პლევრის მეზოთელიომაში ფილტვის შემნახველი ქირურგიის წამახალისებელი შედეგები

პლევრის ავთვისებიანი მეზოთელიომის (ფილტვის გარსის კიბოს) მქონე პაციენტების მკურნალობაში ქირურგიულ მიდგომად პლევრექტომია-დეკორტიკაციის(ფილტვის გარსის აცლის) გამოყენება, თუ ხილული სიმსივნეების სრულად მოცილებაა შესაძლებელი, რასაც მაკროსკოპული სრული რეზექცია ეწოდება, საერთო სიცოცხლეს ახანგრძლივებდა. მიგნებები მოდის 3 დეკემბრის 2020 წლის Annals of Surgery-ში აღწერილი რეტროსპექტიული (წარსულზე ორიენტირებული) კვლევიდან.

პლევრის მეზოთელიომა ფილტვის ზედაპირის დამფარავი გარსის აგრესიული კიბოა; ძირითადად აზბესტის წარსული ზემოქმედებითაა გამოწვეული. 

აშშ-ის კიბოს ეროვნული ყოვლისმომცველი ქსელის (NCCN) მეზოთელიომის დიაგნოსტიკისა და მკურნალობის სახელმძღვანელოები მრავალმოდალურ მიდგომას, მათ შორის ქირურგიულ მაკროსკოპულ სრულ რეზექციას ურჩევს, ხოლო სისტემური მკურნალობები (ქიმიოთერაპია და იმუნოთერაპია) დაავადების ძირითად მკურნალობად ითვლება.

მეზოთელიომის სამკურნალოდ ექსტრაპლევრული პნევმონექტომიამოიცავს ერთი ფილტვისა და პარიესული პლევრის (გარეთა გარსის), პერიკარდიუმისა (გულის გარსის) და დიაფრაგმის ნაწილების მოცილებას და ძალზე ფართო / რადიკალური ოპერაციაა. ალტერნატიული ოპერაციაა ფილტვის შემნახველი ქირურგიული მეთოდი, პლევრექტომია-დეკორტიკაცია, რომელიც პარიესული (გარეთა) და ვისცერული (შიგნითა) პლევრისა და ხილული სიმსივნური მასების მოცილებას მოიცავს. გაფართოებული პლევრექტომია-დეკორტიკაციაპერიკარდიუმისა და იმავე მხარის დიაფრაგმის ქირურგიულ ამოღებასაც მოიცავს.

მიუხედავად მტკიცებულებებისა, რომ პლევრექტომია-დეკორტიკაცია და გაფართოებული ვარიანტი ექსტრაპლევრულ პნევმონექტომიასთან შედარებით სულ უფრო უპირატესია, კვლევის მიზანი მოკლე და გრძელვადიან შედეგებთან ერთად მიმდინარეობაზე მოქმედი ფაქტორების შეფასება იყო.

ანალიზი ეყრდნობოდა ერთი კიბოს ცენტრის 2007 და 2015 წლებს შორის გეგმური პლევრექტომია-დეკორტიკაციის მქონე თანმიმდევრული 355 პაციენტის სამედიცინო ჩანაწერებს.

ყველაზე ხშირი პოსტოპერაციული გართულებები სიცოცხლისთვის საშიში არ იყო და სიხშირით მოიცავდა გახანგრძლივებულ ჰაერის გაჟონვას (% 46,5), ღრმა ვენების თრომბოზს (% 21,1), წინაგულთა ფიბრილაციას (% 13,9), ლიმფური სითხის გაჟონვას (% 7,9), ემპიემას (% 7,6) და პნევმონიას (% 6,9). 30 და 90 დღის სიკვდილიანობა შესაბამისად % 3 და % 4.6 იყო.

ოპერაციით ხილული სიმსივნეების სრული მოცილების მქონეთა საერთო გადარჩენის მედიანა 23,2 თვე იყო, ხოლო არასრული მოცილებისას 11,6 თვე (P <.0001).

სრული მოცილების ჯგუფში მამრობითი სქესი (საფრთხის თანაფარდობა [HR], 1.79; მდედრობითთან შედარებით; P = .002) და უფრო მაღალი სტადია (T1-თან შედარებით T3-ის HR, 2.31: P <.001) მიმდინარეობაზე უარყოფითად მოქმედი ფაქტორები იყო. პირიქით, ადიუვანტური ქიმიოთერაპია (HR, 0.45 ადიუვანტურის არქონასთან შედარებით; P <.001), ოპერაციისას გაცხელებული ქიმიოთერაპია (HR, 0.60; P = .024 ) და ეპითელოიდური ჰისტოლოგია (HR, 0.62 ბიფაზურთან შედარებით; P = .003) უკეთეს შედეგებს უკავშირდებოდა.

დასკვნა

მიუხედავად ერთ ცენტრში ჩატარებისა, სამასზე მეტი პაციენტი სტატისტიკურ ანალიზსა და კვლევის ძალას დამაკმაყოფილებელს ხდიდა და ადასტურებს, რომ პლევრექტომია-დეკორტიკაცია 30 და 90 დღის დაბალი სიკვდილიანობით შეიძლება ჩატარდეს.

ეს ოპერაცია მეზოთელიომის მქონეთათვის მრავალმოდალურ მკურნალობასაც უფრო განხორციელებადს ხდის.

2020 წელს მეზოთელიომაში როგორც კომბინირებული (ორმაგი) იმუნოთერაპიის FDA-ის ნებართვა , ისე ამ კვლევით ფილტვის შემნახველი მიდგომის უსაფრთხოებისა და ეფექტიანობის ჩვენება მნიშვნელოვანი წინსვლაა სასიხარულო მკურნალობის არჩევანის ზრდაში.

მიდგომა მეზოთელიომის მკურნალობაში ქირურგიის როლს მხარს უჭერს და მომავალი ფართო, რანდომიზებული შერჩევის მრავალცენტრიანი კვლევების საფუძველს ქმნის.

*

• დაკავშირებული თემა: რა არის მეზოთელიომა? ისტორია და მკურნალობის უახლესი ეტაპი