MUC-1 peyvəndi ilə süd vəzi xərçənginin müalicəsində yeni üfüqlər

Xərçəng hüceyrələrinin səthindəki MUC-1 zülalını hədəfləyən bu eksperimental peyvənd tədqiqatı, indiyədək aparılmış ən uğurlu süd vəzi xərçəngi peyvəndi tədqiqatı kimi diqqət çəkir. Tədqiqatda MUC-1 peyvəndi tecemotide ilə standart neoadjuvant sistemik müalicə kombinasiyasının süd vəzi xərçəngi olan xəstələrdə uzaq residivsiz sağqalma və ümumi sağqalma göstəricilərini əhəmiyyətli dərəcədə artırdığı göstərilmişdir. Bu nəticələr süd vəzi xərçənginin müalicəsində peyvəndlərin potensialını və effektivliyini sübut edən ilk konkret məlumatları təqdim edərək gələcək tədqiqatlar üçün ümidverici zəmin yaradır.

Erkən mərhələli süd vəzi xərçəngi olan xəstələri əhatə edən bu tədqiqat ASCO 2024 Konqresində təqdim olunub.

Məqalədə adı çəkilən mühüm terminlər və izahları:

• MUC-1: MUC-1 müxtəlif xərçəng növlərində həddindən artıq ekspressiya olunan zülaldır. Bu zülala qarşı hazırlanmış peyvəndlər immun sistemini xərçəng hüceyrələrinə hücum etməyə təşviq edir.
• Tecemotide: MUC-1-ə qarşı hazırlanmış peptid peyvəndidir.
• Neoadjuvant müalicə: Əməliyyatdan əvvəl tətbiq edilən müalicələrdir.
• Uzaq residivsiz sağqalma: Xəstənin xərçəng başqa nahiyəyə yayılmadan sağ qaldığı müddət.
• Patoloji tam cavab: Müalicədən sonra bütün xərçəng hüceyrələrinin yox olduğu vəziyyət.
• Qalıq xərçəng yükü (Residual cancer burden, RCB): Müalicədən sonra qalan xərçəng hüceyrələrinin miqdarı.

ABCSG 34 tədqiqatı

Vyana Tibb Fakültəsində ginekologiya şöbəsinin müdiri olan Dr. Singer və komandası HER2-mənfi erkən mərhələli süd vəzi xərçəngi olan 400 xəstəni prospektiv, çoxmərkəzli, iki qollu faza 2 ABCSG 34 tədqiqatında əməliyyatdan əvvəl standart neoadjuvant müalicə və ya bu müalicəyə əlavə olaraq tecemotide (MUC-1-i hədəfləyən xərçəng peyvəndi) almaq üçün təsadüfi qaydada seçmişlər.

• Əlaqəli mövzu: İmmunoterapiya və xərçəng peyvəndlərinin növləri

Tədqiqatın dizaynı

Postmenopauzal (menopauzaya daxil olmuş) süd vəzi xərçəngi xəstələrindən luminal A şişləri olanlara standart müalicə kimi 6 ay letrozol verilmişdir. Kimyaterapiyanın standart müalicə olduğu postmenopauzal üçlü mənfi süd vəzi xərçəngi, luminal B şişləri olan xəstələr və tədqiqata qatılan bütün premenopauzal iştirakçılar isə hər 3 həftədən bir dörd sikl epirubisin, siklofosfamid və dosetaksel almışlar.

Tədqiqatın birincili sonlanma nöqtəsi əməliyyat zamanı qalıq xərçəng yükü olmuşdur.

Uzunmüddətli nəticələr uzaq residivsiz sağqalma və ümumi sağqalma əsasında təhlil edilmişdir. Uzunmüddətli nəticələrə dair məlumatlar 291 qadın üçün mövcud olub, onlardan 236-sı standart müalicə kimi kimyaterapiya almışdır.

Nəticələr

• 7 illik izləmənin nəticələri:

  • Tecemotide və standart müalicə kombinasiyasını alan xəstələrin 81%-i 7 ildən sonra hələ də sağdır və metastazdan-uzaq yaşayır.
  • Yalnız standart müalicə alan xəstələrdə 7 ilin sonunda metastazsız ümumi sağqalma göstəricisi 65% olmuşdur.
  • Standart müalicəyə tecemotide peyvəndinin əlavə edilməsi uzaq residiv riskini 47% azaltmışdır [təhlükə nisbəti (HR): 0,53 (95% CI, 0,34-0,83; P = 0,005)].

• Ümumi sağqalma göstəriciləri:

  • Tecemotide + standart müalicə alan xəstələr: 83%
  • Yalnız standart müalicə alan qrup: 68% (ümumi sağqalma üçün HR 0,53; 95% CI, 0,33-0,85; P = 0,008).

• Əməliyyat zamanı qalıq xərçəng yükü:

  • Tecemotide və neoadjuvant standart müalicə alan xəstələrdə yalnız standart müalicə alan xəstələrlə müqayisədə əməliyyat zamanı qalıq xərçəng yükündə əhəmiyyətli artım müşahidə edilməmişdir.
    • Tecemotide qolunda qalıq xərçəng yükü: 36,4%
    • Yalnız standart müalicə qrupunda: 31,5%
    • Kimyaterapiya qrupunda tecemotide ilə standart müalicə: 40,5%
    • Kimyaterapiya qrupunda yalnız müalicə: 34,8%
    • Bu fərqlər statistik cəhətdən əhəmiyyətli deyildi (P = 0,42 və P = 0,37).

Şərh

Əməliyyat zamanı qalıq xərçəng yükündə əhəmiyyətli fərqin olmaması patoloji tam cavab və qalıq xərçəng yükü ölçülərinin xərçəng peyvəndi tədqiqatları üçün yetərli sonlanma nöqtələri olmadığını və yeni prediktiv/proqnostik markerlər tapmalı olduğumuzu göstərir. Bu mövzuda daha ətraflı araşdırıcı tədqiqatlara ehtiyac var.

Nəticə etibarilə tecemotide və kimyaterapiya qrupu uzaq residivsiz sağqalma və ümumi sağqalma göstəricilərində diqqətəlayiq nəticələr əldə edib. Tecemotide və kimyaterapiya qrupunda uzaq residivsiz sağqalma göstəricisi 81%, standart müalicə qrupunda isə 65% müəyyən edilib. Ümumi sağqalma göstəriciləri isə tecemotide qrupunda 84%, standart müalicə qrupunda 68% qeydə alınıb.

Tədqiqatçılar tecemotide-in ağciyər, süd vəzi və potensial olaraq MUC-1 ekspressiya edən digər xərçənglərdə cavabı daha da artırıb-artırmayacağını araşdıran klinik tədqiqatlar görmək istəyirlər. Bu tədqiqatlar tecemotide-in effektivliyini daha geniş sahədə sınaqdan keçirməyi hədəfləyir.

Gələcəkdə faza 3 MUC-1 xərçəng peyvəndi tədqiqatları, ehtimal ki, mRNA texnologiyası ilə aparılacaq. Bu, xərçəng peyvəndlərinin hazırlanmasında yeni mərhələdən xəbər verir. Həmçinin peyvəndin bəzən nə üçün təsir göstərdiyini, bəzən isə nə üçün göstərmədiyini başa düşməliyik. Bu mövzuda aparılacaq tədqiqatlar peyvəndin effektivliyini artırmaq və daha geniş xəstə qrupuna fayda vermək potensialına malikdir.