Uveal (göz) melanoma üçün ilk dəfə müalicə FDA təsdiqi aldı: tebentafusp-tebn

HLA-A*02:01-müsbət, cərrahi çıxarıla bilməyən və ya metastatik uveal (göz) melanomalı yetkin xəstələrin müalicəsi üçün T-hüceyrə gücləndirici zülal quruluşlu molekul tebentafusp-tebn (Kimmtrak, Immunocore Limited) 25 yanvar 2022 tarixində FDA (ABŞ Qida və Dərman İdarəsi) təsdiqi aldı.

Göz melanoması nədir?

Uveal (göz) melanoma dəri xərçənglərinin təxminən %5-ini təşkil edən və aqressiv gedişli bədxassəli melanomanın nadir alt növüdür. Uveal melanoma gözün piqment hüceyrələrində başlayır (aşağıdakı şəklə baxın).

Melanomaların əksəriyyəti dəri səthi mənşəlidir və bu növlər üçün pembrolizumab kimi immunoterapiyalar əksər xəstələrdə təsirlidir, lakin intraokulyar (gözdaxili) melanomalarda zəif qalır. Uveal melanoma xəstələrinin təxminən %50-si diaqnoz anında metastatik (4. mərhələ) mərhələdədir və ən çox qaraciyər metastazı var; bu, pis proqnozla (xəstəlik gedişatı) əlaqəlidir.

Kimmtrakın təsir mexanizmi necədir?

Təsiredici maddəsi tebentafusp (kod adı IMCgp100) olan Kimmtrak uveal melanoma hüceyrələrinin səthində təqdim edilən HLA-A*02:01 qlikoprotein 100-ə (gp100) güclü bağlanan həll olan T-hüceyrə reseptoru və anti-CD3 anticisimdən ibarətdir.

gp100 zülalı melanoma hüceyrələrinin yüksək, normal melanositlər və digər toxumaların isə zəif ifadə etdiyi şişlə əlaqəli antigendir (TAA).

FDA təsdiqini gətirən IMCgp100-202 tədqiqatı

Tebentafuspun təsiri metastatik uveal melanomalı 378 xəstənin qatıldığı randomizə edilmiş, açıq etiketli, çoxmərkəzli IMCgp100-202 tədqiqatında qiymətləndirilib. Xəstələr testlə HLA-A*02:01 genotip müsbət olmalı idi. Əvvəllər hər hansı müalicə (sistemik və ya qaraciyərə yönəlmiş lokal müalicə) almış xəstələr çıxarıldı. Oliqometastatik xəstəliyin əvvəlki cərrahi rezeksiyasına icazə verildi. Klinik əhəmiyyətli ürək xəstəliyi və ya əlamətli, müalicə edilməmiş beyin metastazı olanlar çıxarıldı.

252 xəstə tebentafusp-tebn, 126 xəstə tədqiqatçının seçiminə görə pembrolizumab, ipilimumab və ya dakarbazin almaq üçün 2:1 nisbətində randomizə edildi. Tebentafusp-tebn xəstəlik irəliləyənədək və ya qəbuledilməz toksiklik yarananadək hər həftə 1. gün 20 mcg, 8. gün 30 mcg, 15. gün 68 mcg və sonrakı həftələrdə venadaxili infuziya ilə verildi. Əsas effektivlik meyarı ümumi sağqalma idi. Əlavə effektivlik nəticəsi RECIST 1.1-ə görə tədqiqatçının qiymətləndirdiyi proqressiyasız (irəliləməsiz) sağqalma (PFS) oldu.

Bu tədqiqatın 3 illik sağqalma məlumatları 14 dekabr 2023 tarixində NEJM jurnalında dərc edildi.

Nəticələr

• Median ümumi sağqalma tebentafusp alan xəstələr üçün 21.6 ay (%95 GA: 18.6, 28.6), tədqiqatçı seçimi qolunda 16.9 ay (%95 GA: 9.7, 18.4) idi (HR=0.51, %95 GA: 0.37, 0.71 , p<0.0001).
• Tebentafusp alanlarda median proqressiyasız sağqalma 3.3 ay (%95 GA: 3-5), tədqiqatçı seçimi qolunda 2.9 ay (%95 GA: 2,8-3) idi (HR=0.73, 95% CI: 0.58, 0.94, p=0.0139).
• 3. ildə tebentafusb qolunda sağqalma %27, nəzarət qolunda %18 idi.

Əlavə təsirlər

Ən geniş yayılmış mənfi reaksiyalar (≥%30) sitokin sərbəstləşməsi sindromu, səpki, qızdırma, qaşınma, yorğunluq, ürəkbulanma, titrəmə, qarın ağrısı, ödem, hipotenziya, quru dəri, baş ağrısı və qusma idi. Ən geniş yayılmış laboratoriya anormallıqları (≥%50) limfosit sayının azalması, kreatinin, qlükoza, aspartat aminotransferaza və alanin aminotransferazanın artması, hemoqlobin və fosfatın azalması idi.

Tebentafusp ilə sitokin sərbəstləşməsi sindromu geniş yayılsa da (% 89), 3–4 dərəcəli sindrom çox az idi (% 1).

Doza

Venadaxili tətbiq edilən tebentafusp-tebnin tövsiyə olunan dozası:

• 1. gün 20 mcg,
• 8. gün 30 mcg,
• 15. gün 68 mcg və
• Sonra həftədə bir dəfə 68 mcg.

*

Immunocore həll olan T hüceyrə reseptoru texnologiyası ilə bioloji dərmanları araşdırıb hazırlayan, Birləşmiş Krallığın Oxfordshire bölgəsində yerləşən və 2008 tarixindən fəaliyyət göstərən qlobal klinik mərhələli biotexnologiya şirkətidir.

Aşağıdakı video şirkət tərəfindən tebentafusp-tebn təsir mexanizmini izah etmək üçün hazırlanıb.