Müalicəyə davamlı 4-cü mərhələ kolorektal xərçəng üçün yeni hədəfli dərman: Fruquintinib

ESMO Konqresi 2022-də təqdim edilmiş faza 3 klinik tədqiqatının nəticələrinə görə, müalicəyə davamlı metastatik kolorektal xərçəngi olan xəstələrdə ən yaxşı dəstəkləyici qayğıya fruquintinib adlı oral dərmanın əlavə edilməsi sağqalım nəticələrini yaxşılaşdırır.

Fruquintinib FRESCO-2 klinik tədqiqatında həm proqressiyasız (irəliləməsiz) həm də ümumi sağqalımı yaxşılaşdırdı.

Tədqiqatı təqdim edən, Hyustondakı Texas Universitetinin MD Anderson Xərçəng Mərkəzindən Dr. Nageshwara Arvind Dasari dedi: "Bu nəticələr əvvəlki FRESCO tədqiqatına uyğundur və metastatik kolorektal xərçəngi olan xəstələr üçün yeni, klinik təcrübəni dəyişdirmək potensialı olan, qlobal oral müalicə variantını dəstəkləyir və bu xəstələr üçün ardıcıl müalicə imkanlarını zənginləşdirir".

Xəstələr plasebo və ən yaxşı dəstəkləyici qayğı (230 xəstə) və ya fruquintinib və ən yaxşı dəstəkləyici qayğı (461 xəstə) almaq üçün təsadüfi olaraq iki qrupdan birinə bölündülər. Fruquintinib gündə 5 mg verildi, 3 həftə dərman qəbulundan sonra 1 həftə fasilə edildi. Xəstələr xəstəlik proqressiyasına və ya qəbuledilməz yan təsirə qədər müalicə olundular.

• Başlanğıcda median yaş hər iki qolda 64 idi (ümumi aralıq, 25-86). Xəstələrin əksəriyyəti kişi idi (fruquintinib qolunda 53,1% və plasebo qolunda 60,9%). Metastatik xəstəlik üçün əvvəllər hər iki qrup median 5 xətt müalicə almışdı (aralıq, fruquintinib qolunda 2-16; plasebo qolunda 2-12). 
• Median izləmə müddəti fruquintinib qolunda 11,3 ay və plasebo qolunda 11,2 ay idi.
• Median ümumi sağqalım fruquintinib qolunda 7,4 ay və plasebo qolunda 4,8 ay idi (təhlükə nisbəti [HR], 0,662; 95% Eİ, 0,549-0,800; P <0,001). Bu, həyat itkisi riskinin 34% azalmasına uyğun gəlir.
• Median proqressiyasız sağqalım müvafiq olaraq 3,7 ay və 1,8 ay idi (HR, 0,321; 95% Eİ, 0,267-0,386; P <0,001).
• Alt qrup təhlillərində proqressiyasız sağqalım bütün qruplarda fruquintinibin xeyrinə, ümumi sağqalım isə demək olar ki, bütün qruplarda fruquintinibin xeyrinə idi. Ümumi sağqalım təhlilində istisna "digər" irq kateqoriyasındakı xəstələr idi (Asiya, afroamerikalı və ya Qafqaz irqinə qarşı).
• Təsdiqlənmiş ümumi cavab faizi fruquintinib qolunda 1,5% və plasebo qolunda 0% oldu ( P =0,059). Xəstəliyə nəzarət faizi müvafiq olaraq 55,5% və 16,1% idi ( P <0,001). 
• 3-cü dərəcəli və ya daha yüksək, müalicə zamanı yaranan yan təsirlər fruquintinib qolundakı xəstələrin 62,7%-sində və plasebo qolundakıların 50,4%-ündə meydana gəldi.
• Fruquintinib qolunda ən çox rast gəlinən 3-cü dərəcəli və ya daha yüksək, müalicə zamanı yaranan yan təsirlər hipertoniya (13,6%), asteniya/zəiflik (7,7%) və əl-ayaq sindromu (6,4%) idi. Dolayı müqayisə aparsaq, regorafenib üçün 3-cü dərəcəli və ya daha yüksək yorğunluq faizi 15%-dir.
• 3-cü dərəcəli və ya daha yüksək, müalicə ilə əlaqəli yan təsirlərin faizi fruquintinib qolunda 36% və plasebo qolunda 11,3% idi. Fruquintinib qolunda yan təsirlər xəstələrin 54,2%-sində dozanın dayandırılmasına, 24,1%-ində dozanın azaldılmasına, 20,4%-ündə müalicənin dayandırılmasına və 10,5%-ində həyat itkisinə səbəb olmuşdur.

Fruquintinib nəticələri 2018-ci ildə JAMA-da dərc edilmiş ilk FRESCO tədqiqatının məlumatları əsasında, üçüncü xətt müalicədən etibarən metastatik kolorektal xərçəng üçün Çində təsdiq almışdı və ABŞ FDA təsdiqinin tezliklə verilməsi gözlənilir. İndi isə mühüm sual budur: Ffruquintinib yan təsirləri artırmadan effektivliyi daha da yaxşılaşdırmağa çalışmaq üçün bu mərhələdəki xəstələrin standart müalicəsi olan trifluridin-tipirasil (Lonsurf) kimi digər təsdiqlənmiş preparatlarla kombinə edilə bilərmi?