Guya təsirli Kuba xərçəng peyvəndinə niyə bu qədər maraq göstəririk?

Demək olar ki, hər 6 ayda bir Kuba xərçəng peyvəndi barədə mətbuatda əks-səda doğuran xəbər hazırlanır və biz də işimizi-gücümüzü buraxıb, "bu barədə yeni tədqiqatmı çıxıb" deyə araşdırmağa başlayırıq. Bu dəfə araşdırmamız yalnız bir neçə saat çəkdi, çünki yeni tədqiqat və ya elmi sübut yoxdur! Yenilik isə budur: xəbərlərin dili dəyişib və bu iş tam mənası ilə "Kuba Sağlamlıq Turizmi" hadisəsinə çevrilib.

Kuba xərçəng peyvəndləri xərçəngləri müalicə ETMƏMƏYƏ davam edir

Kuba xərçəng peyvəndi barədə son tədqiqat Yanvar 2018 tarixində nəşr edilmiş və Kubada aparılmışdır. Bu nəticələrə görə də CIMAvax-EGF (antigen peyvəndi) və ya VAXIRA (anti-idiotip) peyvəndləri artıq əlimizdə olan müalicələrlə (kimyaterapiyalar, ağıllı dərmanlar, qabaqcıl radioterapiya texnologiyaları və daha yeni immunoterapiyalarla) müqayisədə demək olar ki, çürük dişə odekolon basmaq qədər təsirlidir: bildirilmiş ən yaxşı median ömür müddətləri hələ 11 ayı keçməmişdir.

CIMAvax-EGF və VAXIRA təsir mexanizmləri nədir?

1. CIMAvax bir antigen peyvəndidir. Antigen peyvəndləri xərçəng hüceyrələrinin səthindəki müəyyən zülalları və ya zülal hissələrini istifadə edərək immun sisteminin aktivləşməsini hədəfləyir. Xərçəng antigenləri həmçinin peyvəndin daha yaxşı işləməsini təmin edən molekullarla qarışdırılır. Bu molekullara adyuvant deyilir. Adyuvantlar bədənin hüceyrələri yad kimi tanımasına və immun cavab yaratmasına kömək edir. Adyuvantlara nümunə olaraq sitokinlər (interleykin 2) verilə bilər.

Ən geniş istifadə olunan Kuba peyvəndi CimaVax-EGF də bu sinifdən olan xərçəng peyvəndidir. Bu peyvənddə EGF adlı molekul (antigen) adyuvantlarla zənginləşdirilib xəstəyə inyeksiya edilir. Bunun qarşılığında xəstədə antigen təqdim edən hüceyrələr və anticisim istehsal edən B hüceyrələri vasitəsilə immun cavab yaradılması hədəflənir. EGF xüsusilə müəyyən xərçəng hüceyrələrinin səthində çox olan öz reseptoruna (EGFR) bağlanır. Peyvənd nəticəsində yaranması stimullaşdırılan anticisimlərin bu EGF-ni bağlaması və EGFR reseptorunun xərçəng hüceyrəsinə böyümə və çoxalma siqnalı verməsinin qarşısının alınması nəzərdə tutulur.

Bəzi antigen peyvəndləri yalnız müəyyən xərçəng növünə qarşı immun cavab yaranmasını təmin edir. Son illərdəki araşdırmalar antigenlərin immun sistemi tərəfindən daha sürətli tanınması və birdən çox antigenin tək peyvənddə toplanması üzərindədir.

2. VAXIRA bir anti-idiotip anticisim peyvəndidir. Anti-idiotip anticisim peyvəndləri müəyyən antigeni təqlid etmək üçün hazırlanmış anticisimlərdir. Xərçəng hüceyrəsinin səthində xərçəngə xas olan bəzi antigenlər (qlikolipidlər kimi) immun sistemi tərəfindən fərq edilmir. Bu quruluşların immun sistemi tərəfindən fərq edilməsini təmin etmək üçün onları təqlid edən və laboratoriyada hazırlanmış anti-idiotip anticisimlər xərçəng peyvəndləri kimi sınanır. Bu peyvəndlər immun sistemini aktivləşdirərək bədənin xərçəng hüceyrələrinə qarşı anticisim istehsalını təmin edir. Başqa sözlə, xərçəng hüceyrəsi antigenləri kimi təsir göstərir. Peyvənd inyeksiya edildikdə immun sisteminin xərçəng hüceyrəsi üzərindəki antigenləri tanımasını təmin edir.

Kuba tərəfindən istehsal edilən peyvəndlərə elmi tənqidlər

Xüsusi vurğulamaq lazımdır ki, CIMAvax və VAXIRA peyvəndləri ağciyər xərçənginin qəti müalicəsini vəd etmir. Peyvənd istehsalçıları da bunu xüsusilə vurğulayırlar.

• Bu peyvəndlər birbaşa xərçəng hüceyrəsini deyil, xərçəngin böyüməsinə, çoxalmasına və metastaz verməsinə dəstək olan EGF və NeuGcGM3 molekullarını hədəfləyir. Buna görə peyvəndin əsas məqsədi ağciyər xərçəngini "xroniki xəstəlik" halına gətirməkdir.
• Peyvəndin təmin etdiyi immun cavab immun sisteminin əsas hüceyrələri (T-hüceyrə, NK-lar və makrofaqlar) deyil, anticisimlər vasitəsilədir, buna görə olduqca qısamüddətli fayda müşahidə olunur. Həmçinin zəif immunogenlik təqdim edir. Bundan başqa kiçik hüceyrəli olmayan ağciyər xərçəngi çoxsaylı antigenlərə malikdir. Buna görə tək antigeni hədəfləyən bu peyvəndin müalicədə təsiri aşağı olur. Ağciyər xərçəngləri şiş mikromühitinin olduqca təsirli olduğu xərçəng növləridir. Şiş mikromühitindəki fərqli hüceyrələr immun sisteminin basdırılmasını təmin edir. Bu da immun sisteminin aktivliyini artıran xərçəng peyvəndlərinin təsirinin azalmasına səbəb olur.

Nəticə

Aşağıdakı qrafik, yuxarıda sadaladığımız məlumatların xülasəsi kimidir və ağciyər xərçəngində Kuba peyvəndləri ilə müasir müalicələrin çatdığı nöqtəni aydın göstərməsi baxımından çox təsirlidir.

Əlaqəli mövzular:

- Kubanın öz rəsmi məlumatları ilə KUBADA XƏRÇƏNG HƏQİQƏTİ

- Kuba ağciyər xərçəngi peyvəndləri barədə elmi həqiqətlər (ətraflı)

- Eyvah, Kuba xərçəng peyvəndi yenə xəbər oldu!

- Xərçəng niyə tam müalicə edilə bilmədi?

ƏLAQƏLİ VİDEO