4-cü mərhələ HER2-müsbət süd vəzi xərçəngi üçün ən yaxşı müalicə seçimləri

HER2-müsbət süd vəzi xərçəngi şiş hüceyrələrinin HER2 adlı zülalı həddindən artıq istehsal etməsi və həmin zülala görə sürətlə böyüməsi deməkdir. HER2 zülalı hüceyrələrin böyüməsinə və çoxalmasına kömək edən siqnal yolunu aktivləşdirərək xərçəng hüceyrələrinin sürətli çoxalmasına səbəb olur. Bununla belə, bu gün HER2-müsbət süd vəzi xərçənginə xas çoxlu yeni hədəflənmiş dərmanlar yaradılıb. Müalicə seçimləri artdıqca xəstələr üçün ən təsirli müalicənin hansı olduğu sualı ortaya çıxır.

2022-ci ilin onkologiya sahəsində diqqətçəkən tədqiqatlarından biri HER2-müsbət süd vəzi xərçəngində istifadə olunan 2 yeni nəsil hədəflənmiş dərman haqqındadır: trastuzumab deruxtecan (T-DXd, Enhertu) və trastuzumab emtansin (T-DM1, Kadcyla). Bu iki dərmanı birbaşa müqayisə edən DESTINY-Breast03 tədqiqatının yenilənmiş nəticələri 2022 San Antonio Süd Vəzi Xərçəngi Simpoziumunda təqdim edildi.

DESTINY-Breast03 tədqiqatı irəliləmiş HER2-müsbət süd vəzi xərçəngi olan və əvvəllər trastuzumab və taksan müalicələri almış xəstələrdə yeni nəsil anti-HER2 müalicələrini — Kadcyla və Enhertunu müqayisə etdi. Bu tədqiqata qədər belə xəstələr üçün ən uyğun müalicənin hansı olduğu qeyri-müəyyən qalırdı.

• 524 xəstənin daxil edildiyi bu tədqiqatda trastuzumab deruxtecan (T-DXd, Enhertu) ilə median ümumi sağqalım müddəti trastuzumab emtansine (T-DM1, Kadcyla) ilə müqayisədə əhəmiyyətli dərəcədə daha yaxşı idi. T-DXd istifadəsinin ölüm riskini 36% azaltdığı müəyyən edildi (hazard nisbəti 0,64).
• T-DXd qrupunda 1-ci və 2-ci il sağqalım göstəriciləri müvafiq olaraq 94,1% və 77,4%, T-DM1 qrupunda isə 1-ci və 2-ci il göstəriciləri müvafiq olaraq 86% və 69,9% idi.
• Median proqressiyasız (irəliləməsiz) sağqalım müddəti T-DXd ilə 4 dəfə uzun idi: 28,8 aya qarşı 6,6 ay.
• T-DXd alan xəstələrin 78,5%-ində müalicəyə obyektiv cavab vardı; hər 5 xəstədən birində (21,1%) müalicəyə tam radioloji cavab da aşkar edildi.
• T-DXd və T-DM1 ilə görülən ciddi (dərəcə ≥3) yan təsirlərin payı müvafiq olaraq % 56 və % 52 idi. İnterstisial ağciyər xəstəliyi müvafiq olaraq % 15 və % 3 tezlikdə görüldü.

Nəticə etibarilə bu tədqiqata görə, taksan və trastuzumabdan sonra xərçəngi irəliləyən HER2-müsbət süd vəzi xərçəngi xəstələri üçün T-DXd, T-DM1 ilə müqayisədə daha təsirli müalicə seçimi kimi önə çıxır.