ნამგლისებრუჯრედოვანი ანემიის სამკურნალოდ წამალმა პირველად მიიღო FDA-ს დამტკიცება!

15 ნოემბერს 2019 წელს აშშ-ის სურსათისა და წამლის ადმინისტრაციამ (FDA), ნამგლისებრუჯრედოვანი ანემიით დაავადებულ 16 წლისა და უფროს მოზრდილებსა და ბავშვებში ვაზოოკლუზიური (სისხლძარღვების დამხშობი) კრიზების სიხშირის შესამცირებლად მონოკლონური ანტისხეულის სტრუქტურის წამალი crizanlizumab-tmca (Adakveo) დაამტკიცა.

52-კვირიან, რანდომიზებულ, მულტიცენტრულ, პლაცებო კონტროლირებულ, ორმაგად ბრმა კლინიკურ კვლევაში SUSTAIN ეფექტიანობა ნამგლისებრუჯრედოვანი დაავადების მქონე 198 პაციენტში შეფასდა. პაციენტები 30 წუთში ინტრავენურად (ვენიდან) შესაყვანი crizanlizumab-tmca 5 mg/kg (67 პაციენტი), crizanlizumab-tmca 2.5 mg/kg (66 პაციენტი) ან პლაცებოს (65 პაციენტი) მისაღებად 3 ჯგუფში შემთხვევითად განაწილდნენ. შეყვანა ხდებოდა 0., 2. კვირას და შემდეგ ყოველ 4 კვირაში. რანდომიზაცია წინა ჰიდროქსიურეის გამოყენებისა (კი ან არა) და წინა 12 თვის ვაზოოკლუზიური კრიზების რაოდენობის მიხედვით სტრატიფიცირდა.

კვლევის ეფექტიანობის ძირითადი საზომი შედეგი იყო მწვავე ვაზოოკლუზიური კრიზების (VOK) წლიური მედიანური მაჩვენებელი, რომლებიც პაციენტის საავადმყოფოში მიმართვას იწვევდა.

5 mg/kg crizanlizumab-tmca-ს მიმღებებში VOK-ის წლიური მედიანური მაჩვენებელი პლაცებოზე დაბალი იყო (1.63 შედარებით 2.98). VOK-ის შემცირება დაავადების გენოტიპისა და/ან ჰიდროქსიურეის გამოყენების მიუხედავად აღინიშნა. crizanlizumab-tmca 5 mg/kg-ის მიმღებთა %36-სა და პლაცებოს ჯგუფის %17-ს VOK არ ჰქონია. კვლევის დაწყებიდან პირველ ანემიურ კრიზამდე მედიანური დრო crizanlizumab-tmca 5mg/kg-ისა და პლაცებოს ჯგუფებში შესაბამისად 4.1 და 1.4 თვე იყო.

Crizanlizumab-tmca-ს მიმღებებში ყველაზე ხშირი (>% 10) გვერდითი ეფექტები იყო გულისრევა, ართრალგია, ზურგის ტკივილი და პირექსია (ცხელება).

რეკომენდებული დოზაა, 0., 2. კვირას და შემდეგ ყოველ 4 კვირაში 30 წუთის განმავლობაში ინტრავენურად 5 mg/kg.

რა არის ნამგლისებრუჯრედოვანი ანემია?

ნამგლისებრუჯრედოვანი ანემია ჰემოლიზით (სისხლის უჯრედების დაშლით) და ვაზოოკლუზიით ხასიათდება და ერითროციტების (სისხლის წითელი უჯრედების) ყველაზე ხშირი მემკვიდრეობითი დაავადებაა. ერითროციტების ნამგლისებრი ფორმა კაპილარების დახშობას იწვევს, შესაბამისად ქსოვილში სისხლის ნაკადი მცირდება და შედეგად ვითარდება ინფარქტი, ქრონიკული ჰემოლიზი, ქრონიკული ანთება და ორგანოთა დისფუნქცია. მწვავე და ქრონიკული ნიშნები ასაკთან ერთად იმატებს და გართულებები ნაადრევ სიკვდილს იწვევს. ნამგლისებრუჯრედოვანი ანემიის მკურნალობის მართვა ბავშვებსა და მოზრდილებში დეტალურ, მულტიდისციპლინურ მიდგომას მოითხოვს. განმეორებითი ვაზოოკლუზიური კრიზების პრევენციაში, crizanlizumab-tmca'-მდე ერთადერთი მკურნალობის არჩევანი ჰიდროქსიურეა იყო. ქრონიკული სისხლის გადასხმის ეფექტიანობა ნაჩვენებია პირველადი და მეორეული ინსულტისა და განმეორებითი მწვავე გულმკერდის სინდრომის პრევენციაში. ბავშვებში სიკვდილის ყველაზე მნიშვნელოვანი მიზეზი ინფექციაა და პენიცილინის პროფილაქტიკა და შესაბამისი აცრები, განსაკუთრებით კაფსულირებული ბაქტერიების წინააღმდეგ, სასიცოცხლოდ მნიშვნელოვანია. ჰემატოპოეზური ღეროვანი უჯრედების გადანერგვა ერთადერთი ცნობილი განმკურნებელი მკურნალობაა და შერჩეულ მაღალი რისკის ბავშვებში %85-90 წარმატება აქვს.

როგორია Crizanlizumab-tmca-ს მოქმედების მექანიზმი?

Crizanlizumab Novartis-ის მიერ შექმნილი მონოკლონური ანტისხეულია, რომელიც უჯრედის ზედაპირულ მოლეკულა P-სელექტინს უმიზნებს. P-სელექტინი უხვად გვხვდება თრომბოციტებსა და სისხლძარღვთა შიგნითა კედლის ამომფენი ენდოთელური შრის ეპითელურ უჯრედებში. Crizanlizumab P-სელექტინთან შეკავშირებით სისხლის უჯრედებისა და ნამგლისებრი ერითროციტების ენდოთელურ უჯრედებზე მიმაგრებას აფერხებს.

ვიდეო: Crizanlizumab-tmca-ს მოქმედების მექანიზმი და SUSTAIN კვლევა