სასუნთქი გზების პაპილომატოზი და ტონზილის კიბო — HPV-სთან დაკავშირებული ორი პაციენტის მაგალითი

HPV (ადამიანის პაპილომავირუსის — human papillomavirus) სახელით ცნობილი ვირუსის ინფექცია პასუხისმგებელია ყველა კიბოს %5-ზე, საშვილოსნოს ყელის კიბოსშემთხვევების კი %99-ზე. კიბოს გარდა HPV პაპილომის / მეჭეჭის წარმოქმნაშიც მონაწილეობს. ქვემოთ, NEJM ჟურნალში 25 ივლისს, 2019 წელს წარმოდგენილი HPV-სთან დაკავშირებული 2 შემთხვევის მაგალითი გაგიზიარეთ:

სასუნთქი გზების პაპილომატოზი (ლარინგეალური პაპილომატოზი)

63 წლის მამაკაცმა პულმონოლოგიურ კლინიკას მიმართა 3 თვის განმავლობაში განვითარებული მშრალი ხველისა და დატვირთვისას ქოშინის (მოძრაობისას გამწვავებული სუნთქვის გაძნელების) გამო. ადამიანის იმუნოდეფიციტის ვირუსით (HIV) ინფიცირების ისტორია ჰქონდა და რამდენიმე წლის განმავლობაში პერიოდულად დანიშნულ ანტირეტროვირუსულ მკურნალობას იღებდა. CD4-ის რაოდენობა კუბურ მეტრზე 81 უჯრედი იყო. ფილტვების მოსმენისას ამოსუნთქვისას ხიხინი (კვნესის ხმა) ისმოდა. გულმკერდის კომპიუტერულ ტომოგრაფიაზე გამოვლინდა მრავლობითი პოლიპოიდური დაზიანება, რომლებიც ტრაქეის (სასუნთქი მილის) სანათურში და მარცხენა და მარჯვენა მთავარ ბრონქებში იყო გამოშვერილი. ბრონქოსკოპიაზე ყურადღებას იპყრობდა ტრაქეის უკანა კედელსა და მარცხენა და მარჯვენა მთავარ ბრონქებში მრავალი ფართოფუძიანი, მტვრევადი, მეჭეჭისმაგვარი დაზიანება. ჰისტოლოგიური გამოკვლევით გამოვლინდა ზედაპირზე ზომიერი დისპლაზიის მქონე ბრტყელეპითელური პაპილომები, ხოლო პოლიმერაზული ჯაჭვური რეაქციის ანალიზით HPV ტიპი 11 გამოვლინდა. დაისვა სასუნთქი გზების პაპილომატოზის (ლარინგეალური პაპილომატოზის) დიაგნოზი. პაციენტს ჩაუტარდა ლაზერის დახმარებით მექანიკური დებალკინგი (პაპილომების მოფხეკა) და სიმპტომების მნიშვნელოვანი შემცირება აღინიშნა. 7 თვის შემდეგ დაკვირვებისას CD4-ის რაოდენობა კუბურ მეტრზე 171 უჯრედამდე გაზრდილიყო. სიმპტომები დაბრუნდა და განმეორებადი პაპილომების გამო დებალკინგის პროცედურები გაგრძელდა.

-დაკავშირებული თემა: რა არის განმეორებადი ლარინგეალური პაპილომატოზი, HPV მეჭეჭი და პაპილომა? (დეტალურად)

ტონზილის (ნუშურა ჯირკვლის) კიბო

60 წლის მამაკაცმა ოტორინოლარინგოლოგიურ კლინიკას მიმართა კისრის მარჯვენა მხარეს 2 თვის განმავლობაში არსებული მაგარი წარმონაქმნით. თამბაქოს მოწევისა ან ალკოჰოლის ჭარბი მოხმარების ისტორია არ ჰქონდა. არ აღენიშნებოდა ხმის ცვლილება, ტკივილი ან ყლაპვის გაძნელება. ოროფარინქსის (პირის ღრუსა და ხახის) გასინჯვით გამოვლინდა ასიმეტრიულად გადიდებული მარჯვენა ტონზილა (ნუშურა ჯირკვალი). ტონზილიდან აიღეს ბიოფსია და გამოვლინდა ინვაზიური, არაკერატინიზებული ბრტყელუჯრედოვანი კიბო. მიზეზის დასადგენად ჩატარებულ იმუნოჰისტოქიმიურ ანალიზში HPV-ს p16 ცილაზე ძლიერი ბირთვული და ციტოპლაზმური შეღებვა აღინიშნა... ტონზილის კიბოს ყველა პაციენტს ხილული დაზიანება არ აქვს; ნუშურა ჯირკვლის კრიპტებმა შეიძლება სიმსივნე დამალოს. მკურნალობისთვის პაციენტს ინდუქციური ქიმიოთერაპია და იმუნოთერაპია დაეწყო, რის შემდეგაც კიბო ოპერაბელური გახდა. ჩატარდა სიმსივნისა და კისრის ლიმფური კვანძის ამოკვეთის ოპერაცია. სხივური თერაპია საჭირო აღარ გახდა. ექვსთვიანი დაკვირვებისას კიბოს არანაირი ნიშანი არ ჰქონდა, სამსახურში დაბრუნდა და ჯანსაღი კვება დაიწყო.

- დაკავშირებული თემა: როგორ ვითარდება კიბო ნუშურა ჯირკვალში? ნუშურა ჯირკვლის (ტონზილის) კიბოს სიმპტომები და მკურნალობა (დეტალურად)