Kiçik hüceyrəli ağciyər xərçənginin birinci xətt müalicəsində Durvalumab immunoterapiyası FDA təsdiqi aldı

İrəliləmiş mərhələ kiçik hüceyrəli ağciyər xərçənginin birinci xətt müalicəsi üçün durvalumab (Imfinzi) adlı immunoterapiya dərmanı etoposid və karboplatin və ya sisplatin kimyaterapiyaları ilə birlikdə istifadə üçün 27 mart 2020-də FDA təsdiqi aldı.

Kiçik hüceyrəli ağciyər xərçəngi (KHAK) bütün ağciyər xərçənglərinin təxminən % 15-ni təşkil edən, demək olar ki, hamısına siqaretin səbəb olduğu neyroendokrin şişdir. Kiçik hüceyrəli ağciyər xərçəngi hüceyrələri kiçik hüceyrəli olmayan ağciyər xərçəngi hüceyrələrindən daha sürətlə böyüyüb bölünür və daha erkən metastaz verir.

Kiçik hüceyrəli ağciyər xərçəngi diaqnoz zamanı əsasən 4-cü mərhələdəolur və müalicəsində istifadə edilən dərmanların sayı və növü digər ağciyər xərçənglərindən azdır. Belə ki, 40 il ərzində irəliləmiş kiçik hüceyrəli ağciyər xərçənginin birinci xətt (başlanğıc) müalicəsində, 18 mart 2019-da atezolizumab (Tecentriq) FDA təsdiqi alanadək dəyişiklik olmamışdı və bu xəstələrin median ümumi sağqalımı təxminən 10 ay idi. Həmçinin KHAK həm kimyaterapiyaya, həm də radioterapiyaya yüksək cavab versə də, müalicəyə baxmayaraq aylar içində xərçəng təkrarlanır.

CASPIAN tədqiqatı ilə Durvalumabın kiçik hüceyrəli ağciyər xərçəngində FDA təsdiqi

4 oktyabr 2019-da The Lancet jurnalında yayımlanan CASPIAN tədqiqatı irəliləmiş kiçik hüceyrəli ağciyər xərçənginin birinci xətt müalicəsinə daha bir yeni seçim gətirdi: anti-PD-L1 immunoterapiyası durvalumab (Imfinzi).

CASPIAN tədqiqatına irəliləmiş mərhələdə olan, əvvəllər kimyaterapiya almamış 500-dən çox xəstə daxil edildi. Standart platin+etoposid ikilisinə durvalumab əlavə edilməsi yalnız platin + etoposidlə müqayisədə ömrü əhəmiyyətli uzatdı: 13 aya qarşı 10.3 ay. Bu tədqiqatın sağqalım və yan təsir nəticələri əvvəllər kiçik hüceyrəli ağciyər xərçənginin birinci xətt müalicəsində atezolizumaba FDA təsdiqi gətirən IMpower133 tədqiqatının nəticələrinə bənzəyirdi.

Durvalumab və etoposid-platin üçlü rejimində ən çox (≥%20) görülən yan təsirlərürəkbulanma, yorğunluq və saç tökülməsidir.

Tövsiyə edilən doza: İrəliləmiş kiçik hüceyrəli ağciyər xərçəngində durvalumab eyni gün kimyaterapiyadan əvvəl veriləcək. Etoposid və karboplatin və ya cisplatin ilə istifadə ediləndə tövsiyə olunan durvalumab dozası kimyaterapiyadan əvvəl hər 3 həftədə 1500 mg, sonra isə tək dərman kimi hər 4 həftədə birdir.

Qeyd: Bu, durvalumabın aldığı 3-cü FDA təsdiqidir. Əvvəllər may 2017-də irəliləmiş sidik kisəsi xərçənginin ikinci xətt müalicəsi və fevral 2018-də əməliyyatla çıxarıla bilməyən III mərhələ kiçik hüceyrəli olmayan ağciyər xərçənginin saxlayıcı müalicəsi üçün FDA təsdiqi almışdı. Bu immunoterapiya hələ ölkəmizdə istifadəyə verilməyib.