Covid-19-ის შესახებ პრეპრინტის სახით გამოქვეყნებულ D ვიტამინის კვლევებს სიფრთხილით უნდა მივუდგეთ

Covid-19 -ის დიაგნოზით ჰოსპიტალიზებულ პაციენტებში მიცემული D ვიტამინით სიკვდილიანობის 60%-ით შემცირების მაჩვენებელი წინასწარი კვლევა მრავალი ექსპერტის კრიტიკას შეხვდა; ისინი შედეგების ინტერპრეტაციისას სიფრთხილისაკენ მოუწოდებდნენ.

რა არის პრეპრინტი? აკადემიურ / სამეცნიერო საგამომცემლო საქმიანობაში პრეპრინტი სტატიის წინასწარი ვერსიაა, რომელიც რეცენზირებად აკადემიურ ან სამეცნიერო ჟურნალში ოფიციალურ შეფასებამდე ქვეყნდება. მისი ინგლისური შესატყვისია preprint ; ასეთი სტატიები Covid-19-ის პანდემიის პერიოდში სხვადასხვა ფაქტორის გამო ჩვეულებრივზე ბევრად უფრო ხშირად გამოჩნდა.

აღფრთოვანებისა და კითხვის ნიშნების გამომწვევი პრეპრინტი

Barna-COVIDIOL კვლევის პრეპრინტში აღწერილია, რომ Covid-19-ის გამო ჰოსპიტალიზებული და კალციფედიოლით (D ვიტამინით) ნამკურნალები 551 პაციენტიდან 36 (6,5%) გარდაიცვალა, მაშინ როცა კალციფედიოლის არმიმღები საკონტროლო ჯგუფის 379 პაციენტიდან 57 (15%) დაიღუპა (სიკვდილიანობის სხვაობისათვის P = 0,001).

ამ პრეპრინტის შედეგებმა ბრიტანელი პოლიტიკოსი David Davis Covid-19-ის მქონე პაციენტებში D ვიტამინის ფართოდ გამოყენების მოწოდებისაკენ უბიძგა. Davis-მა Twitter-ზე განაცხადა: „ამ ფართომასშტაბიანი და კარგად ჩატარებული კვლევის შედეგები უნდა მოჰყვეს იმას, რომ ეს მკურნალობა ყველა საავადმყოფოში Covid-ის მქონე ყველა პაციენტს ჩაუტარდეს, განსაკუთრებით გრილი კლიმატის მქონე ადგილებში.

D ვიტამინსა და Covid-ით სიკვდილიანობას შორის მკაფიო მიზეზობრივი კავშირია… გაერთიანებული სამეფოს მთავრობამ ყველა მოწყვლადი ჯგუფისათვის უფასო D ვიტამინის დოზა და ხელმისაწვდომობა უნდა გაზარდოს.“ – თქვა მან.

სინამდვილეში როგორ არის საქმე?

კვლევა მთლიანად უნდა უარვყოთ თუ სერიოზულად მივიღოთ?

ინგლისში Covid-19-ის რისკისა და / ან სიმძიმის შესამცირებლად D ვიტამინის დანამატის ეროვნული კლინიკური კვლევის, CORONAVIT-ის წამყვანმა მკვლევარმა Adrian Martineau -მ განაცხადა: „შედეგები ძალიან შთამბეჭდავად გამოიყურება. თუ ისინი სწორია, თითქმის გვერდითი მოვლენების არმქონე მიკრონუტრიენტით Covid-ის მკურნალობა თამაშის წესებს შეცვლის. თუმცა დეტალებში ჩაღრმავებისას ანგარიშგების მეთოდოლოგიის შესახებ რამდენიმე კითხვის ნიშანი ჩნდება, რაც ნიშნავს, რომ მას ჯანმრთელობის შესახებ მნიშვნელოვანი გაფრთხილება უნდა ახლდეს.“

ლონდონის Queen Mary-ის უნივერსიტეტის რესპირატორული ინფექციებისა და იმუნიტეტის კლინიკურმა პროფესორმა Martineau-მ განაგრძო: „ამის დაწერა არ მინდა, მაგრამ შედეგების სანდოობაზე მსჯელობისათვის საკმარისი ინფორმაცია ჯერ არ არსებობს.“ – თქვა მან.

