Üçlü mənfi süd vəzi xərçəngində immunoterapiya ömür müddətini nəzərəçarpacaq dərəcədə uzadır

Erkən mərhələli üçlü/triple mənfi süd vəzi xərçəngi (TNMK) hormon-müsbət və ya HER2-müsbət süd vəzi xərçəngləri ilə müqayisədə müalicə seçimlərinin məhdud olduğu və daha əlverişsiz gedişə malik xərçəng alt növüdür. Buna görə immunoterapiyaların müalicəyə inteqrasiyası xəstələr üçün mühüm ümid mənbəyidir. 26 iyul 2021-ci ildə FDA, neoadjuvant (əməliyyatdan əvvəl kiçildici) müalicə kimi kimyaterapiya ilə birlikdə və sonra adjuvant (əməliyyatdan sonra) tək vasitə kimi davam etdirilmək şərtilə pembrolizumab adlı immunoterapiyanı yüksək riskli, erkən mərhələli üçlü mənfi süd vəzi xərçəngi üçün təsdiqləmişdi. Bundan əvvəl isə PD-L1-müsbət metastatik TNMK xəstələrində kimyaterapiya ilə birlikdə pambrolizumab istifadəsi təsdiqlənmişdi. ESMO 2024 Konqresində isə erkən mərhələli TNMK-də pembrolizumabın FDA təsdiqini almasına əsas verən KEYTNOTE-522 tədqiqatının uzunmüddətli ümumi sağqalım nəticələri təqdim olundu və müalicənin effektivliyi sübuta yetirildi.

KEYNOTE-522-nin yekun nəticələri

KEYNOTE-522 tədqiqatının yekun nəticələri pembrolizumabın müalicə rejiminə inteqrasiyasının xəstələrin müalicəsini köklü dəyişdirdiyini təsdiqləyir. Lakin xəstələrin diqqətlə seçilməsi və yan təsirlərin yaxından izlənməsi böyük əhəmiyyət daşıyır.

Araşdırmanın əhəmiyyəti və nəticələri

Faza III KEYNOTE-522 tədqiqatı əvvəllər patoloji tam cavab (pTY) və hadisəsiz sağqalım kimi birgə birincili sonlanma nöqtələrində statistik və klinik əhəmiyyətli yaxşılaşmalar göstərmişdi. Bu yaxşılaşmalar erkən mərhələli 1174 üçlü mənfi süd vəzi xərçəngi (TNMK) xəstəsində standart kimyaterapiyaya pembrolizumab əlavə edilməsi ilə əldə olunub.

Yekun təhlildə median 75,1 aylıq izləmənin sonunda pembrolizumab qrupundakı 784 xəstədən 115-i (14,7%), nəzarət qrupundakı 390 xəstədən isə 85-i (21,8%) vəfat edib. Risk nisbəti (HR) 0,66 və 95% etibarlılıq intervalı (Eİ) 0,50–0,87 olmaqla tədqiqatın əvvəlcədən müəyyənləşdirilmiş əhəmiyyətlilik həddi olan p=0,0015 dəyərinə çatılıb.

5 illik ümumi sağqalım nisbətləri pembrolizumab qrupunda 86,6%, plasebo qrupunda isə 81,7% olub. Eynilə, 5 illik hadisəsiz sağqalım (EFS) nisbəti pembrolizumab qrupunda 81,2%, plasebo qrupunda isə 72,2% olub (HR 0,65; 95% Eİ 0,51–0,83).

Klinik praktikaya təsiri

Plasebo qrupunda 5 illik hadisəsiz sağqalım 72,2% olduğundan bir çox xəstənin yalnız kimyaterapiya ilə yaxşı nəticə əldə etdiyini unutmamaq lazımdır. Bu, immunoterapiyanın yan təsirlərindən yayınmaq üçün hansı xəstələrin immunoterapiyaya ehtiyac olmadan əlverişli gedişə malik ola biləcəyini müəyyənləşdirməli olduğumuzu göstərir.

Pembrolizumab alan xəstələrin 35%-ində, plasebo alanların isə 13,1%-ində immun vasitəli yan təsirlər bildirilib. Bu yan təsirlər əməliyyatdan əvvəlki dövrdə cərrahiyyəni gecikdirib xəstənin nəticələrini riskə ata bildiyindən əhəmiyyətlidir. Bir çox ölkədə immunoterapiyanın bu vəziyyətdəki xəstələrin müalicəsi üçün ödənişinin qarşılanmadığını da nəzərə alaraq pembrolizumabın müalicə rejimlərinə inteqrasiyası maliyyə baxımından diqqətlə qiymətləndirilməlidir.

Araşdırmada pembrolizumab qrupunda müalicəyə bağlı ≥3-cü dərəcəli yan təsir nisbəti 77,1%, plasebo qrupunda isə 73,3% olub. Buna görə uzunmüddətli təhlükəsizliyin izlənməsi mühüm əhəmiyyət daşıyır və potensial sağqalım faydası ilə toksiklik riski arasındakı tarazlığın qiymətləndirilməsi vacib olacaq.

Diqqət çəkən digər müalicə üsulları

Kimyaterapiya və immunoterapiya kombinasiyalarının yan təsirləri nəzərə alınaraq konqresdə təqdim edilmiş kəşfedici tədqiqat şişi infiltrasiya edən limfositləri (TILs) yüksək olan TNMK xəstələrində qısamüddətli, kimyaterapiyasız neoadjuvant müalicəni araşdırıb. Nivolumab və ipilimumab və ya nivolumab və LAG3 inhibitoru relatlimab kombinasiyaları əməliyyatdan əvvəl tətbiq edilib. Patoloji tam cavab nisbətləri nivolumab + ipilimumab qrupunda 33%, nivolumab + relatlimab qrupunda isə 47% olub. Yan təsirlər baxımından nivolumab + ipilimumab qrupundakı xəstələrin 23,3%-ində 3-4-cü dərəcəli yan təsirlər yaranıb. Kimyaterapiya olmadan əldə edilən bu ümidverici effektivlik məlumatları yan təsirlər idarə oluna bildiyi halda xüsusilə nivolumab + ipilimumab kombinasiyası üçün diqqətəlayiqdir.

Nəticə

Nəticə etibarilə, hər iki araşdırma xəstələrin diqqətlə seçilməsi və izlənməsi zərurətini vurğulayır. Erkən mərhələli TNMK üçün daha az yan təsirli kimyaterapiya rejiminə doğru irəliləməyi hədəfləyən bu müalicə strategiyaları daha da təkmilləşdirilməlidir. Eyni zamanda biomarker araşdırmaları, immunoterapiyadan ən çox faydalanacaq xəstələrin daha düzgün müəyyənləşdirilməsinə kömək edə bilər. Uzunmüddətli yan təsirlərin izlənməsi və xəstəyə məxsus müalicə yanaşmalarının araşdırılması da fərdiləşdirilmiş müalicə seçimlərinin inkişafına töhfə verəcək.