Böyük B-hüceyrəli limfomanın ikinci xətt müalicəsi üçün Breyanzi FDA təsdiqi aldı

24 iyun 2022-ci ildə FDA (ABŞ Qida və Dərman İdarəsi) birinci xətt kemoimmunoterapiyaya davamlı olan və ya 12 ay ərzində təkrarlayan, əlavə xəstəliklərə və ya yaşa görə kök hüceyrə nəqli üçün uyğun olmayan böyük B-hüceyrəli limfomalı (BBHL) yetkin xəstələr üçün lisocabtagene maraleucel (Breyanzi, Juno Therapeutics, Inc.) adlı CAR T-hüceyrə müalicəsini təsdiqlədi. Bu təsdiqə mərkəzi sinir sistemi limfoması olan xəstələrin müalicəsi daxil deyil. Əvvəllər bu vəziyyətdəki xəstələrin müalicəsi üçün Yescarta da FDA təsdiqi almışdı.

Breyanzi daha əvvəl, 5 fevral 2021-ci ildə əvvəlki “ən azı iki xətt müalicəyə” cavab verməyən və ya təkrarlayan diffuz böyük B-hüceyrəli limfoma növləri olan yetkin xəstələri müalicə etmək üçün FDA təsdiqi almışdı (baxın: müvafiq təsdiq və bu CAR T-hüceyrə müalicəsinin işləmə mexanizmi). 

Breyanzi FDA tərəfindən təsdiqlənmiş 3-cü CAR T-hüceyrə müalicəsidir.

İkinci xətdə CAR T-hüceyrə müalicəsinə FDA təsdiqi gətirən iki tədqiqat

TRANSFORM tədqiqatı

Effektivlik birinci xətt kemoimmunoterapiyaya davamlı BBHL-si olan və ya birinci xətt müalicədən tam cavab (TY) əldə edildikdən sonrakı 12 ay ərzində xərçəngi təkrarlayan yetkin xəstələrdə randomizə edilmiş, açıq etiketli, çoxmərkəzli TRANSFORM tədqiqatında qiymətləndirildi.

Xəstələr hələ residiv verən və ya refrakter limfoma üçün müalicə almamışdılar və autoloji kök hüceyrə nəqli üçün potensial namizəd idilər. Ümumilikdə 184 xəstə fludarabin və siklofosfamidlə limfoazaldıcı kimyaterapiyadan sonra tək lisocabtagene maraleucel infuziyası almaq və ya üç sikl kemoimmunoterapiyadan sonra TY yaxud qismən cavab (KY) əldə edən xəstələrdə yüksək dozalı müalicə və autoloji kök hüceyrə nəqlindən ibarət standart ikinci xətt müalicəsini almaq üçün 1:1 nisbətində randomizə edildi.

Əsas effektivlik ölçüsü müstəqil qiymətləndirmə komitəsinin müəyyən etdiyi hadisəsiz sağqalım idi.

CAR T-hüceyrə müalicəsi xəstəliklə bağlı hər hansı hadisə riskini 66% azaltdı (HR 0.34 və 95% GA:0.22, 0.52; p-dəyəri <0.0001).

Təxmini 1 illik hadisəsiz sağqalım lisocabtagene maraleucel qolunda 45% (95% GA: 29, 59), standart müalicə qolunda isə 24%-dür (95% GA: 14, 35).

Təxmini median hadisəsiz sağqalım müvafiq olaraq 10.1 ay (95% GA: 6,1, qiymətləndirilə bilməz) və 2,3 ay (95% GA: 2,2, 4,3) idi.

Standart müalicə almaq üçün randomizə edilmiş xəstələrin 47%-si planlaşdırıldığı kimi autoloji kök hüceyrə nəqli aldı, kimyaterapiyaya cavabın olmaması isə kök hüceyrə nəqlinin aparılmamasının ən yayğın səbəbi idi.

PILOT tədqiqatı

Effektivlik bir xətt kemoimmunoterapiyadan sonra residiv verən və ya müalicəyə davamlı BBHL-si olan, transplantasiyaya uyğun olmayan xəstələrdə təkqollu, açıq etiketli, çoxmərkəzli PILOT sınağında da qiymətləndirildi. Tədqiqata orqan funksiyası və ya yaşına görə yüksək dozalı kimyaterapiyaya və kök hüceyrə nəqlinə uyğun olmayan, lakin CAR T-hüceyrə müalicəsi üçün yetərli orqan funksiyası olan xəstələr daxil edildi.

Effektivlik tam cavab (TY) dərəcəsinə və cavab müddətinə əsaslanırdı.

Leykaferez aparılmış 74 xəstənin (median yaş 73 il) 61-i (82%) lisocabtagene maraleucel aldı və onların 54%-ü (95% GA: 41, 67) TY əldə etdi. TY-yə çatan xəstələrdə median cavab müddətinə (95% GA: 11.2 ay, çatılmayıb).

Yan təsirlər

BBHL üçün ikinci xətt müalicəsi kimi lisocabtagene maraleucel ilə bağlı tədqiqatlarda xəstələrin 45%-də (3 və ya yuxarı dərəcə, 1.3%) sitokin ifrazı sindromu, 27%-də isə (3-cü dərəcə, 7%) nevroloji toksikliklər meydana çıxdı. Xəstələrin %33 ilə %38-də ciddi arzuolunmaz reaksiyalar yarandı.

Dozası

İkinci xətt müalicəsi üçün tövsiyə olunan lisocabtagene maraleucel dozası 1:1 nisbətində CD4 və CD8 komponentləri ilə 90 milyon ilə 110 milyon arasında CAR-pozitiv T-hüceyrəsidir.