გლაზგოს უნივერსიტეტის მეტაბოლური მედიცინის პროფესორი Naveed Sattar-იც სკეპტიკურად იყო განწყობილი. გაერთიანებული სამეფოს სამეცნიერო მედიის ცენტრს მან უთხრა: „კვლევა იმდენ იმედს არ იძლევა, რამდენსაც კარგად ჩატარებული რანდომიზებული კლინიკური კვლევა . მიუხედავად იმისა, რომ ბევრს სურს დაიჯეროს, თითქოს D ვიტამინი Covid-19-ს მკურნალობს ან შთამბეჭდავი მკურნალობის მეთოდია, ეს გადაჭარბებულად წარმოდგენილი კვლევა ასეთი დასკვნის გაკეთებისათვის საკმარისი არ არის.“ – თქვა მან.

კონექტიკუტში, იელის უნივერსიტეტის სამედიცინო სკოლიდან F. Perry Wilson-მა განაცხადა: "D ვიტამინის დაბალი დონე ბევრ რამეს უკავშირდება... როდესაც ყველა ამ საინტერესო ვიტამინსა თუ ელემენტს რანდომიზებული კლინიკური კვლევებით ვამოწმებთ და ზოგ ადამიანს D ვიტამინს, სხვებს კი პლაცებოს ვაძლევთ, თითქმის ყოველთვის არავითარ ეფექტს არ ავლენენ." მან Twitter-ის ანგარიშზეც ახალი ესპანური პრეპრინტის შესახებ დაწერა: „გთხოვთ, სკეპტიკურად წაიკითხოთ. Covid-ის პერიოდში პრეპრინტები სასარგებლო აღმოჩნდა, თუმცა ეს კვლევა ჯერ… კარგად შესრულებული არ არის. ეს გაითვალისწინეთ.“

• დაკავშირებული თემა: უახლესი მდგომარეობა D ვიტამინისა და ომეგა-3-ის დანამატების შესახებ!

მეთოდოლოგიური ხარვეზები

Barna-COVIDIOL კვლევა თავის ტიპში პირველია, რომელიც Covid-19-თან დაკავშირებულ სიკვდილიანობაზე კალციფედიოლის (D ვიტამინის) დანამატის გავლენას აფასებს.

ავტორების თანახმად, ეს ყველაზე ფართომასშტაბიანი კვლევაა, რომელიც კალციფედიოლის დანამატის ინტენსიური თერაპიის განყოფილებაში მოხვედრაზე გავლენას აფასებს. ის ჯგუფური კვლევა იყო და არა პაციენტების შემთხვევითი შერჩევით ჩატარებული ფართო კლინიკური კვლევა.

სულ 930 პაციენტის მქონე 8 განყოფილება იყო ჩართული. 5 განყოფილების პაციენტები (530 პაციენტი) ჰოსპიტალიზაციის დროს კალციფედიოლს იღებდნენ, ხოლო დანარჩენი 3 განყოფილების პაციენტები მას არ იღებდნენ. Martineau-მ ის საკითხები, რომლებიც კვლევის მეთოდოლოგიურ ხარვეზებად მიაჩნდა, ასე განმარტა:

