HER2-müsbət əzələyə invaziv sidik kisəsi xərçəngində disitamab vedotin və toripalimab

HER2-müsbət, əzələ qatına yayılmış sidik kisəsi xərçənginin müalicəsində disitamab vedotin və perioperativ toripalimab kombinasiyası mühüm irəliləyiş kimi önə çıxır. 2025 ASCO Genitourinar Xərçənglər Simpoziumunda təqdim olunan 2-ci faza araşdırması kombinasiyanın təsirini göstərib.

Sidik kisəsi xərçəngində HER2-müsbətlik

27 yanvar 2025 tarixində  Biol Proced Online jurnalında dərc olunan məqaləyə görə əzələyə invaziv sidik kisəsi xərçəngi (KİMK) xəstələrində HER2-müsbətlik 57,6% olub (IHK 2+ və ya 3+). Araşdırmada 217 xəstədən 125 nəfər HER2-müsbət olub.

Sidik kisəsi xərçəngində HER2-müsbətlik xərçəng hüceyrələrinin səthində HER2 reseptorlarının çox olduğunu, bu reseptorların böyüməyə və yayılmaya kömək etdiyini göstərir. HER2 (Human Epidermal Growth Factor Receptor 2) normalda hüceyrə böyüməsi və bölünməsini tənzimləyən zülaldır. Xərçəng hüceyrələrində həddindən artıq ifadə olunanda isə nəzarətsiz böyüməyə və xəstəliyin irəliləməsinə səbəb ola bilər.

Disitamab vedotinin təsir mexanizmi necədir?

Disitamab vedotin HER2-hədəfli antikor-dərman konjuqatıdır (AİK). Preparatda xərçəng hüceyrələrinin səthində həddindən artıq ifadə olunan HER2 zülalına xüsusi antikor var. Antikor HER2 reseptoruna bağlandıqdan sonra preparat hüceyrəyə daxil olur, antikora birləşdirilmiş sitotoksik agent (kimyaterapiya) sərbəst buraxılır. Bu maddə mikrotubul şəbəkəsini hədəfləyərək hüceyrə bölünməsini əngəlləyir və hüceyrə ölümünə səbəb olur.

Toripalimabın təsir mexanizmi necədir?

Toripalimab immun nəzarət nöqtəsi inhibitoru olan, PD-1 (Programmed Death-1) reseptoruna bağlanaraq işləyən monoklonal antikordur. PD-1 immun sisteminin, xüsusilə T hüceyrələrinin xərçəng kimi anormal hüceyrələrə cavabını zəiflədən reseptordur. Toripalimab PD-1-ə bağlanaraq bu inhibisiyanı bloklayır və T hüceyrələrinin xərçəng hüceyrələrinə hücumuna imkan verir. 

Yeni RC48-C017 araşdırmasının təfərrüatları

Çində aparılan araşdırmaya HER2-müsbət (IHK 2+ və 3+) əzələyə invaziv sidik kisəsi xərçəngi (KİMK) diaqnozu olan, radikal sistektomiya və çanaq limfa düyünü disseksiyasına uyğun xəstələr daxil edilib.

Xəstələr əməliyyatdan əvvəl 6 sikl ərzində hər iki həftədən bir 2 mg/kg disitamab vedotin və 3 mg/kg toripalimab alıb. Əməliyyatdan sonra 20 siklədək 3 mg/kg toripalimab tətbiq olunub.

47 xəstənin median yaşı 64 (aralıq 30-82) olub, 72,3% hissəsi kişi idi. Əksəriyyətdə (76,6%) saf urotelial karsinoma, 27,7% hissəsində isə PD-L1-müsbət xəstəlik aşkarlanıb.

Əməliyyat olunan 33 xəstədən 16 nəfər adyuvant müalicə alıb; əməliyyatdan sonrakı ağırlaşma tezliyi 45,5% olub. Ən çox stoma yerində infeksiya (15,2%) və əməliyyatdan sonrakı ağrı (12,1%) müşahidə olunub.

Patoloji tam cavab tezliyi 63,6%, patoloji cavab tezliyi isə 75,8% olub.

Əməliyyat olunanlarda median hadisəsiz sağqalıma çatılmayıb; 12 aylıq hadisəsiz sağqalım 92,5%, 18 aylıq isə 85,9% olub. Həmin xəstələrdə 12 aylıq ümumi sağqalım 95,5% olub.

Neoadyuvant müalicə alanların hamısında arzuolunmaz hadisə qeydə alınıb; 27,7% hissəsində 3-cü dərəcə və daha ağır hadisə olub. Müalicə ilə əlaqəli arzuolunmaz hadisə tezliyi 97,9%, 3-cü dərəcə və daha ağır müalicə ilə əlaqəli hadisə tezliyi 21,3% olub. Ən çox alopesiya (42,6%), aspartat aminotransferaza (AST) və alanin aminotransferazanın (ALT) artması, asteniya, hipertriqliseridemiya və çəki itkisi görülüb.

Nəticələr neoadyuvant disitamab vedotin və perioperativ toripalimabın HER2-müsbət MIBC xəstələrində ümidverici təsir və qəbuledilən təhlükəsizlik profili verdiyini göstərir. Bu tapıntılar əzələyə yayılmış sidik kisəsi xərçənginin idarəsinə yeni və təsirli yanaşma təqdim edərək bu çətin xəstəliklə mübarizədə mühüm addım yaradıb.