L2 იმუნურ უჯრედებსა და კიბოს ზოგიერთ უჯრედზე გვხვდება.

უჯრედების ზედაპირზე PD-1-ისა და PD-L1-L2-ის ურთიერთქმედების ბლოკირება ორგანიზმის იმუნურ სისტემას კიბოს უჯრედების წინააღმდეგ ბრძოლაში ეხმარება. ეს იმუნოთერაპია სპეციალურად dMMR ენდომეტრიუმის კიბოს სამიზნედ შესარჩევად შეიქმნა.

GARNET კვლევა

დოსტარლიმაბის ეფექტიანობა შეფასდა GARNET-ში — არარანდომიზებულ, მულტიცენტრულ, ღია, მრავალკოჰორტულ კლინიკურ კვლევაში. ეფექტიანობის შეფასების ჯგუფი შედგებოდა 209 პაციენტისგან, რომლებსაც სისტემური მკურნალობის შემდეგ დაავადება პროგრესირებდა და დამაკმაყოფილებელი ალტერნატიული მკურნალობა არ ჰქონდათ, ან ჰქონდათ შორს წასული dMMR-დადებითი მყარი სიმსივნეები.

ეფექტიანობის პირველადი საბოლოო წერტილები, რომლებიც RECIST 1.1-ის მიხედვით ბრმა დამოუკიდებელი ცენტრალური შეფასებით განისაზღვრა, იყო საერთო პასუხის მაჩვენებელი და პასუხის ხანგრძლივობა.

• საერთო პასუხის მაჩვენებელი 41,6% იყო; სრული პასუხი — 9,1% და ნაწილობრივი პასუხი — 32,5% (95% სანდოობის ინტერვალი: 34,9, 48,6).
• პასუხის ხანგრძლივობის მედიანა 34,7 თვე იყო (დიაპაზონი 2,6, 35,8+); ამ პაციენტების 95,4%-ში პასუხის ხანგრძლივობა ≥ 6 თვე იყო.

dMMR-დადებითი პაციენტების ამ ჯგუფში დოსტარლიმაბის ყველაზე გავრცელებული (≥20%) გვერდითი ეფექტებია დაღლილობა/ასთენია, ანემია, დიარეა და გულისრევა. მე-3 ან მე-4 ხარისხის ყველაზე გავრცელებული გვერდითი ეფექტები იყო ანემია, დაღლილობა/ასთენია, ტრანსამინაზების მომატება, სეფსისი და თირკმლის მწვავე დაზიანება. დოსტარლიმაბ-gxly-ს ასევე უკავშირდება იმუნურად განპირობებული არასასურველი რეაქციები, მათ შორის პნევმონიტი, კოლიტი, ჰეპატიტი, ენდოკრინოპათიები, ნეფრიტი და დერმატოლოგიური ტოქსიკურობა.

დოსტარლიმაბის რეკომენდებული დოზაა 500 mg ყოველ 3 კვირაში პირველი 1-დან მე-4 ციკლამდე, 30 წუთის განმავლობაში ინტრავენური ინფუზიის სახით. მე-4 დოზიდან 3 კვირის შემდეგ დაწყებული მომდევნო დოზაა 1000 mg ყოველ 6 კვირაში.