„პირველ რიგში, რაოდენობები დაბალანსებული არ არის. მეორე, ასეთ კვლევაში პაციენტების მეტ ჯგუფს მოველოდით. გარდა ამისა, რანდომიზებულ ჯგუფურ კვლევებში მონაცემების ანალიზი სხვა მეთოდითაც უნდა ხდებოდეს, ვიდრე აქ გამოიყენეს. ამასთან, მკვლევრებმა კვლევა დაწყებამდე clinicaltrials.com-ზე არ დაარეგისტრირეს, რაც მათ სანდოობას ამცირებს და ნიშნავს, რომ შედეგების შეფასების კრიტერიუმი არ არსებობს. ეს განგაშის ზარებს რეკავს. ჟურნალების უმეტესობა ხელნაწერებს რეცენზირებაზე არ აგზავნის, თუ კვლევა რეგისტრირებული არ არის. Lancet ერთ-ერთია იმ მცირეთაგან, რომელიც ამას აკეთებს.“

Martineau-მ ასევე თქვა, რომ საკონტროლო ჯგუფის პირველმა 50 პაციენტმა ინტენსიური თერაპიის განყოფილებაში მოხვედრისას კალციფედიოლის მიღება დაიწყო. „ეს არასწორი გზაა. თუ კვლევას ასეთი ფუნდამენტური ხარვეზი შეიძლება ჰქონდეს, ეჭვი ჩნდება, რამდენად კარგად ჩატარდა ის.“ – თქვა მან.

ბოლოს Martineau ყურადღებას ამახვილებს იმაზე, რომ ორი ჯგუფის მონაწილეები თანაბრად არ იყვნენ შეწყვილებული. მაგალითად, მკურნალობის მიმღები ჯგუფის მონაწილეთა 53% შეადარეს მკურნალობის არმიმღები ჯგუფის 59,6%-ს. D ვიტამინის საწყისი (კვლევამდე) (25(OH)D₃₎ დონეები მკურნალობის მიმღებ და არმიმღებ ჯგუფებში, შესაბამისად, 15 და 12 ng / mL-ის მედიანურ მნიშვნელობებს არ წარმოადგენდა.

თუმცა Adrian Martineau ასევე აღნიშნავს, რომ კვლევის მთლიანად გადაგდება უსამართლო იქნებოდა და ანალიზისათვის განსხვავებულ მიდგომას გვთავაზობს. „ამ კვლევაში შეიძლება რაღაც ჯერ კიდევ იყოს; ის სწორად უნდა შეფასდეს.“

Covid – 19-ისა და D ვიტამინის შესახებ სხვა კვლევები

ClinicalTrial.gov-ის ძიებამ აჩვენა, რომ მსოფლიოში მიმდინარეობს D ვიტამინზე სხვადასხვა მიზნის მქონე დაახლოებით 40 ინტერვენციული კვლევა, მათ შორის Covid-19-ის პრევენციისა და მკურნალობის სხვადასხვა ფორმის შესასწავლად.

ჯერ კიდევ უცნობია, D ვიტამინი ინფექციას თავიდან აცილებს თუ არა, ამცირებს თუ არა Covid-19-ის მქონე პაციენტებში დაავადების პროგრესირებას და ეხმარება თუ არა სიკვდილიანობის შემცირებას.

• დაკავშირებული თემა: არა, C ვიტამინის მაღალი დოზა კორონავირუსს არ მკურნალობს! სურავანდის გარდა FDA-ს დამტკიცება არ აქვს

„ვარაუდობენ“, რომ D ვიტამინს Covid-19-ის დროს ინფექციის შემდეგ ციტოკინების წარმოქმნისა და მასთან დაკავშირებული მწვავე რესპირატორული დისტრესის სინდრომის შემცირება შეუძლია, რის შედეგადაც ინტენსიური მოვლის საჭიროებაც შეიძლება შემცირდეს.

გასულ ნოემბერში გამოქვეყნებულმა დაკვირვებითმა კვლევამ აჩვენა, რომ საავადმყოფოში მიღებისას D ვიტამინის დეფიციტი Covid-19-ით სიკვდილიანობის 3,7-ჯერ ზრდას უკავშირდებოდა. ასევე გასულ ნოემბერში ბრაზილიაში გამოქვეყნებულმა სხვა კვლევამ D ვიტამინის დაბალ დონესა და Covid-19-ის მძიმე მიმდინარეობის უფრო მაღალ რისკს შორის კავშირი გამოავლინა. თუმცა კრიტიკულ მდგომარეობაში მყოფ Covid-19-ის პაციენტებში მიცემულმა D ვიტამინმა მექანიკური ვენტილაციის (ინტუბაციის) საჭიროება ან სიკვდილის ალბათობა არ შეამცირა.

