Gənc T-hüceyrəli leykemiya müalicəsində indiyədək ən yaxşı ömür uzunluqları əldə edildi

Yeni diaqnozlu T hüceyrəli kəskin limfoblastik leykemiyalı (T-ALL) uşaq və gənc yetkinlərdə indiyədək ən böyük tədqiqatın nəticələri bu xəstə qrupu üçün, indiyədək ən yaxşı sağqalım məlumatlarını ortaya qoydu.

Uşaq Onkologiya Qrupunun AALL0434 nəticələri qarşıdakı ASCO 2018 Konqresində 10500 nömrəli məruzə kimi təqdim ediləcək. Diqqətçəkən bu tədqiqat konqresdən əvvəl mətbuat toplantısında elan edildi.

Əvvəl xəstələrin 5 illik sağqalımı %80 olduğu halda, bu tədqiqatla %90-ı keçib.

Standart kimyaterapiyaya nelarabine (ticarət adı Arranon) əlavə edildi. Nelarabin residiv verən və ya təkrarlayan kəskin limfoblastik leykemiya və limfoblastik limfoma üçün 2005-də FDA təsdiqi almışdı. Ölkəmizdə xaricdən təmin edilən dərmanlardandır. Burada nelarabine təkrardan sonra deyil, başlanğıc müalicəyə daha yaxın istifadə edildi; bu da nəticələri yaxşılaşdırmış görünür.

Tarixin ən böyük klinik tədqiqatı

Bu, T-ALL və T-hüceyrəli limfoblastik limfomalı (T-LL) uşaq və gənc yetkinlərdə indiyədək ən böyük klinik tədqiqatdır. Yaşı 1 ilə 30 arasında T-ALL (% 94) və ya T-LL (% 6) olan 1895 xəstə daxil edildi. Xəstələr təsadüfi dörd rejimdən birinə ayrıldı:

• tək metotreksatın artan dozaları,
• artan dozalı metotreksatla birlikdə 6 kurs nelarabine (5 günlük müalicə, gündə 650 mg/m2),
• tək yüksək dozalı metotreksat,
• yüksək dozalı metotreksatla birlikdə 6 kurs nelarabine.

Tədqiqatın nəticələri

• Bütün qruplarda 4 illik ümumi sağqalım %90.2, xəstəliksiz sağqalım %84.3 idi.
• İnduksiya (başlanğıc) müalicəsi ilə remissiyaya (bütün xəstəlik tapıntılarının itməsi) girməyənlərdə 4 illik sağqalım %54 idi — əvvəlki nisbətlərin ikiqatı. T-LL xəstələri nelarabinedən fayda görməsə də, 4 illik sağqalım %85 kimi olduqca yaxşı dəyərdə tapıldı.
• Nelarabine verilən T-ALL xəstələrində 4 illik xəstəliksiz sağqalım %88.9, almayanlarda %83.3 idi və fərq statistik əhəmiyyətli tapıldı.
• Artan dozalı metotreksat alanlarda 4 illik xəstəliksiz sağqalım nelarabine əlavə edilən qrupda daha yaxşı idi (%92.2-yə qarşı %89.8).
• Yüksək dozalı metotreksat qruplarında 4 illik xəstəliksiz sağqalım %86.2-yə qarşı %78 ilə yenə nelarabine lehinə idi.
• İnduksiya müalicəsi uğursuz olub yüksək dozalı metotreksat üstəgəl nelabarine alan T-ALL xəstələrində 4 illik xəstəliksiz sağqalım %54.8 idi. Yüksək riskli T-LL müalicəsinə nelarabine əlavə edilməsi sağqalım üstünlüyü göstərmədi.

Nəticə olaraqklinik praktikanı dəyişəcək gücdə bu geniş tədqiqat nəticələri xərçəng təbabətinin gəldiyi nöqtəni göstərməsi baxımından ümidvericidir. Baş müəllif Dr. Kimberly Dunsmore növbəti addımlarının uzunmüddətli nevroloji yan təsirləri azaltmaq üçün kranial (beyin) şüalanma olmayan planla nelarabine istifadəsini araşdırmaq olduğunu bildirdi.

ƏLAVƏ OXU: Nelarabine necə təsir edir?

Nelarabine kimyaterapiya dərmanıdır. DNA sintezində (istehsalında) işlənən purin nukleozidlərini təqlid edir, DNA istehsalını əngəlləyib hüceyrə ölümünə səbəb olur. Verildikdən sonra arabinozilquanin nukleotid trifosfat (ara-GTP) molekuluna çevrilir. Bu molekul leykemiya hüceyrələrində yığılaraq mitozun S fazasına xas sitotoksik (hüceyrə öldürücü) və apoptotik təsir yaradır.

• Leykemiya ilə limfoma arasındakı fərq nədir?
• Limfoma, limfa xərçəngi nədir? Əlamətləri və müalicəsi necədir?