Oturaq həyat tərzi ilə xərçəngin dözülməz dostluğu!

ABŞ-da Roswell Park Xərçəng İnstitutunun tədqiqatçılarının apardığı yeni tədqiqatda oturaq həyat tərzi ilə böyrək və sidik kisəsi xərçənginin inkişaf riski arasında əlaqə olduğu ortaya qoyuldu.

Xərçəng Epidemiologiyası Jurnalında dərc olunan məqalədə, böyrək xərçəngi diaqnozlu 160, sidik kisəsi xərçəngi diaqnozlu 208 və nəzarət qrupunu təşkil edən 766 şəxs tədqiqata daxil edilib, ömürboyu fiziki hərəkətsizliyin böyrək və ya sidik kisəsi xərçənginin inkişaf riski ilə əlaqəli olub-olmadığını müəyyən etmək üçün araşdırılıb.

Çoxdəyişənli loqistik reqressiya təhlilindən istifadə edən komanda ömürboyu davam edən fiziki hərəkətsizlik, yəni oturaq həyat ilə xərçəng arasında əhəmiyyətli müsbət əlaqələr olduğunu müşahidə etdi; nəticələrə görə böyrək xərçənginin inkişaf riski %77, sidik kisəsi xərçənginin inkişaf riski %73 artdı. Tədqiqatda piylənmə ilə bu xərçəng növləri arasında aydın əlaqə müəyyən edilmədi.

Müəlliflər oturaq həyatın xərçəng üçün mühüm və müstəqil risk amili ola biləcəyinə dair elmi sübutların gündən-günə artdığını, bu xərçəng növləri ilə əlaqənin tam izahı üçün daha geniş iştiraklı, əhatəli tədqiqatlara ehtiyac olduğunu vurğuladılar.

Tədqiqatçılar “insanların oturaq həyatdan imtina edərək fiziki fəaliyyət - məşq etməyə həvəslənməsini ümid edirik” deyirlər. “Xərçəng riskinizi azaltmaq üçün marafon qaçmağa ehtiyac yoxdur, amma bir şey etməlisiniz. Liftə minmək əvəzinə pilləkəndən istifadə etmək, günorta vaxtı uyğundursa iş yerinizin ətrafında gəzmək, marketə gedəndə avtomobilinizi bir qədər uzaqda saxlayıb yeriməyə çalışmaq kimi kiçik səylər belə fayda verəcək” dedilər.

Roswell Parkın Xərçəngin Qarşısının Alınması və Nəzarət Şöbəsindən Dr. Cannioto tədqiqat haqqında dedi: “Nəticələrimiz sağlam həyat tərzini təmin etmək üçün bunun nə qədər vacib olduğunu vurğulayır”.

Dəyərli oxucularımız, hamımızın arzusundakı sağlam həyat və xərçəng kimi son dərəcə sarsıdıcı xəstəlik qrupu ilə mübarizəmiz əslində heç də çətin deyil. Bütün xəstəliklərdə olduğu kimi, xərçəngdə də əsas hədəfimiz profilaktik üsullar olmalıdır. Gündəlik həyatımızda sadə və düzgün qaydaları tətbiq edərək təkcə xərçəngin deyil, ölümcül ola və ya daimi zədə yarada bilən çoxsaylı xroniki xəstəliklərin qarşısını ala bilərik.