პოპულარული რწმენის საპირისპიროდ, შესაძლებელია თუ არა D ვიტამინის მაღალი დოზის მიღება?

2019 წელს გამოქვეყნებულმა შემთხვევის აღწერამ აჩვენა, რომ ძალიან მაღალი დოზის D ვიტამინი (დღეში 10000 IU) ვიტამინის დეფიციტის არმქონე პირებში თირკმლის დაზიანებას იწვევდა.

უფრო ახლახან აშშ-ის WHIO-TV-ის ვებსაიტზე გამოქვეყნებულ ამბავში Washington Twp-ში კერძო პრაქტიკის მქონე Dr. Charles Opperman-მა თქვა, რომ Covid-19-ის დიაგნოზის მქონე მისი ერთ-ერთი პაციენტი თვითმკურნალობას ცდილობდა. „მას თვითმკურნალობა სურდა და ეს კარგად არ დასრულდა. კალციუმის მაღალმა დონემ ცნობიერების დაბინდვა, თირკმლის კენჭები და საბოლოოდ ჰოსპიტალიზაცია გამოიწვია.“

ბრაზილიურმა კვლევამ D ვიტამინის საავადმყოფოში ყოფნის ხანგრძლივობაზე არავითარი გავლენა არ აჩვენა

D ვიტამინის როლი Covid-19-ის პრევენციასა და მკურნალობაში ჯერ კიდევ შესწავლის საგანია. მსოფლიოში პრევენციის 3 რეგისტრირებული კვლევაა. ერთ-ერთია 3 ფაზაში მყოფი რანდომიზებული (პაციენტების შემთხვევითი შერჩევით) CORONAVIT კვლევა. გაერთიანებული სამეფოს ეს კვლევა შეამოწმებს, ამცირებს თუ არა D ვიტამინი Covid-19-ის რისკს და / ან სიმძიმეს, D ვიტამინის ოპტიმალურთან მიახლოებული დონის უზრუნველყოფის მიზნით.

D ვიტამინით მკურნალობის შესახებ, ბრაზილიაში, სან-პაულოს უნივერსიტეტში Igor Murai-ს ხელმძღვანელობით ჩატარებული მცირე კვლევა (240 პაციენტი) 17 თებერვალს JAMA-ში გამოქვეყნდა. კვლევამ აჩვენა, რომ საშუალო და მძიმე Covid-19-ის მქონე პაციენტებში ჰოსპიტალიზაციის შემდეგ მიცემულმა ერთჯერადმა მაღალმა დოზამ D₃ ვიტამინისა, პლაცებოს მიმღებ პაციენტებთან შედარებით, საავადმყოფოში ყოფნის ხანგრძლივობა მნიშვნელოვნად არ შეამცირა.

Martineau-მ „ეს ბრაზილიაში ჩატარებული მცირე კვლევაა. მეთოდოლოგია უკეთესია (Barna-COVIDIOL კვლევასთან შედარებით) და რეცენზირება გაიარა. სტატისტიკურად მნიშვნელოვანი შედეგი არ არის. საინტერესოა, რომ მექანიკური ვენტილაციის საჭიროების მქონე პაციენტების წილი D ვიტამინის ჯგუფში 7,6% იყო, საკონტროლო ჯგუფში კი 14,4%. P-ის მნიშვნელობა 0,009 იყო, თუმცა ეს კვლევის მცირე მასშტაბით არის გამოწვეული.“ – განაცხადა.

