Ağciyər xərçənginin müalicəsində Osimertinib-in uğuru ESMO 2017-də iz qoydu

Yeni nəsil hədəfə yönəlmiş müalicələrdən olan və EGFR mutant (ekzon 19 delesiyası, L858R mutasiyası) ağciyər xərçənglərinin müalicəsində istifadə edilən Osimertinib 2003-də istifadəyə girən Gefitinib və 2004-də FDA təsdiqi alan Erlotinib-in hər ikisinin daxil olduğu FLAURA adlı randomizə edilmiş faza 3 tədqiqatında bu iki mühüm və standart müalicə sayılan dərmanla müqayisə edildi.

Osimertinib ağciyər xərçəngi hüceyrələrində olan bir növ böyümə reseptorunun hüceyrə daxilinə yaydığı böyümə siqnalını əngəlləyən yeni nəsil tirozin kinaza bloklayıcısıdır. Gündəlik praktikada Gefitinib və Erlotinib istifadə etmiş, xəstəliyi irəliləmiş və T790M mutasiyası aşkarlanmış xəstələrdə istifadə edirdik. Tədqiqatlardan alınan uğurlu ilkin nəticələrin EGFR mutant xəstələrdə ilk seçim kimi istifadə oluna biləcəyinə dair məlumat verməsi nəticəsində FLAURA tədqiqatı planlaşdırıldı və ilkin nəticələri ESMO 2017 Avropa Onkologiya Konqresində paylaşıldı.

Tədqiqata 556 xəstə daxil edilmiş, bir qrupa (279 xəstə) Osimertinib ( Tagrisso ), digərinə (275 xəstə) Gefitinib ( Iressa ) və ya Erlotinib ( Tarceva ) verilmişdir. Ağciyər xərçəngində irəliləməyə qədər median müddət Osimertinib-də 19 ay, standart müalicə qolunda 10 ay olmuşdur və bu nəticə statistik əhəmiyyətlidir. Müalicəyə cavab nisbətləri % 80 qarşı % 76, cavab alınan xəstələrdə median cavab müddəti Osimertinib ilə 17.2 ay qarşı Gefitinib və Erlotinib qolunda 8.5 ay olmuşdur. Əldə edilən fayda nisbətində beyin metastazı olan xəstələrdə də əhəmiyyətli artım aşkarlanması beyinə keçid üstünlüyünü də ortaya qoymuşdur.

Tədqiqatda Osimertinib ilə müalicədən faydalanma müddəti demək olar iki dəfə yüksək oldu və bu nəticə tibb qurumları tərəfindən də həyəcanverici sayıldı.

Uzunmüddətli müqayisəli sağqalma müddətləri hələ məlum olmayan tədqiqatın qarşıdakı dövrdə dərcini gözləyəcəyik. Görünür, FLAURA tədqiqatında Osimertinib ilə alınan uğurlu müalicə nəticəsi EGFR mutasiyası pozitiv xəstələrdə Gefitinib və Erlotinib-i ilk müalicə seçimi olmaqdan çıxaracaq.

4. mərhələ, metastaz vermiş ağciyər xərçəngi xəstələrində xüsusilə hədəflənmiş müalicəyə uyğun qrupda bu uğurla gözlənilən yaşam müddətində hədəf 2 ildən 3 ilə yüksələcək kimi görünür. Kimyaterapiya ilə bir il ətrafında olan sağqalma müddətindəki bu mühüm artım çox sevindiricidir. Bu xəstə qrupunda hədəfə yönəlmiş müalicələrdən sonra xəstəliyi irəliləyənlərdə immunoterapiyaların istifadəsi ilə bu müddətin daha da uzanması mümkün olacaq. Müasir onkoloji müalicələrdə inkişaf son illərdə sürətlənmişdir. Ağciyər xərçənginin müalicəsi də bu sahələrdəndir.

Növbəti yazımızda ESMO 2017-də açıqlanan BRAF mutant ağciyər xərçəngi xəstələrində əldə edilən yeni müalicə uğurunu sizinlə paylaşacağıq.