İrəli mərhələli HDR müsbət yumurtalıq xərçəngi üçün niraparib FDA təsdiqi aldı

23 Oktyabr 2019-cu ildə ABŞ Qida və Dərman İdarəsi (FDA) üç və ya daha çox kimyaterapiya rejimi ilə müalicə edilmiş və xərçəngi homoloji rekombinasiya çatışmazlığı (homologous recombination deficiency, HRD) baxımından müsbət olan irəli mərhələli yumurtalıq, fallop borusu və ya birincili periton xərçəngi olan xəstələr üçün niraparib (Zejula) adlı dərmanı təsdiqlədi.

Homoloji rekombinasiya çatışmazlığı (HRD) vəziyyəti belə müəyyən edilmişdir: zərərli və ya zərərli olması şübhəsi olan BRCA mutasiyası və ya son platin əsaslı kimyaterapiyaya cavab verdikdən altı aydan daha sonra xəstəliyi irəliləmiş xəstələrdə genomik qeyri-sabitlik.

Niraparibə 2. FDA təsdiqini gətirən tədqiqat

Təkqollu QUADRA adlı klinik tədqiqatda, HRD-müsbət şişləri olan irəli mərhələli yumurtalıq xərçəngli 98 xəstədə effektivlik araşdırıldı. Xəstələr əvvəllər üç və ya daha çox xətt kimyaterapiya ilə müalicə edilmişdilər. Əvvəllər PARP inhibitorları almış xəstələr tədqiqatdan xaric edildi. BRCA mutasiyası olmayan xəstələr üçün son platin əsaslı müalicə dozasından ən az altı ay sonra xərçəngin irəliləməsi şərti tələb olundu. HRD müsbət vəziyyət Myriad myChoice CDx testi ilə ölçüldü və 63 xəstənin şişində BRCA mutasiyası var idi (t BRCA m), 35 xəstədə isə genomik qeyri-sabitlik balı (GIS) ≥ 42 idi. Bütün xəstələrə xəstəliyin irəliləməsinə və ya qəbuledilməz yan təsirlər görülənə qədər gündə bir dəfə 300 mg niraparib verildi.

QEYD: Niraparib əvvəllər 2017-ci ildə platin əsaslı kimyaterapiya ilə şişləri tam və ya qismən kiçilmiş, lakin sonradan xəstəliyi təkrarlanmış yumurtalıq, fallop borusu və ya birincili peritoneal xərçəngli yetkin xəstələrin saxlayıcı müalicəsində — BRCA mutasiya vəziyyətindən asılı olmayaraq — təsdiq almışdı (baxın). QUADRA tədqiqatının birincili effektivlik meyarları obyektiv cavab göstəricisi və cavab müddəti kimi müəyyən edildi.

Nəticələr

• HRD müsbət 98 xəstədə obyektiv cavab göstəricisi % 24 idi. Hamısı parsial / qismən cavab idi.

• Təxmini median cavab müddəti 8.3 ay idi.

• BRCA mutasiyası müsbət xəstələrdə obyektiv cavab göstəriciləri;

- platinə həssas qrupda % 39,

- platinə davamlı qrupda % 29,

- platinə refrakter qrupda % 19 tapıldı.

Yan təsirlər

QUADRA-da niraparib alan xəstələrin % 73-də dozanın azaldılması və ya fasilə müşahidə edildi. Dozanın azaldılması və ya kəsilməsi ilə nəticələnən ən yayılmış ( > % 5) yan təsirlər trombositopeniya (% 40), anemiya (% 21), neytropeniya (% 11), ürəkbulanma (% 13), qusma (% 11), yorğunluq (% 9) və qarın ağrısı (% 5) idi.

Tövsiyə olunan niraparib dozası, gündə bir dəfə yeməklə və ya yeməksiz qəbul edilən 300 mg-dır.

Niraparibin təsir mexanizmi necədir?

Xərçəngli hüceyrələr normal hüceyrələrdən daha çox və sürətlə bölündüklərinə görə daha çox DNT zədəsi, yəni mutasiya yaranır. DNT-də zədə yarandıqda müxtəlif hüceyrədaxili mexanizmlər işə düşərək ya zədəni təmir edir, ya da zədə təmir edilə bilməyəcək səviyyədədirsə hüceyrə apoptozagedir. Həm PARP, həm də BRCA DNT təmirində rol oynayır. Yumurtalıq xərçəngində PARP inhibitoru olan niraparib istifadə edildikdə xərçəngli hüceyrə DNT-sini təmir etmək qabiliyyətini qismən itirir. Bu hüceyrələrdə eyni zamanda BRCA mutasiyası da varsa, xərçəngli hüceyrələrin DNT-lərini təmir etmə və ölümsüz qalma qabiliyyətləri daha çox azalır.