„დაელოდეთ უკეთეს კვლევებს“

Martineau-მ „D ვიტამინის მიმართ სკეპტიკურად განწყობილებს შეუძლიათ ეს დაწერონ, თუმცა D ვიტამინის ენთუზიასტებმა შეიძლება 50%-იანი შემცირება გამოკვეთონ. მე ვიტყოდი: დაელოდეთ მეტ კვლევას.“ – განაცხადა.

ორი კვლევის შედარებისას Martineau ასევე აღნიშნავს, რომ ბარსელონაში ჩატარებულ კვლევაში პაციენტებს D ვიტამინის მეტაბოლიტი, კალციფედიოლი მისცეს; ბრაზილიაში JAMA-ს კვლევაში გამოყენებულ სტანდარტულ ფორმასთან, ქოლეკალციფეროლთან შედარებით, ის სისხლში დონეს უფრო სწრაფად და მეტად ზრდის. „ამან შეიძლება განსხვავება შექმნას.“

JAMA-ს კვლევის თანმხლები სარედაქციო სტატია კვლევის რამდენიმე შეზღუდვას უსვამს ხაზს.

აურორაში, კოლორადოს უნივერსიტეტის სამედიცინო სკოლიდან Adit A. Ginde-მ და მასაჩუსეტსის ბოსტონში Brigham and Women’s Hospital-იდან David E. Leaf-მა კომენტარში „პირველ რიგში, კვლევა საკმარისად ძლიერი არ იყო. მეორე, ავტორებმა გამორიცხეს პაციენტები, რომლებსაც ინვაზიური მექანიკური ვენტილაცია სჭირდებოდათ და ინტენსიური თერაპიის განყოფილებაში იყვნენ მოთავსებული… (შესაბამისად) შედეგები კრიტიკულად მძიმე პაციენტებზე ვერ განზოგადდება. მესამე, მხოლოდ 115 მონაწილეს (48,3%) ჰქონდა D ვიტამინის დეფიციტი. მეოთხე, მათ არ გაუზომავთ D ვიტამინის აქტიური ფორმის, 125-დიჰიდროქსივიტამინ D-ის დონე სისხლში. “ – დაწერეს.

რედაქტორები აღნიშნავენ, რომ მნიშვნელოვანია D ვიტამინის Covid-19-ში როლის შესახებ ღია დამოკიდებულების შენარჩუნება. თუმცა ისინი ხაზს უსვამენ, რომ ბრაზილიური შედეგები „არ უჭერს მხარს საავადმყოფოში მოთავსებულ საშუალო და მძიმე Covid-19-ის მქონე პაციენტებში D ვიტამინის რუტინულ გამოყენებას“ .

ზოგადად, Martineau კვლავ ფრთხილია და ამატებს: „რესპირატორული ინფექციის პრევენციის კუთხით D ვიტამინს შესაძლოა ზომიერი დამცავი ეფექტი ჰქონდეს.“ თუმცა D ვიტამინისა და Covid-19-ის შესახებ „D ვიტამინის კვლევები ადრეც ჩაგვიტარებია და იმედგაცრუებული დავრჩით. წლების განმავლობაში ვიკვლევდი ვიტამინების გამოყენებას ტუბერკულოზისაგან გამოჯანმრთელების დასახმარებლად, თუმცა შედეგები შთამბეჭდავი არ ყოფილა. გასაგებია სურვილი, რომ ეს ეფექტიანი აღმოჩნდეს, მაგრამ კარგად ჩატარებული რანდომიზებული კონტროლირებადი კვლევები გვჭირდება.“ – თქვა მან.

დაკავშირებული თემები

• Covid-19-ის მიმდინარე სტატისტიკა მსოფლიოსა და თურქეთში
• კორონავირუსის შესახებ უახლესი ამბები და სამეცნიერო სიახლეები

გარე შინაარსის სანახავად მართეთ პარამეტრები

გარე შინაარსის სანახავად მართეთ პარამეტრები