ძუძუს კიბოს ადიუვანტურ ჰორმონულ მკურნალობაში მნიშვნელოვან კითხვას პასუხი გაეცა
მენოპაუზის შემდეგ ქალებში გამოვლენილი ჰორმონმგრძნობიარე ძუძუს კიბოს დამცავ (ადიუვანტურ) მკურნალობაში, ანუ რეციდივის შესამცირებლად გამოყენებული არომატაზის ფერმენტის 3 სხვადასხვა ბლოკატორიდან რომელიმეს უპირატესობა პირველად პირდაპირ შედარებით კვლევაში შეისწავლეს.
კვლევა Lancet Oncology-ში 23 თებერვალს, 2018 წელს გამოქვეყნდა. ოპერაციის შემდეგ ჰორმონული რეცეპტორ-დადებითი ძუძუს კიბოს მქონე 3697 პაციენტი 9 მარტის 2007 წლიდან 31 ივლისის 2012 წლამდე იტალიის 76 ონკოლოგიურ ცენტრში ჩართეს. მონაწილეები შემთხვევითად განაწილდნენ ონკოლოგიურ პრაქტიკაში ხშირად გამოყენებული ექვსი სამკურნალო ჯგუფიდან ერთ-ერთში.
-დაკავშირებული თემა: ძუძუს კიბოს ჰორმონული მკურნალობის სახეები
კვლევის ჩამტარებელმა იტალიურმა გუნდმა განაცხადა, რომ პოსტმენოპაუზური ჰორმონრეცეპტორ-დადებითი ადრეული ძუძუს კიბოს სამკურნალოდ გამოყენებული სამი ადიუვანტური არომატაზის ინჰიბიტორის პირველმა პირდაპირმა შედარებამ კლინიკურ ეფექტიანობასა თუ უსაფრთხოებაში მნიშვნელოვანი განსხვავება არ აჩვენა— ასეთია მათი დასკვნა.
ძუძუს კიბოს სამი ფართოდ გამოყენებული ჰორმონული პრეპარატი — ლეტროზოლი (Femara), ანასტროზოლი (Arimidex) და ექსემესტანი (Aromasin) — 3700 ქალის რანდომიზებულ ღია, 3 ფაზის FATA-GIM3 კლინიკურ კვლევაშიგამოსცადეს. 5-წლიანი რეციდივის გარეშე სიცოცხლის მაჩვენებლები ანასტროზოლის ჯგუფში %90, ექსემესტანის ჯგუფში %88 და ლეტროზოლის ჯგუფში %89.4 იყო.
სამივე წამალთან შესაძლო კავშირში მყოფი მოულოდნელი მძიმე გვერდითი ეფექტები ან მკურნალობასთან დაკავშირებული სიკვდილი არ გამოვლენილა. მიუხედავად იმისა, რომ პაციენტთა %50-ზე მეტი ჭარბწონიანი ან სიმსუქნის მქონე იყო, პაციენტთა ქვეჯგუფებს შორის განსხვავება არ დაფიქსირდა.
კვლევაში რუტინულად გამოყენებული კიდევ ერთი სტრატეგიაც შეამოწმეს: 2 წლის განმავლობაში ტამოქსიფენის შემდეგ 3 წლით ამ სამი წამლიდან ერთ-ერთზე გადასვლა შეადარეს ამ პრეპარატების მარტო 5 წლით გამოყენებას. ამ მხრივაც მნიშვნელოვანი გაურკვევლობა გაირკვა და ეფექტიანობაში განსხვავება არ გამოვლენილა. 5 წლის კუნთოვან-ჩონჩხის სისტემასთან დაკავშირებული გვერდითი ეფექტები არომატაზის ინჰიბიტორად წოდებული სამი პრეპარატის 5-წლიანი გამოყენებისას უფრო ხშირი იყო, ხოლო 2-წლიანი ტამოქსიფენის შემდეგ 3-წლიანი არომატაზის ინჰიბიტორის მიმღებებში ნაკლები კუნთოვან-ჩონჩხის გვერდითი ეფექტი გამოვლინდა.
კვლევა აჩვენებს, რომ ორივე სამკურნალო სტრატეგია სტატისტიკურად მსგავსია და კლინიკურად მისაღები.
კვლევის ბოლოს მკვლევრებმა აღნიშნეს, რომ
- ტამოქსიფენი კვლავ კარგი არჩევანია,
- ამ ჯგუფში მკურნალობის არჩევისას პაციენტის სურვილებიც გასათვალისწინებელია და
- სამ წამალს შორის არჩევანი ან გვერდითი ეფექტის გამო ერთი პრეპარატის მეორით შეცვლა უარყოფით შედეგს არ ქმნის.
სულ 1847 მონაწილემ მკურნალობა პირდაპირ სამი არომატაზის ინჰიბიტორიდან ერთ-ერთით დაიწყო და 5 წელი იღებდა. მათ 5 წლის განმავლობაში დღეში ერთხელ პერორალურად ეძლეოდათ ანასტროზოლი 1 mg, ექსემესტანი 25 mg ან ლეტროზოლი 2.5 mg. პირდაპირ ტამოქსიფენით დაწყებულმა 1850 პაციენტმა 2 წელი ტამოქსიფენი 20 mg/დღე მიიღო, შემდეგ 3 წელი დღეში ერთხელ პერორალური ანასტროზოლი 1 mg, ექსემესტანი 25 mg ან ლეტროზოლი 2.5 mg.
გვერდითი ეფექტების გამო მკურნალობის ნაადრევად შეწყვეტა ტამოქსიფენის ჯგუფში % 11, არომატაზის ინჰიბიტორების ჯგუფში კი % 7 იყო. ტამოქსიფენის შემდეგ არომატაზის ინჰიბიტორის მიმღებებში ეს მაჩვენებელი დაახლოებით %5 აღმოჩნდა.
ეს კვლევა ძალიან ღირებულია, რადგან მენოპაუზის შემდეგ გამოვლენილი და ოპერირებული ჰორმონდადებითი ძუძუს კიბოს დროს ჩვენს დამცავ ჰორმონულ სტრატეგიაში მნიშვნელოვან გაურკვევლობას პასუხობს. მეცნიერება ჩვენს პაციენტებს ყოველდღიურად ახალ სინათლეს სთავაზობს.
დაკავშირებული თემები
სიახლეები ძუძუს კიბოს მკურნალობაში — 2017 და 2018
როგორ განვსაზღვროთ პაციენტები, რომლებსაც ძუძუს კიბოს ოპერაციის შემდეგ ქიმიოთერაპია არ დასჭირდებათ?
წყაროები
Adjuvant anastrozole versus exemestane versus letrozole, upfront or after 2 years of tamoxifen, in endocrine-sensitive breast cancer (FATA-GIM3): a randomised, phase 3 trial.
Lancet Oncol. 2018.
ეს სტატია სასარგებლო იყო თქვენთვის?
თქვენი გამოხმაურება გვეხმარება შინაარსის გაუმჯობესებაში.
მკითხველთა კომენტარები
გაგვიზიარეთ თქვენი კომენტარი
თქვენი სახელი და კომენტარი მხოლოდ ადმინისტრატორის დამტკიცების შემდეგ გამოქვეყნდება. ელფოსტის მისამართი ვიზიტორებს არასოდეს ეჩვენებათ.
პირველმა დაწერეთ კომენტარი.